គណបក្សសង្រ្គោះជាតិប្រាប់សមត្ថកិច្ចកុំឲ្យបារម្ភពីយុទ្ធនាការស្លៀកពាក់ខ្មៅ
នៅព្រឹកនេះ គណបក្សសង្រ្គោះជាតិបានប្រកាសតាមសន្និសីទកុំឲ្យសមត្ថកិច្ច មានការព្រួយបារម្ភ ព្រោះគណបក្សសង្រ្គោះជាតិមិនមានផែនការសំដែងមតិតាមរយៈការស្លៀកពាក់ខ្មៅនៅតាមទីសាធារណៈទេ។ ការបញ្ជាក់នេះធ្វើឡើងក្រោយពេលសាលាក្រុងភ្នំពេញស្នើឲ្យគណបក្សសង្រ្គោះជាតិបញ្ឈប់ជាបន្ទាន់រាល់សកម្មភាពពាក់ព័ន្ធនឹងយុទ្ធនាការស្លៀកពាក់ខ្មៅ។
ចុះផ្សាយនៅថ្ងៃ៖
ស្តាប់ - ០២:០៨
លោកយឹម សុវណ្ណ អ្នកនាំពាក្យគណបក្សសង្រ្គោះជាតិ បានបញ្ជាក់ក្នុងសន្និសីទកាសែតថ្ងៃទី១៣ ខែសីហាថា គណបក្សសង្រ្គោះជាតិមិនមានផែនការសំដែងមតិតាមរយៈការស្លៀកពាក់ខោអាវខ្មៅនៅតាមទីសាធារណៈទេ។ លោកយឹម សុវណ្ណក៏បានបញ្ជាក់ទៅអាជ្ញាធរ សមត្ថកិច្ច កុំឲ្យមានការព្រួយបារម្ភ។
លោកបន្ថែមថា កន្លងមកគណបក្សសង្រ្គោះជាតិបានធ្វើតាម និងគោរពតាមឆន្ទៈថ្នាក់ដឹកនាំម្នាក់ៗ ដែលមានបំណងចង់សំដែងមតិ។ សំដែងមតិនេះ មិនមែនជាការគំរាមកំហែងអ្វីទេ គ្រាន់តែសំដែងមតិ ដើម្បីចង់បានការដោះស្រាយបញ្ហា ដោះស្រាយរកយុត្តិធម៌ជូនអ្នករងគ្រោះតែប៉ុណ្ណោះ ។
លោក ឃួង ស្រេង អភិបាលរងរាជធានីភ្នំពេញបានបញ្ជាក់ប្រាប់វិទ្យុបារាំងអន្តរជាតិយ៉ាងខ្លីថា បើគណបក្សសង្រ្គោះជាតិមិនចូលរួមគឺជាការល្អ ដែលគណបក្សនេះគោរពច្បាប់របស់រដ្ឋាភិបាល។
សូមបញ្ជាក់ថាសាលារាជធានីភ្នំពេញ នៅថ្ងៃសុក្រ ទី១២ ខែសីហា បានសរសេរលិខិតមួយផ្ញើជូនលោក កឹម សុខា ប្រធានស្ដីទីគណបក្សសង្គ្រោះជាតិ ដែលលិខិតនោះមានគោលដៅស្នើឲ្យបក្សប្រឆាំងនេះ បញ្ឈប់ជាបន្ទាន់នូវរាល់សកម្មភាពពាក់ព័ន្ធ នឹងយុទ្ធនាការស្លៀកពាក់ពណ៌ខ្មៅ ចាប់ពីពេលនេះតទៅ។
សម្រាប់សាលារាជធានីភ្នំពេញ ការប្រកាសចូលរួមគាំទ្រយុទ្ធនាការស្លៀកពាក់ពណ៌ខ្មៅ ដែលប្រកាសដោយលោក អេង ឆៃអ៊ាង មន្ដ្រីជាន់ខ្ពស់គណបក្សសង្គ្រោះជាតិ កាលពីថ្ងៃចន្ទ ទី៨ ខែសីហា គឺជាការបំផុសញុះញង់ កៀងគរកម្លាំងអង្គការក្រៅរដ្ឋាភិបាល និងប្រជាពលរដ្ឋ ដែលជាទង្វើខុសច្បាប់ បង្កឲ្យមានចលាចល និងមានចរិតផ្ទុយពីគោលការណ៍ណែនាំរបស់ក្រសួងមហាផ្ទៃនិងរដ្ឋាភិបាល។
ដោយឡែកក្រៅពីប្រកាសជុំវិញរឿងយុទ្ធនាការថ្ងៃចន្ទពណ៌ខ្មៅ គណបក្សប្រឆាំងក៏បានប្រកាសថាឈប់ធ្វើសន្និសីទសារព័ត៌មានរាល់ថ្ងៃទៀតហើយ។ ប៉ុន្តែប្រសិនបើមានអ្វី ដែលគណបក្សចង់ជំរាបជូនសាធារណៈមតិជាតិ និងអន្តរជាតិ នោះគណបក្សសង្រ្គោះជាតិនឹងរៀបចំធ្វើសន្និសីទកាសែតទៅតាមតម្រូវការជាក់ស្តែង។ នេះបើតាមលោកយឹម សុវណ្ណ។
ក្រៅពីនេះ គណបក្សប្រឆាំងក៏បានបញ្ជាក់ថាគណៈប្រតិភូ ដែលដឹកនាំដោយលោកប៉ុល ហំម បានរៀបចំពិធីសាសនានៅខេត្តពោធិ៍សាត់។ ពិធីបែបសាសនានេះ ធ្វើឡើងក្នុងគោលបំណងអំពាវនាវឲ្យអ្នកនយោបាយទាំងអស់ចូលរួមដោះស្រាយបញ្ហា ដែលកំពុងមាន ជាពិសេសបញ្ហានយោបាយ និងឲ្យមានការឯកភាពជាតិដើម្បីដឹកនាំប្រទេស។ កន្លងមកគណបក្សនេះ ក៏ធ្លាប់បានធ្វើពិធីសាសនាបែបនេះដែរ នៅក្នុងខេត្តសៀមរាប ក្រោយពេលស្វែងរកការជួបគ្នាជាមួយគណបក្សកាន់អំណាចមិនបានជោគជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ