យុទ្ធនាការបំពាក់បូពណ៌ស ដល់បុរស ដើម្បីកាត់បន្ថយហិង្សាលើស្ត្រី ចាប់ផ្តើមជាថ្មី
តាំងពីថ្ងៃទី ២៥ វិច្ឆិកា ម្សិលមិញមក យុទ្ធនាការ១៦ថ្ងៃ ដើម្បីបំពាក់បូពណ៌សដល់បុរសឲ្យបញ្ឈប់អំពើហិង្សាលើស្ត្រី បានចាប់ផ្តើមដំណើរការទៀតហើយ។ យុទ្ធនាការនេះបានចាប់តាំងពីឆ្នាំ ២០០០ និងកំពុងតែមានភាពផុសផុលជាខ្លាំង។ បុរសៗចូលរួមកាន់តែច្រើនក្នុងយុទ្ធនាការនេះ។ យុទ្ធនាការនេះ ត្រូវបានគេពន្យល់ថា បានចូលរួមចំណែកយ៉ាងសកម្មក្នុងការទប់ស្តាត់អំពើហិង្សាក្នុងគ្រួសារ និងជាពិសេស គឺទប់ស្កាត់ ការរំលោភបំពានផ្លូវភេទលើកុមារី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ចាប់ពីថ្ងៃទី ២៥វិច្ឆិកា ដល់ថ្ងៃទី ១០ខែធ្នូ ជារៀងរាល់ឆ្នាំ បណ្តាញបុរសកម្ពុជា សហការជាមួយ អង្គការជាតិ និងអន្តរជាតិ បានផ្តួចផ្តើមគ្នា ប្រារព្ធនូវទិវាអន្តរជាតិមួយ ដែលគេឲ្យឈ្មោះថា ជាយុទ្ធនាការ ១៦ថ្ងៃ បំពាក់បូពណ៌ស ដល់បុរស ដើម្បីបញ្ឈប់អំពើហិង្សាលើស្ត្រី។ នៅក្នុងឆ្នាំនេះ យុទ្ធនាការនេះ ប្រព្រឹត្តទៅ ក្នុងរាជធានីភ្នំពេញ និងខេត្តចំនួន ៥ផ្សេងទៀត រួមមានខេត្ត កំពង់ឆ្នាំង ពោធិ៏សាត់ បាត់ដំបង បន្ទាយមានជ័យ និងព្រៃវែង។
លោក ឆាយ គីមស័រ ប្រធានកម្មវិធីទំនាក់ទំនងនៃអង្គការយេនឌ័រ និងអភិវឌ្ឍន៏ដើម្បីកម្ពុជា បានប្រាប់វិទ្យុបារាំងអន្តរជាតិថា យុទ្ធនាការនេះ បង្កើតឡើងគឺក្នុងគោលបំណងលើកស្ទួយការចូលរួមចំណែករបស់បុរស ក្នុងការលុបបំបាត់អំពើហិង្សាទាំងផ្លូវចិត្ត និងផ្លូវកាយលើនារី។ បើតាមលោក ឆាយ គីមស័រ ការស្រាវជ្រាវបានរកឃើញថា ឋានៈក្នុងសង្គមគឺជាហេតុធ្វើឲ្យមានវិសមភាពរវាងបុរសនិងនារី។ ជាក់ស្តែងនៅកម្ពុជា គេតែងតែឲ្យបុរសមានអំណាចជាងនារី នៅក្នុងគ្រួសារ។ នៅក្នុងសង្គម ក៏តួនាទីបុរសមានច្រើនជាងនារីដែរ។
ម្យ៉ាងទៀត អំពើហិង្សាដែលតែងតែកើតមានឡើង គឺភាគច្រើនក៏បណ្តាលមកពីបុរសដែរ។ ប៉ុន្តែ បុរសច្រើនតែមិនទទួលខុសត្រូវ ចំពោះបញ្ហាទាំងនេះទេ។ នេះបើយោងតាមការកត់សម្គាល់របស់ប្រធានកម្មវិធីទំនាក់ទំនងខាងលើ។
សូមបញ្ជាក់ថា យុទ្ធនាការបំពាក់បូពណ៌ស ដល់បុរសនេះ មិនមែនត្រឹមតែជាការយកបូពណ៌ស ទៅពាក់លើអាវ របស់បុរសនោះទេ។ ប៉ុន្តែ យុទ្ធនាការនេះ គឺមានទាំងសកម្មភាពមួយចំនួនផ្សេងទៀត រួមមានការរៀបចំមិទ្ទិញ ការដើរដង្ហែក្បួនតាមទីសាធារណៈ កម្មវិធីពិភាក្សាតាមទូរទស្សន៍ ការជជែកពិភាក្សាតាមវិទ្យុ និងការប្រគុំតន្ត្រីចល័តតាមបណ្តោយផ្លូវជាតិលេខ ៥ និងតាមកន្លែងផ្សេងទៀត ដើម្បីផ្សព្វផ្សាយ ឲ្យប្រជាពលរដ្ឋ បានយល់កាន់តែច្បាស់ពីតួនាទីរបស់បុរសពិត ក្នុងការលើកតម្កើងតំលៃស្ត្រី។
តាមការឲ្យដឹងពីបណ្តាញបុរស តាំងពីយុទ្ធនាការនេះ បង្កើតឡើង គឺទទួលបានជោគជ័យច្រើនក្នុងសង្គមកម្ពុជា។ ជោគជ័យ ព្រោះថាយុទ្ធនាការនេះ បានជួយជម្រុញ ឲ្យមានការបង្កើតច្បាប់ប្រឆាំងអំពើហិង្សាក្នុងគ្រួសារ ហើយបានជម្រុញឲ្យបុរសជាច្រើនអនុវត្តច្បាប់នេះផងដែរ។
យ៉ាងណាក៏ដោយ ការរំលោភបំពានផ្លូវភេទលើកុមារី ហាក់មានការកើនឡើងវិញ។ យោងតាមសន្ទស្សន៍វិសមភាពយេនឌ័រអន្តរជាតិ ប្រទេសកម្ពុជា ទទួលបានចំណាត់ថ្នាក់លេខ១០៣ ក្នុងចំណោមប្រទេសចំនួន ១៣៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ