ប៉ូលិសចិនបន្តឃាត់សកម្មជនដែលគំាទ្រចលនាបះបោរទាមទារលទ្ធិប្រជាធិបតេយ្យនៅហុងកុង
ទីភ្នាក់ងារព័ត៌មាន AFP ចេញក្នុងថ្ងៃចន្ទ ទី១៣ តុលានេះឲ្យដឹងថា ប៉ូលិសចិនបានឃាត់ខ្លួនសកម្មជនចិនចំនួន ២នាក់នាពេលថ្មីៗនេះ ពីបទបានចូលរួមនៅក្នុងក្បួនបាតុកម្មគំាទ្រលទ្ធិប្រជាធិបតេយ្យរបស់ប្រជាជនចិននៅហុងកុងកាលពីខែកក្កដា។ ដំណឹងនេះបានធ្លាក់មក ចំពេលដែលមានមនុស្សជាច្រើននាក់ផ្សេងទៀតត្រូវបានប៉ូលិសចិនឃាត់ខ្លួននារយៈពេលពីរសប្តាហ៍ចុងក្រោយនេះ។
ចុះផ្សាយនៅថ្ងៃ៖
ស្តាប់ - ០១:៥៩
សកម្មជនចិនទំាងពីរនាក់ដែលប៉ូលិសទើបបានចាប់ខ្លួនកាលពីសប្តាហ៍មុន គឺជាស្រ្តីដែលមានឈ្មោះហ្សាង ស៊ីវហួរ និងលី លីរ៉ុង។ ស្រ្តីទំាងពីរនាក់ជាប្រជាជនចិនរស់ក្នុងទីក្រុងប៉េកំាង និងដែលបានជាប់ចោទពីបទបានចូលរួមនៅក្នុងក្បួនបាតុកម្មទាមទារលទ្ធិប្រជាធិបតេយ្យរបស់ប្រជាជនហុងកុងកាលពីខែកក្កដាកន្លងទៅ។ នៅក្នុងពេលចូលរួមជាមួយពួកបាតុករហុងកុង លោកស្រីហ្សាង ស៊ីវហួរ និងលោកស្រីលី លីរ៉ុងថែមទំាងបានផ្តល់បទសម្ភាសន៍ឲ្យមធ្យោបាយឃោសនាមហាជនបរទេសទៀតផង ពិសេសសារព័ត៌មានបរទេសដែលបានគំាទ្រចលនាសាសនាហ្វាលុង ហ្កុង (Falun Gong) ដែលរដ្ឋអំណាចចិនហាមមិនឲ្យចេញផ្សាយ។ មិត្តភ័ក្តិរបស់ស្រ្តីចាប់ខ្លួនទំាងពីររូបបាននិយាយថា មុននឹងចាប់ខ្លួនអ្នកទំាងពីរ ប៉ូលិសបានកោះហៅពួកគេទៅសួរដោយទាក់ទងជាពិសេសរឿងបទសម្ភាសន៍ជាមួយសារព័ត៌មានបរទេស។ ជាទូទៅ រដ្ឋអំណាចចិនតែងតែបានលើកយកហេតុផលទប់ស្កាត់ភាពអានាធិបតេយ្យដើម្បីផ្តន្ទាទោសលើសកម្មជនសិទ្ធិមនុស្ស ឬមួយក៏បំបិទមាត់អ្នកដែលបានចេញមុខរិះគន់ទិតៀនរបបកុម្មុយនិស្ត។
អង្គការក្រៅរដ្ឋាភិបាលមួយឈ្មោះ Chinese Human Rights Defenders ដែលមានមូលដ្ឋាននៅសហរដ្ឋអាមេរិកឲ្យដឹងថា មានមនុស្សជាង ៤០នាក់ត្រូវបានប៉ូលិសចិនចាប់ខ្លួនក្នុងទីក្រុងប៉េកំាងក្នុងរយៈពេល ២សប្តាហ៍កន្លងទៅពីបទបានចូលរួមជួយគំាទ្រចលនាបះបោរទាមទារលទ្ធិប្រជាធិបតេយ្យនៅហុងកុង។ ក្នុងចំណោមអ្នកចាប់ខ្លួនទំាងនោះ គេសង្កេតឃើញមានសិល្បករ សិល្បការិនីប្រមាណជា ១០នាក់ ក្នុងនោះ ក៏មានកវីវ៉ាង ហ្សាងដែលបានចុះផ្សាយតាមប្រព័ន្ធអ៊ីធឺណែតនូវឈុតឆាកមួយបង្ហាញពីលោកកំពុងលើកឆត្រគ្រវី។ គឺឆត្រនេះហើយដែលពួកបាតុករសិស្ស និស្សិតនៅហុងកុងប្រើជានិមិត្តរូបដើម្បីទាមទារឲ្យរដ្ឋអំណាចក្រុងប៉េកំាងផ្តល់ឲ្យពួកគេនូវសិទ្ធិសេរីភាពទូលំទូលាយបន្ថែមទៀត។
ក្រៅពីការបន្តចាប់ខ្លួនក្រុមសកម្មជនគំាទ្រចលនាបះបោរនៅហុងកុង រដ្ឋអំណាចចិនក៏បានចាត់វិធានការបិទខ្ទប់បណ្តាញអ៊ីធឺណែតដែលផ្សព្វផ្សាយពីព័ត៌មានទាក់ទងនឹងព្រឹត្តិការណ៍នៅហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ