ទីក្រុងប៉េកំាងកំពុងបន្តរងគ្រោះដោយផ្សែងពុលក្រាស់ក្រែលក្នុងបរិយាកាស
នៅថ្ងៃពុធ ទី៣០ មករានេះ រដ្ឋអំណាចទីក្រុងប៉េកំាងបានធ្វើការអំពាវនាវដល់ប្រជាពលរដ្ឋរស់ក្នុងទីក្រុងកុំឲ្យចាកចេញពីផ្ទះសម្បែងរបស់ខ្លួន បើមិនចំាបាច់ទេ។ មូលហេតុ មកពីមានវត្តមានផ្សែងពុលយ៉ាងក្រាសក្រែលនៅក្នុងបរិយាកាស។ ខណៈនេះ រដ្ឋអណាចបានចាត់វិធានការមួយចំនួនដើម្បីទប់ស្កាត់។
ចុះផ្សាយនៅថ្ងៃ៖
ស្តាប់ - ០១:៤៥
តំាងតែពី ៣ថ្ងៃមកហើយ ដែលប្រជាពលរដ្ឋរស់ក្នុងទីក្រុងប៉េកំាងពិបាកដកដង្ហើមដោយសារកង្វះខ្យល់អុកស៊ីសែន។ កង្វះខ្យល់អុកស៊ីសែនមកពីបរិយាកាសក្នុងទីក្រុងកំពុងគ្របដណ្តប់ដោយផ្សែងពុលយ៉ាងក្រាសឃ្មឹក។ ជាមួយនឹងវត្តមានប្រជាពលរដ្ឋរស់នៅប្រមាណជា ២០លាននាក់ និងវត្តមានរថយន្តជាង ៥លានគ្រឿង ទីក្រុងប៉េកំាងបានជួបប្រទះនឹងព្រឹត្តិការណ៍ដូចគ្នានេះជាច្រើនដងមកហើយនៅក្នុងខែមករានេះ។
ក៏ដូចជាសព្វមួយដង រដ្ឋណាចក្រុងប៉េកំាងបានធ្វើការអំពាវនាវដល់ប្រជាពលរដ្ឋកុំឲ្យចាកចេញពីលំនៅដ្ឋានរបស់ខ្លួន ប្រសិនបើមិនចំាបាច់ទេ ពិសេសកូនក្មេង មនុស្សចាស់ អ្នកដែលមានបញ្ហាសុខភាព និងអ្នកដែល allergie នឹងផ្សែងពុល។ ទន្ទឹមគ្នានេះ គេសង្កេតឃើញជារួមថា ប្រជាពលរដ្ឋក៏បានយកចិត្តទុកដាក់ប្រយ័ត្នប្រយែងដោយខ្លួនឯងដែរ ដូចយ៉ាងពាក់ម៉ាស់នៅពេលធ្វើដំណើរចេញក្រៅនៅតាមផ្លូវ ឬមួយក៏អង្គុយធ្វើការនៅក្នុងការិយាល័យជាដើម។
កាលពីថ្ងៃអង្គារ ទី២៩ មករាម្សិលមិញ រដ្ឋអំណាចក្រុងប៉េកំាងបានបញ្ជាក់ឲ្យដឹងពីការប្រកាសផ្អាកដំណើរការជាបណ្តោះអាសន្ននូវរោងចក្រចំនួន ១០៣រោងចក្រ និងបិទទ្វារកន្លែងចតឡានចំនួន ៣០% សម្រាប់រថយន្តផ្លូវការ។ យ៉ាងណាក៏ដោយ វិធានការទំាងនេះនៅតែមិនអាចកាត់បន្ថយកម្រិតអត្រាផ្សែងពុលនៅក្នុងបរិយាកាសទេ។ យោងតាមស្ថានទូតអាមេរិកប្រចំាក្រុងប៉េកំាងដែលបានធ្វើការវាស់វែងកម្រិតអត្រាផ្សែងពុលក្នុងបរិយាកាសដោយឡែករបស់ខ្លួនឲ្យដឹងថា អត្រាផ្សែងពុលនៅរសៀលថ្ងៃពុធនេះបានឡើងដល់កម្រិតមួយប្រកបដោយគ្រោះថ្នាក់បំផុត។
ជាមហាអំណាចសេដ្ឋកិច្ចទី២ក្នុងលោក និងក៏ជាទីផ្សាររថយន្តចំណាត់ថ្នាក់ទី១ ដែរនោះ ចិនកំពុងប្រឈមមុខនឹងបរិយាកាសរបស់ខ្លួនដែលបាននិងកំពុងទទួលការគំរាមកំហែងដោយផ្សែងពុលរបស់រោងចក្រ សហគ្រាស និងចរាចរណ៍របស់រថយន្តណែនណាន់តាន់តាប់នៅតាមដងផ្លូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ