ចិនសន្យាថានឹងដោះស្រាយជម្លោះនៅសមុទ្រចិនខាងត្បូងដោយសន្តិវិធី
ថ្លែងក្នុងសន្និសីទស្តីពីសន្តិសុខ នៅក្នុងប្រទេសសិង្ហបុរី រដ្ឋមន្រ្តីការពារជាតិចិនបានសន្យាថា ចិននឹងដោះស្រាយជម្លោះ នៅសមុទ្រចិនខាងត្បូង ដោយសន្តិវិធី។ នៅក្នុងសន្និសីទនេះ ចិនបានទទួលរងនូវការរិះគន់ខ្លាំងៗ ពីសំណាក់វៀតណាម និងហ្វ៊ីលីពីន ដែលជាប្រទេសជាប់ជម្លោះក្នុងសមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០៤:៣៥
“ចិនប្តេជ្ញាថានឹងរក្សាសន្តិភាព និងស្ថិរភាព នៅសមុទ្រចិនខាងត្បូង”។ នេះគឺជាការថ្លែងរបស់រដ្ឋមន្រ្តីការពារជាតិចិន នៅក្នុងឱកាសសន្និសីទអន្តរជាតិ ស្តីពីសន្តិសុខ (Shangrila Dialogue) ដែលប្រព្រឹត្តទៅ នៅក្នុងប្រទេសសិង្ហបុរី។
រដ្ឋមន្រ្តីការពារជាតិវៀតណាម និងហ្វ៊ីលីពីនបានរិះគន់សកម្មភាពរបស់ចិន នៅក្នុងសមុទ្រចិនខាងត្បូង នៅក្នុងមួយរយៈកាលចុងក្រោយនេះ ដោយសម្តែងនូវការបារម្ភថា វាអាចនឹងនាំទៅដល់ការប៉ះទង្គិចដោយប្រដាប់អាវុធ នៅថ្ងៃណាមួយ។ យោងតាមវៀតណាម និងហ្វ៊ីលីពីន នៅក្នុងចន្លោះពីខែកុម្ភៈ ដល់ខែឧសភា នាវាចម្បាំងរបស់ចិនបានបាញ់ប្រហារទៅលើទូកនេសាទហ្វ៊ីលីពីន ព្រមទាំងបានធ្វើការគំរាមកំហែងដល់នាវារបស់ហ្វ៊ីលីពីន និងវៀតណាម ដែលកំពុងធ្វើការរុករកប្រេង នៅក្នុងសមុទ្រចិនខាងត្បូង។
គួរបញ្ជាក់ថា ចិន តៃវ៉ាន់ វៀតណាម ម៉ាឡេស៊ី ព្រុយណេ និងហ្វ៊ីលីពីន កំពុងឈ្លោះដណ្តើមកោះ និងដែនសមុទ្រ នៅក្នុងសមុទ្រចិនខាងត្បូង ដែលគេជឿថាជាតំបន់សម្បូរទៅដោយធនធានធម្មជាតិ ដូចជា ប្រេង ឧស្ម័ន និងមច្ឆជាតិ។ កាលពីឆ្នាំ២០០២ នៅក្នុងអំឡុងជំនួបកំពូលអាស៊ាន នៅទីក្រុងភ្នំពេញ អាស៊ាន និងចិនបានចុះហត្ថលេខាលើកិច្ចព្រមព្រៀងមួយ ដែលគេច្រើនតែហៅកាត់តាមភាសាអង់គ្លេសថា DOC (Declaration on the Conduct of Parties in the South China Sea)។ រដ្ឋមន្រ្តីការពារជាតិវៀតណាមបានទទូចឲ្យគ្រប់ភាគីជម្លោះមានការអត់ធ្មត់ ដោយគោរពទៅតាមអ្វីដែលបានព្រមព្រៀងគ្នា នៅក្នុង DOC ។
កាលពីថ្ងៃសៅរ៍ រដ្ឋមន្រ្តីការពារជាតិអាមេរិក ដែលបានចូលរួមក្នុងសន្និសីទនៅសិង្ហបុរីដែរនោះ បានថ្លែងថា ការប៉ះទង្គិចគ្នានៅសមុទ្រចិនខាងត្បូងអាចនឹងកើតមានឡើង ប្រសិនបើភាគីជម្លោះមិនបង្កើតយន្តការដោះស្រាយជម្លោះដោយសន្តិវិធីទេនោះ។ ជម្លោះ នៅក្នុងសមុទ្រចិនខាងត្បូង កំពុងតែក្លាយទៅជាការប្រឈមមុខគ្នារវាងចិន និងអាមេរិក ដែលជាសម្ព័ន្ធមិត្តយ៉ាងជិតស្និទ្ធរបស់ហ្វ៊ីលីពីន។ ប្រឈមមុខនឹងការគំរាមកំហែងពីកម្លាំងយោធារបស់ចិន វៀតណាមក៏កំពុងតែស្វះស្វែងបង្កើនទំនាក់ទំនងជាមួយអាមេរិកដែរ នៅពេលនេះ។
គួរបញ្ជាក់ថា ក្រៅពីសម្បូរទៅដោយធនធានធម្មជាតិ សមុទ្រចិនខាងត្បូងក៏ជាច្រកនាវាចរណ៍ដ៏សំខាន់មួយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ