រឿងអាស្រូវពុករលួយសុខាភិបាល៖ អង្គភាពប្រឆាំងអំពើពុករលួយទទួលស្គាល់បញ្ហាប្រឈម
ជាងមួយសប្តាហ៍បន្ទាប់ពីមូលនិធិពិភពលោក( Global Fund ) បានចេញរបាយការណ៍ស្តីពីការកឹបកេងថវិកា ពីសំណាក់មន្ត្រីសុខាភិបាលមួយចំនួនមក អង្គភាពប្រឆាំងអំពើពុករលួយបានចេញមុខការពារអាជ្ញាធរជាតិប្រយុទ្ធប្រឆាំងជំងឺអេដស៍ ថាបានបំពេញការងារត្រឹមត្រូវស្របតាមនីតិវិធីលទ្ធកម្មសាធារណៈ។ ប៉ុន្តែ អង្គភាពប្រឆាំងអំពើពុករលួយក៏បានទទួលស្គាល់ថា មានបញ្ហាប្រឈមនៅក្នុងការងារដេញថ្លៃ ដូចជាមិនបានសិក្សាពីលក្ខណៈសម្បត្តិរបស់ក្រុមហ៊ុន និងដាក់តម្លៃខ្ពស់ជាងទីផ្សារជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
អង្គភាពប្រឆាំងអំពើពុករលួយមិនបាននៅស្ងៀមទេចំពោះមុខរឿងអាស្រូវពុករលួយនៅក្នុងប្រព័ន្ធសុខាភិបាលដែលមូលនិធិពិភពលោកបានរកឃើញ។ នៅក្នុងសេចក្តីប្រកាសព័ត៌មានមួយដែលចេញផ្សាយនៅក្នុងគេហទំព័ររបស់ខ្លួន អង្គភាពប្រឆាំងអំពើពុករលួយបានការពារអាជ្ញាធរជាតិប្រយុទ្ធប្រឆាំងជំងឺអេដស៍ថា បានបំពេញការងារត្រឹមត្រូវតាមនីតិវិធីលទ្ធកម្មសាធារណៈក្នុងដំណើរការដេញថ្លៃ។
បើតាមអង្គភាពប្រឆាំងអំពើពុករលួយ រាល់ដំណើរការនៃការធ្វើលទ្ធកម្មរបស់ខ្លួន អាជ្ញាធរជាតិប្រយុទ្ធប្រឆាំងជំងឺអេដស៍តែងបានផ្សព្វផ្សាយជាសាធារណៈ និងបានអញ្ជើញអង្គភាពប្រឆាំងអំពើពុករលួយឲ្យចូលរួមសង្កេតការណ៍។ ចំណែកឯក្រុមហ៊ុនដេញថ្លៃទាំងអស់ក៏បានបំពេញបែបបទត្រឹមត្រូវតាមលក្ខខណ្ឌតម្រូវ។
យ៉ាងណាក៏ដោយ អង្គភាពប្រឆាំងអំពើពុករលួយទទួលស្គាល់ថាមានចំណុចប្រឈមមួយចំនួននៅក្នុងដំណើរការនេះ។ ចំណុចប្រឈមទាំងនោះជារួមមាន ការផ្សព្វផ្សាយព័ត៌មានមិនសូវមានប្រសិទ្ធភាពដែលនាំឲ្យមានតែក្រុមហ៊ុនដដែលៗចូលរួមដេញថ្លៃ។ ម្យ៉ាងទៀត ការពិនិត្យលក្ខណៈសម្បត្តិរបស់ក្រុមហ៊ុនដែលបានដាក់ពាក្យសុំដេញថ្លៃក៏នៅមានចន្លោះប្រហោង។ ក្រុមហ៊ុនខ្លះគ្មានស្លាកយីហោត្រឹមត្រូវឡើយ។ រីឯតម្លៃដែលស្នើសុំទៅក្រសួងសេដ្ឋកិច្ចនិងហិរញ្ញវត្ថុខ្ពស់ជាងតម្លៃទីផ្សារដែរ។
ប៉ុន្តែ អង្គភាពប្រឆាំងអំពើពុករលួយមិនបាននិយាយដល់អាជ្ញាធរជាតិប្រយុទ្ធប្រឆាំងជំងឺគ្រុនចាញ់ដែលប្រធានអាជ្ញាធរនេះទទួលរងការចោទប្រកាន់ថាបានទទួលប្រាក់ពីក្រុមហ៊ុនផ្គត់ផ្គង់មុងពីប្រទេសស្វ៊ីសនោះទេ។ អង្គភាពប្រឆាំងអំពើពុករលួយក៏មិនបានប្រាប់ឲ្យដឹងពីវិធានការយ៉ាងណាចំពោះករណីនេះដែរ។
គួរបញ្ជាក់ថា មូលនិធិពិភពលោកបានរកឃើញថា មានអំពើពុករលួយនៅក្នុងការប្រើប្រាស់មូលនិធិប្រយុទ្ធប្រឆាំងជំងឺគ្រុនចាញ់ ជំងឺអេដស៍ និងជំងឺឆ្លងផ្សេងទៀត ដែលខ្លួនផ្តល់ថវិកា។ មូលនិធិនេះ រកឃើញថា អតីតប្រធានមជ្ឈមណ្ឌលជាតិ ប្រឆាំងជំងឺគ្រុនចាញ់ និងមន្ត្រីនៃមជ្ឃមណ្ឌលជាតិប្រឆាំងជំងឺអេដស៍ សើរស្បែក និងកាមរោគ បានទទួលប្រាក់ជាង ៤០ ម៉ឺនដុល្លារពីក្រុមហ៊ុនផ្គត់ផ្គង់មុងនៅក្នុងប្រទេស្វ៊ីស។ នៅមិនទាន់មានប្រតិកម្មបែបណាពីរដ្ឋាភិបាលនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ