ចិនគ្រោងកាត់បន្ថយចំនួនបទល្មើសដែលត្រូវជាប់ទោសប្រហារជីវិត
ប្រទេសចិនគ្រោងកាត់បន្ថយថែមទៀតចំនួនបទល្មើសដែលត្រូវជាប់ទោសប្រហារជីវិត។គឺជាវិធានការមួយដែលធ្វើឡើងតាមគន្លងមាគ៌ាអាជ្ញាធរកុម្មុយនិស្តដែលបានខិតខំប្រឹងប្រែងនាបច្ចុប្បន្ននេះ ដើម្បីត្រួតពិនិត្យឲ្យបានល្អប្រសើរនិងធ្វើការពង្រឹងប្រព័ន្ធតុលាការមួយដែលត្រូវអាប់អោនកិតិសព្ទដោយសារតែមានការរិះគន់តិះដៀលថាគ្មានភាពស្របច្បាប់-នេះជាការជូនដំណឹងរបស់កាសែតផ្លូវការចិននៅថ្ងៃចន្ទី២៧តុលានេះ។
ចុះផ្សាយនៅថ្ងៃ៖
ស្តាប់ - ០២:១៣
ស្របតាមគម្រោងវិសោធនកម្មដែលបានដាក់ជូន គណៈកម្មាធិការអចិន្ត្រៃយ៍នៃសភាប្រជាមានិតចិន បទឧក្រិដ្ឋចំនួន៩ករណី ប្រហែលជានឹងអាចរួចផុតពីបទល្មើសដែលត្រូវ ជាប់ ទោសប្រហារជីវិត។
បទឧក្រិដ្ឋទាំងនោះ មានដូចជា ការរត់ពន្ធអាវុធ សម្ភារៈនុយក្លេអ៊ែរ ការផលិតរូបិយវត្ថុក្លែងក្លាយ ការចាប់បង្ខំមនុស្សឲ្យបំរើការងារខាងផ្លូវភេទឬក៏ការអង្គាសប្រមូលថវិកា ដោយធ្វើការក្លែងបោកបញ្ឆោត។ យោងតាមកាសែតផ្លូវការចិន” សេចក្តីសម្រេចទោសដ៏ធ្ងន់បំផុតចំពោះករណីយដូចខាងលើនេះនឹងត្រូវបន្ថយទោសឲ្យមកនៅត្រឹម ទោសជាប់ក្នុងពន្ធនាគារអស់មួយជីវិតវិញ។
គួររំលឹកថា ចិនជាប្រទេសតែមួយគត់ ដែលធ្វើការប្រហារជីវិតអ្នកទោសចំនួនច្រើនបំផុតនៅលើលោក ហើយនៅបច្ចុប្បន្ននេះក្នុងបញ្ជីរបស់អាជ្ញាធរចិន មានបទល្មើស ៥៥ករណី ដែលត្រូវជាប់ទោសប្រហារជីវិត។ ក្នុងចំណោមបទល្មើសទាំងនេះ ភាគច្រើន ពុំមានជាប់ពាក់ព័ន្ធនឹងអំពើហិង្សាលើផ្លូវរាងកាយនោះទេ។
ម្យ៉ាងទៀត ចាប់តាំងពីការប្រកាសឲ្យប្រើក្រមព្រហ្មទណ្ឌនិងក្រមនីតិវិធីព្រហ្មទណ្ឌនៅឆ្នាំ១៩៧៩មក ប្រទេសចិន បានកាត់បន្ថយបទល្មើសដែលត្រូវប្រហារជីវិតពីបញ្ជីខ្លួន តែម្តងគត់នៅឆ្នាំ២០១១ ។ ក៏ប៉ុន្តែក្រុងប៉េកាំង បានសំរេចដកចេញតែ ចំពោះ បទឧក្រិដ្ឋខ្លះជាអាទិ៍ បទឧក្រិដ្ឋសេដ្ឋកិច្ច ដោយបានបន្ថយពីបទល្មើសដែលត្រូវជាប់ទោសប្រហារជីវិតពី ៦៨ ករណី ឲ្យមកនៅត្រឹមតែចំនួន ៥៥ វិញ។
ដោយលាក់ការណ៏យ៉ាងសម្ងាត់បំផុត អាជ្ញាធរចិន មិនដែលប្រកាសពីចំនួនអ្នកទោសដែលត្រូវបានគេប្រហារជីវិតនោះទេ ក៏ប៉ុន្តែ អង្គការក្រៅរដ្ឋាភិបាលមួយដែលមានទីស្នាក់ការនៅសហរដ្ឋអាមេរិក បានជូនដំណឹងប្រាប់កាលពីសប្តាហ៏មុន“ថានៅឆ្នាំ២០១៣ អ្នកទោសចំនួន២៤០០នាក់ត្រូវបានគេប្រហារជីវិត។ ប៉ុន្តែបើប្រៀបនឹងឆ្នាំ២០១២ "ចំនួនអ្នកទោសដែលត្រូវបានគេប្រហារជីវិត បានថយកំរិតតែ ២០% ប៉ុណ្ណោះ ផ្ទុយទៅវិញ បើប្រៀបនឹងឆ្នាំ២០០២ វិញ អ្នកទោសដែលត្រូវគេប្រហារជីវិតមានរហូតដល់ទៅ ១,២០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ