ក្រុងយក្ស ការច្នៃប្រឌិត និងកំណើនសេដ្ឋកិច្ច
ចុះផ្សាយនៅថ្ងៃ៖
ស្តាប់ - ០៣:២៩
ក្រុងយក្ស ឬជាភាសាបរទេស Megacities ត្រូវអ្នកសេដ្ឋកិច្ចពន្យល់ថាមានន័យស្មើនឹងពាក្យថា ប្រភពនៃការច្នៃប្រឌិត និងកំណើនសេដ្ឋកិច្ច។ តើមកពីមូលហេតុអ្វី?
នៅក្នុងប្រវត្តិដ៏យូរអង្វែងនៃការអភិវឌ្ឍសេដ្ឋកិច្ច និងសង្គម, មនុស្សជាតិយើងតែងតែខ្វល់ខ្វាយ ពីការធ្វើយ៉ាងណា គ្រប់គ្រងប្រើប្រាស់ធនធានធម្មជាតិ ដើម្បីបំពេញសេចក្តីត្រូវការរបស់ខ្លួនឱ្យបានច្រើនតាមតែអាចធ្វើទៅបាន។ ក៏ប៉ុន្តែ ដែលជារឿយៗ មនុស្សជាតិត្រូវប្រឈមនឹងបញ្ហាចម្បងមួយគឺថា ធនធានទាំងអស់នោះមានបរិមាណកំណត់។ ក្នុងន័យនេះ នៅពេលណាដែលចំនួនមនុស្សកើនឡើង ធនធានទាំងអស់នោះមិនបានកើនឡើងជាមួយចំនួនមនុស្សទេ ជាលទ្ធផល មនុស្សម្នាក់ៗនឹងត្រូវទទួលបានធនធានតិចទៅៗ។
ទោះជាយ៉ាងណា គេអង្កេតឃើញថា ពីមួយពេលទៅមួយពេល មនុស្សជាតិតែងតែមានលទ្ធភាពរកឃើញនូវវិធីសាស្ត្រថ្មី ដើម្បីប្រើប្រាស់ និងគ្រប់គ្រងធនធានកម្រទាំងអស់នោះ។ ដូច្នេះហើយ លទ្ធភាពរបស់មនុស្សក្នុងការបន្តស្វែងរកវិធីសាស្ត្រថ្មី ត្រូវគេមើលឃើញថាមិនមានដែនកំណត់នោះទេ។
ជាឧទាហរណ៍ នៅក្នុងយុគសំរឹទ្ធ ពោលគឺតាំងពីប្រមាណជាង ៣៣០០ឆ្នាំ ទៅ១២០០ឆ្នាំ មុនគ្រិស្តសករាជ មនុស្សជាតិយើងបានបង្កើតឧបករណ៍ធ្វើពីសំរឹទ្ធ ដែលបានជំនួស ឧបករណ៍ប្រើប្រាស់ និងអាវុធធ្វើពីថ្ម។ របកគំហើញថ្មីនេះបានធ្វើឱ្យជីវិតមនុស្សមានភាពល្អប្រសើរណាស់ អំឡុងសម័យនោះ។
ក្នុងក្របខ័ណ្ឌនេះ គំនិតបានរួមចំណែកយ៉ាងចម្បង ដើម្បីរុញច្រានឱ្យមានកំណើនសេដ្ឋកិច្ច និងភាពរុងរឿង។ ក៏ប៉ុន្តែ តើគំនិត និងការអភិវឌ្ឍសេដ្ឋកិច្ច មានអ្វីពាក់ព័ន្ធនឹងទីក្រុងយក្ស?
តាំងពីអតីតកាល និងបច្ចុប្បន្ន សង្គមអឺរ៉ុប និងសហរដ្ឋអាមេរិក តែងតែជាតំបន់នៃការច្នៃប្រឌិត និងការអភិវឌ្ឍបច្ចេកវិទ្យាចុងក្រោយ។ នៅក្នុងសង្គមទាំងនោះ គុណភាពនៃប្រព័ន្ធស្ថាប័ន បានរុញច្រានឱ្យមានលំហូរគំនិត ដែលជាលទ្ធផល សង្គមទាំងនោះទទួលបាន វប្បធម៌នៃការច្នៃប្រឌិត និងការបង្កើតក្រុមហ៊ុនថ្មីៗ។
ប្រទេសចិន ស្ថិតក្នុងដំណាក់កាលនៃការតាមទាន់ ការអភិវឌ្ឍបច្ចេកវិទ្យាទាំងនេះ។ ក៏ប៉ុន្តែ ហេតុអ្វីបានដំណើរនៃការអភិវឌ្ឍ នៅក្នុងប្រទេសចិន មានល្បឿនលឿនយ៉ាងនេះ? ចម្លើយគឺវាពាក់ព័ន្ធយ៉ាងជិតស្និទ្ធទៅការអភិវឌ្ឍទីក្រុងយក្សនេះឯង។
ប្រជាជនក្នុងចំនួនកាន់តែច្រើន បានផ្លាស់ទីចូលមករស់នៅទីក្រុង និងបាននាំយកមកជាមួយពួកគេ នូវជំនាញ និងគំនិតថ្មីៗ។ កត្តានេះហើយដែលវាបានរុញច្រានឱ្យមានកំណើនសេដ្ឋកិច្ច និងការច្នៃប្រឌិត។
តាមរយៈទីក្រុង មនុស្សបង្កើតទំនាក់ទំនងរវាងគ្នានិងគ្នា និងបានចែករំលែកគំនិតរបស់ពួកគេ។ មនុស្សក្លាយជាមានផលិតភាព យ៉ាងមិនគួរឱ្យជឿ ប្រសិនបើពួកគេមានទំនាក់ទំនងត្រឹមត្រូវ និងធ្វើការរួមគ្នាក្នុងក្រុមណាមួយ ដើម្បីផលិតអ្វីម៉្យាងរួមគ្នា ដែលគ្មាននរណាម្នាក់ ក្នុងចំណោមពួកគេអាចធ្វើបាន ដោយខ្លួនគេម្នាក់នោះទេ។
ក្នុងលក្ខខណ្ឌខ្លះ ទីក្រុងធំៗ បានបង្កើតទំនាក់ទំនងជាមួយប្រជាជាតិផ្សេងៗទៀត។ ឧទាហរណ៍ ទីក្រុងយក្សរបស់ពិភពលោក រួមមាន ទីក្រុងវ៉ាស៊ីនតោន នៃសហរដ្ឋអាមេរិក ទីក្រុងម៉ិកស៊ីកូ នៃប្រទេសម៉ិកស៊ិក ទីក្រុងឡុងដ៍នៃចក្រភពអង់គ្លេស ទីក្រុងប៉ារីសនៃប្រទេសបារាំង ទីក្រុងម៉ាឌ្រីដនៃប្រទេសអេស៉្បាញ ទីក្រុងមូស្គូនៃប្រទេសរុស្សី ទីក្រុងប៉េកាំងនៃប្រទេសចិន ឬទីក្រុងតូក្យូនៃប្រទេសជប៉ុន សុទ្ធតែបានបង្កើតលទ្ធភាពឱ្យ ពលរដ្ឋរស់នៅទីក្រុងរបស់ខ្លួន អាចភ្ជាប់ទំនាក់ទំនងទៅកាន់ទីក្រុងផ្សេងៗទៀត។
ជាលទ្ធផល ទីក្រុងទាំងនោះ បានបង្កើតឱ្យមានក្រុមការងារកាន់តែធំឡើងៗ ហើយល្គឹកណាដែលគេមានក្រុមការងារគ្រប់គ្រាន់ហើយ លទ្ធផលការងារដែលមនុស្សអាចសម្រេចបានពិតជាមិនគួរឱ្យជឿ។
សរុបជារួម ការពង្រីកទីក្រុងឱ្យកាន់តែធំ អាចជាប្រភពយ៉ាងចម្បងនៃការច្នៃប្រឌិត និងកំណើនសេដ្ឋកិច្ច ព្រោះថាទីក្រុងជាទីតាំងនៃទំនាក់ទំនង ការប្រមូលផ្តុំជំនាញ និងគំនិតថ្មីៗ។ ទោះជាយ៉ាងណា ការបង្កើតបរិយាកាសទីក្រុងត្រឹមត្រូវ ដើម្បីធ្វើឱ្យធាតុទាំងអស់នោះអាចសហការគ្នាបាន គឺជាបញ្ហាយ៉ាងចម្បងសម្រាប់រដ្ឋាភិបាលនីមួយៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ