បក្សប្រជាជនកម្ពុជា និងសង្គ្រោះជាតិ នឹងជួបគ្នានៅថ្ងៃអង្គារសប្តាហ៍ក្រោយនិយាយពីកំណែទម្រង់បោះឆ្នោត
មន្ត្រីជាន់ខ្ពស់គណបក្សប្រជាជនកម្ពុជា និងគណបក្សសង្គ្រោះជាតិ បានជួបគ្នាតាមទូរស័ព្ទសាជាថ្មីម្តងទៀតហើយនៅថ្ងៃសុក្រនេះ នៅក្នុងពេលដែលវិបត្តិនយោបាយនៅកម្ពុជា បានអូសបន្លាយអស់រយៈពេលជាច្រើនខែមក។ ក្នុងជំនួបនេះ គណបក្សជាប់ឆ្នោតទាំងពីរ បានកំណត់ថ្ងៃចរចាសាជាថ្មី នៅថ្ងៃអង្គារសប្តាហ៍ក្រោយ ប៉ុន្តែមិនមែនជាជំនួបមេកំពូលរបស់បក្សនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ថ្ងៃអង្គារទី៥ វិច្ឆិកាសប្តាហ៍ក្រោយនេះ គឺជាថ្ងៃជួបគ្នាសាជាថ្មី រវាងគណបក្សប្រជាជនកម្ពុជា និងគណបក្សសង្គ្រោះជាតិ។ នេះបើតាមលទ្ធផលនៃជំនួបគ្នាតាមទូរស័ព្ទ រវាងលោក ស ខេង និងលោក សមរង្ស៊ី នៅថ្ងៃនេះ។
លោក ស ខេង មន្ត្រីជាន់ខ្ពស់នៃការិយាល័យនយោបាយគណបក្សប្រជាជនកម្ពុជា ដែលជាអ្នកជួបតាមទូរស័ព្ទផ្ទាល់ ជាមួយប្រធានគណបក្សសង្គ្រោះជាតិ លោក សម រង្ស៊ីនោះ បានឱ្យដឹងថា គណបក្សជាប់ឆ្នោតក្នុងសភាទាំងពីរ នឹងបង្កើតក្រុមការងារដែលមានសមាជិក៥នាក់ម្ខាង ជួបជុំគ្នាសាជាថ្មីម្តងទៀត នៅថ្ងៃអង្គារទី៥វិច្ឆិកា សប្តាហ៍ក្រោយនេះ នៅឯវិមានរដ្ឋសភា។
តាមលោក សខេង ដែលជាឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ នៅក្នុងជំនួបនោះ គេនឹងពិភាក្សាគ្នាលើរបៀបវារៈចំនួនបី ពោលគឺ ការកែប្រែ សមាសភាពមេដឹកនាំគណៈកម្មាធិការជាតិរៀបចំការបោះឆ្នោត ការស៊ើបអង្កេតភាពមិនប្រក្រតីនៃការបោះឆ្នោត និងការកែប្រែទម្រង់ប្រព័ន្ធបោះឆ្នោតតាមអនុសាសន៍អង្គការសង្គមស៊ីវិល។
យ៉ាងណាក៏ដោយ ជំនួបដែលគ្រោងធ្វើឡើងនៅថ្ងៃអង្គារសប្តាហ៍ក្រោយនោះ គឺជាជំនួបថ្នាក់អ្នកបច្ចេកទេសតែប៉ុណ្ណោះ។ ពោលគឺមិនមែនជាជំនួបរវាងអនុប្រធានគណបក្សប្រជាជនកម្ពុជា លោកហ៊ុន សែន និងប្រធានគណបក្សសង្គ្រោះជាតិ លោក សម រង្ស៊ី និង លោកកឹម សុខានោះឡើយ។ ភាគីខាងគណកប្សប្រជាជនកម្ពុជា នឹងដឹកនាំដោយលោក ព្រុំ សុខា រដ្ឋលេខាធិការក្រសួងមហាផ្ទៃ។
យ៉ាងណាក៏ដោយ ប្រធានគណបក្សសង្គ្រោះជាតិ លោក សម រង្ស៊ីដែលជាអ្នកចរចាផ្ទាល់បានប្រាប់វិទ្យុបារាំង នៅក្រោយបញ្ចប់ការសន្ទនាថា គណបក្សសង្គ្រោះជាតិនឹងរង់ចាំមើលលទ្ធផលនៃការជំនួបថ្ងៃអង្គារសប្តាហ៍ក្រោយនេះសិន មុននឹងសម្រេចថាចូលទៅកាន់តំណែងក្នុងសភាឬអត់។
គួររំលឹកថា នៅមុនការជួបគ្នានៅថ្ងៃទី១វិច្ឆិការនេះ គណបក្សសង្គ្រោះជាតិរបស់លោក សម រង្ស៊ី និងលោក កឹម សុខា កាលពីថ្ងៃម្សិលមិញ បានធ្វើសន្និសីទកាសែតមួយ ដើម្បីបង្ហាញពីឆន្ទៈនៃការបន្ទន់ជំហររបស់ខ្លួនដើម្បីបើកឱកាសឱ្យមានការជួបចរចាសាជាថ្មីជាមួយបក្សប្រជាជនកម្ពុជា។
សម្រាប់លោក សម រង្ស៊ី និងលោក ស ខេង ការជួបចរចានៅសប្តាហ៍ក្រោយរវាងគណបក្សទាំងពីរ គឺជាពន្លឺដើម្បីឈានទៅបិទបញ្ចប់វិបត្តិនយោបាយក្នុងអាណត្តិទី៥នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ