ក្រុមអ្នកមុជទឹកស្រង់បានសាកសព១៩ នាក់ ក្នុងសាឡាងដែលបានលិចថ្ងៃ១៦មេសា
នៅកូរ៉េខាងត្បូង ថ្ងៃអាទិត្យនេះ ក្រុមអ្នកមុជទឹកបានស្រង់សាកសពអ្នកដំណើរ១៦នាក់ ដែលរងគ្រោះក្នុងគ្រោះថ្នាក់លិចសាឡាង នៅតាមឆ្នេរខាងត្បូងប្រទេស កាលពីថ្ងៃពុធ១៦មេសា កន្លងទៅ។ ថ្ងៃអាទិត្យនេះដែរ សមាជិកក្រុមគ្រួសារអ្នករងគ្រោះជិត២០០នាក់ បាននាំគ្នាតវ៉ាប្រឆាំងនឹងភាពយឺតយ៉ាវរបស់អាជ្ញាធរ ក្នុងការជួយសង្គ្រោះអ្នកដំណើរក្នុងសាឡាង។ សកម្មភាពតវ៉ាបានបង្កជាការប៉ះទង្គិចជាមួយប៉ូលិស។ យោងតាមតុល្យការចុងក្រោយ ជនរងគ្រោះស្លាប់ក្នុងហេតុការណ៍លិចសាឡាងមានចំនួន៥៨នាក់ ហើយ២៤៤នាក់ទៀត កំពុងបាត់ខ្លួននៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
នៅថ្ងៃសៅរ៍ម្សិលមិញ ក្រុមអ្នកមុជទឹកបានបំបាក់បង្អួចសាឡាង ដើម្បីយកសាកសព៣នាក់ចេញពីសាឡាង ហើយនៅថ្ងៃអាទិត្យនេះ ពួកគេបានយកសាកសពដែលសេសសល់ ចេញបន្ថែមទៀត។ ទម្រាំរកបានឃើញសាកសពទាំងនេះ ក្រុមអ្នកមុជទឹក៥០០នាក់ ត្រូវការពេលវេលាច្រើនថ្ងៃ ព្រោះថា ចរន្តទឹកហូរខ្លាំង ហើយ ពួកគេពិបាកនឹងមើលឃើញក្នុងទឹកណាស់។
គួររំលឹកថា សាឡាងដែលលិចកាលពីថ្ងៃពុធ ដឹកមនុស្ស៤៧៦នាក់ ក្នុងនោះមានសិស្សវិទ្យាល័យនិងគ្រូបង្រៀន៣៣៩នាក់ មកពីសាលារៀនជាយក្រុងសេអ៊ូល មួយកន្លែងឈ្មោះថា អាន់សាន។ ម្សិលមិញ អាជ្ញាធរបានចាប់ខ្លួនកាពីទែនសាឡាង គឺលោក លី យ៉ុងសឹក និងក្រុមការងារកាពីទែននេះ ២រូបទៀតផងដែរ។ កាពីទែនលី យ៉ុងសឹក ជាប់ចោទពីបទធ្វេសប្រហែស និងរំលោភច្បាប់សមុទ្រដោយសាររត់ចោលសាឡាងដែលកំពុងរងគ្រោះ។
នៅថ្ងៃអាទិត្យនេះ សមាជិកក្រុមគ្រួសារជនរងគ្រោះរាប់រយនាក់ បាននាំគ្នាធ្វើការតវ៉ាប្រឆាំងនឹងភាពយឺតយ៉ាវរបស់អាជ្ញាធរក្នុងប្រតិបត្តិការចុះទៅសង្គ្រោះអ្នកដំណើរក្នុងសាឡាង។ ក្នុងសកម្មភាពតវ៉ានេះ ពួកគេបាននាំគ្នាដើរចេញពីកោះជីនដូ ដែលស្ថិតនៅក្បែរកន្លែងកើតហេតុ សំដៅឆ្ពោះទៅក្រុងសេអ៊ូល។ ប៉ុន្តែ ប៉ូលិសទទួលបន្ទុកទប់ស្កាត់កុប្បកម្ម បានហាមឃាត់ក្បួនដង្ហែរបស់ពួកគេ ធ្វើអោយមានជម្លោះកើតឡើង។
ប្រធានាធិបតីកូរ៉េខាងត្បូង ប៉ាក់ គុនហឺ បានធានាអះអាងថា មិនអោយម៉ាស៊ីនស្ទូច ស្ទូចយកបំណែកសាឡាងចេញទេ ដរាបណាគេនៅមិនទាន់រុករកសាកសពក្នុងសាឡាងអោយបានរួចរាល់ គ្រប់កន្លែងនោះ។ គ្រួសារជនរងគ្រោះមានការយល់ផ្ទុយគ្នាលើការមិនស្ទូចយកបំណែកសាឡាងចេញនេះ។ អ្នកខ្លះយល់ថា ដោយសារការរង់ចាំរកអោយឃើញនូវគ្រប់សាកសពជនរងគ្រោះ ក្តីសង្ឃឹមថា ជនរងគ្រោះមួយចំនួនអាចនៅមានអាយុជីវិតនោះ នឹងផុតរលត់ទៅវិញបាន។ អ្នកខ្លះទៀតយល់ថា ការដែលមិនទាន់ស្ទូចយកបំណែកសាឡាងនេះ អាចជួយមិនអោយខូចសាកសព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ