អាកាសធាតុ

ឧស្សាហកម្មលូតលាស់របស់មហាអំណាចអាស៊ីជាអ្នកបង្កើនឧស្ម័នផ្ទះកញ្ចក់

នៅក្នុងពេលដែលសន្និសីទប្រចាំឆ្នាំ ស្តីពីការប្រែប្រួលអាកាសធាតុកំពុងប្រព្រឹត្តទៅ នៅទីក្រុងដូហា ប្រទេសកាតា អង្គការតាមដានពីផលប៉ះពាល់អាកាសធាតុបានបញ្ចេញរបាយការណ៍ ដែលចង្អុល ទម្លាក់កំហុសដាក់ប្រទេសចិន និងឥណ្ឌា។ ឧស្សាហកម្មរីកចម្រើនខ្លាំងរបស់ប្រទេសមហាយក្សអាស៊ីទាំងពីរ បានផ្តល់ផលប៉ះពាល់ខ្លាំងដល់អាកាសធាតុ ដោយវាបានចូលរួមចំណែកធ្វើឲ្យឧស្ម័នផ្ទះកញ្ចក់កើនឡើងដល់ ៣,១ភាគរយ ក្នុងឆ្នាំ២០១១កន្លងទៅ។

ចុះផ្សាយនៅថ្ងៃ៖ 04/12/2012 - 13:33

ដោយ៖ ឈាង បុប្ផា

ផ្សាយពាណិជ្ជកម្ម

នៅឆ្នាំ ២០១២នេះ ឧស្ម័នផ្ទះកញ្ចក់ដែលបញ្ចេញដោយរោងចក្រឧស្សាហកម្មមានកម្រិត ២,៦ភាគរយ។ ជាសរុប នៅក្នុងពិភពលោក ឧស្ម័នផ្ទះកញ្ចក់សម្រាប់ឆ្នាំ នេះ មានទំហំ ៣៥ពាន់ ៦រយលានតោន។ បើសិន ចំនួនឧស្ម័នពុល នៅតែបន្តកើនឡើង ក្នុងកម្រិតសព្វថ្ងៃនេះ នោះសីតុណ្ហភាពជាមធ្យមរបស់ភពផែនដី នឹងអាចកើនឡើង ពី៤ ទៅ ទៅ ៦អង្សារ នៅចុងសតវត្សរ៍ទី ២១នេះ។ កំដៅផែនដីកើនឡើង នឹងបង្កឲ្យមានគ្រោះធម្មជាតិ ដូចជាទឹកជំនន់ ការកើនឡើងនៃកម្រិតកំពស់ទឹកសមុទ្រ និងទឹកជំនន់ជាដើម។ អ្នកសិក្សាស្រាវជ្រាវរបស់គម្រោងឧស្ម័នពិភពលោក បានទាញសញ្ញាប្រកាសអាកាសអាសន្នបែបនេះ នៅក្នុងរបាយការណ៍មួយដែលគេបានចែកផ្សាយ កាលពីថ្ងៃអាទិត្យម្សិលមិញ នៅក្នុងអង្គសន្និសីទនៅក្នុងទីក្រុងដូហា។

ក្រុមអ្នកស្រាវជ្រាវខាងលើបានអះអាងថា គេអាចប៉ាន់ស្មានពីការកើនឡើងនៃឧស្ម័នផ្ទះកញ្ចក់ នៅក្នុងពិភពលោក ដោយគេសង្កេតមើលទៅលើស្ថានភាពរីកចម្រើនសេដ្ឋកិច្ចរបស់ប្រទេសមួយចំនួន ដូចជាចិន និងឥណ្ឌាជាដើម។ ប្រទេសមហាយក្សអាស៊ីទាំងពីរបានប្រើប្រាស់ធ្យូងថ្មច្រើនជាងគេ ដើម្បីធ្វើជាប្រភពថាមពលឧស្សាហកម្ម។

បើតាមអ្នកជំនាញ ដើម្បីជំរុញឧស្សាហកម្មឲ្យរីកចម្រើនលឿនឆាប់ ប្រទេសទើបរីកលូតលាស់ថ្មី ពេញនិយមប្រើធ្យូងថ្ម ដែលបញ្ចេញឧស្ម័នពុលកាបូនិច ច្រើន ប៉ុន្តែ ប្រទេសទាំងនោះ មិនសូវប្រើប្រភពថាមពលថ្មី ដែលល្អសម្រាប់បរិស្ថាន ដូចជាកង្ហាល់ខ្យល់ ផ្ទាំងស្រូបកំដៅព្រះអាទិត្យ ឬថាមពលនុយដើរដោយនុយក្លេអ៊ែរ។

នៅឆ្នាំ ២០១១ ប្រទេសកំពុងអភិវឌ្ឍទទួលខុសត្រូវក្នុងការបញ្ចេញឧស្ម័នផ្ទះកញ្ចក់ប្រមាណ ៥៨ភាគរយ គឺកើនឡើងខ្លាំងបើប្រៀបធៀបនឹងឆ្នាំ ១៩៩០ ដែលមានត្រឹមប្រមាណ ៣៥ភាគរយប៉ុណ្ណោះ។ ចិនតែម្នាក់ឯង ដែលមានឧស្សាហកម្មរីកចម្រើនមិនឈប់ បានបញ្ចេញឧស្ម័នផ្ទះកញ្ចក់ប្រមាណ ២៨ភាគរយ ក្នុងចំណោមចំនួនសរុបក្នុងពិភពលោក។ បន្ទាប់មកទៀត គឺអាមេរិកជាប្រទេសទីពីរ ដែលបញ្ចេញឧស្ម័នផ្ទះកញ្ចក់ច្រើនជាងគេ ក្នុងពិភពលោក៕