បក្សប្រឆាំងប្រារព្ធទិវាសិទ្ធិមនុស្សដើម្បីទាមទារសិទ្ធិពេញលេញក្នុងការជ្រើសរើសអ្នកដឹកនាំ
ដូចការគ្រោងទុកគណបក្សសង្គ្រោះជាតិបានប្រារព្ធទិវាសិទ្ធិមនុស្សថ្ងៃ១០ធ្នូក្នុងរាជធានីភ្នំពេញនៅពេលព្រឹក និងនៅខេត្តសៀមរាបនៅពេលរសៀល។ប្រធានបទដែលគណបក្សប្រឆាំងលើកឡើងគឺការទាមទារសិទ្ធិពេញលេញក្នុងការជ្រើសរើសមេដឹកនាំ។ នៅភ្នំពេញក៏ដូចជានៅសៀមរាបដែរ គណបក្សប្រឆាំងបានដង្ហែក្បួនមុននឹងមានការជួបជុំគ្នាសម្តែងមតិ។ ការដង្ហែក្បួនប្រព្រឹត្តទៅដោយគ្មានអំពើហិង្សាទេទោះបីជាអាជ្ញាធរមិនអនុញ្ញាតក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
បន្ទាប់ពីបានប្រារព្ធទិវាសិទ្ធិមនុស្ស១០ធ្នូនៅទីក្រុងភ្នំពេញរួចហើយ មេដឹកនាំគណបក្សសង្គ្រោះជាតិគឺ លោក សម រង្ស៊ី និងលោកកឹម សុខា ក៏បានទៅចូលរួមប្រារព្ធទិវាដូចគ្នានេះដែរនៅក្នុងខេត្តសៀមរាប។ ពិធីជួបជុំរបស់គណបក្សប្រឆាំងបានធ្វើឡើងនៅឯតំបន់អង្គរឃ្យុងយូរដោយមានមនុស្សចូលរួមច្រើនម៉ឺននាក់។
លោក ហូ វ៉ាន់ តំណាងរាស្ត្រគណបក្សសង្គ្រោះជាតិបានប្រាប់វិទ្យុបារាំងអន្តរជាតិថាបន្ទាប់ពីពិធីជួបជុំ អ្នកគាំទ្រគណបក្សសង្គ្រោះជាតិទាំងអស់ដឹកនាំដោយលោក សម រង្ស៊ី និងលោក កឹម សុខាបានដើរហែក្បួនកាត់តាមដងផ្លូវនានាក្នុងខេត្តសៀមរាបដោយមានមនុស្សចូលរួមយ៉ាងកកកុញ។ ក្បួនដង្ហែនេះបានបញ្ចប់នៅពីមុខទីសក្ការៈព្រះអង្គចេកព្រះអង្គចម។
កាលពីព្រឹកមិញ គណបក្សសង្គ្រោះជាតិក៏បានប្រារព្ធពិធីដង្ហែក្បួន និងជួបជុំគ្នានៅទីក្រុងភ្នំពេញផងដែរ។ នៅភ្នំពេញ ក្បួនដង្ហែរបស់គណបក្សសង្គ្រោះជាតិមានដល់ទៅបីខ្សែ។ ខ្សែទី១ ហែចេញពីទីស្នាក់ការគណបក្សនៅចាក់អង្រែ ដឹកនាំដោយលោក សមរង្ស៊ី ។ ខ្សែទី២ ហែចេញពីទីស្នាក់ការគណបក្សសង្គ្រោះជាតិខណ្ឌទួលគោក ដឹកនាំដោយលោក កឹម សុខា និងខ្សែទី៣ ហែចេញពីមុខឃ្លាំងសាំង ឫស្សីកែវ ដឹកនាំដោយលោកស្រី មូរ សុខហួរ។ ក្បួនទាំងបីបានទៅជួបគ្នានៅទីលានប្រជាធិបតេយ្យ។
ទិវាសិទ្ធិមនុស្ស របស់គណបក្សសង្គ្រោះជាតិធ្វើឡើងក្រោមប្រធានបទ យើងទាំងអស់គ្នា ទាមទារសិទ្ធិពេញលេញដើម្បីជ្រើសរើសអ្នកដឹកនាំ។ តាមរយៈប្រធានបទនេះ លោក សម រង្ស៊ី និងលោក កឹម សុខា បានថ្លែងទៅកាន់អ្នកគាំទ្រដោយទាមទាររកយុត្តិធម៌សម្រាប់ការបោះឆ្នោត។ វេទិកាសិទ្ធិមនុស្សរបស់គណបក្សសង្គ្រោះជាតិក៏ជាឱកាសដែលអ្នកចូលរួម ថ្លែងទាមទារឲ្យមានការផ្លាស់ប្តូរនាយករដ្ឋមន្ត្រីផងដែរ។
ផ្សារភ្ជាប់ទៅនឹងបរិបទពិភពលោក លោក សម រង្ស៊ី ក៏បានលើកសរសើរវីរៈភាពរបស់លោក Nelson Mandela អតីតប្រធានាធិបតីអាហ្វ្រិកខាងត្បូង ដែលទើបតែចូលមរណភាពកាលពីថ្ងៃទី៥ធ្នូ ។ លោកសម រង្ស៊ី អះអាងថា គណបក្សសង្គ្រោះជាតិ ដើរតាមគន្លងរបស់លោក Nelson Mandela ដើម្បីឲ្យកម្ពុជាទទួលបានលទ្ធិប្រជាធិបតេយ្យប្រកបដោយភាតរភាព ដូច នៅអាហ្វ្រិកខាងត្បូងដែរ។
បន្ទាប់ពីនេះទៅ គណបក្សសង្គ្រោះជាតិគ្រោងធ្វើបាតុកម្មជារៀងរាល់ថ្ងៃអាទិត្យនៅទីលានប្រជាធិបតេយ្យ ទីក្រុងភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ