អំពើពុករលួយកំពុងប្រមូលផ្តុំនៅលើអ្នករត់ការ
ចុះផ្សាយនៅថ្ងៃ៖
ស្តាប់ - ០៤:១៣
កម្ពុជាកំពុងព្យាយាមប្រយុទ្ធប្រឆាំងអំពើពុករលួយ ដែលបានចាក់ឫសយ៉ាងជ្រៅ និងបានក្លាយជាវប្បធម៌មួយ នៅក្នុងប្រទេសនេះទៅហើយ។ នៅពេលដែលមានវិធានការកំចាត់អំពើពុករលួយដែលវាបានបង្ហាញអំពីប្រសិទ្ធភាពខ្លះៗហើយនោះ រូបភាពនៃការប្រព្រឹត្តអំពើពុករលួយ ក៏បានផ្លាស់ប្តូរពីការប្រព្រឹត្តដោយចំហរ មកជាការត្បិតត្បៀត លាក់កំបាំងក្នុងទម្រង់ផ្សេងៗគ្នា។ ប៉ុន្តែរូបភាពមួយដែលនៅចំហរដដែលនោះ គឺទិដ្ឋភាពរត់ការឯកសារ នៅតាមស្ថាប័នរដ្ឋនានា។ រូបភាពរត់ការ ដែលគេហៅថា «ឈ្មួញកណ្តាល» នេះហើយ ដែលធ្វើអោយប៉ះពាល់ដល់ប្រសិទ្ធភាពការងារ មានភាពអយុត្តិធម៌ និងគ្មានតម្លាភាព នៅក្នុងការងារបម្រើសេវារបស់រដ្ឋនោះ។ បើឈ្មួញកណ្តាលក្រៅផ្លូវការនៅតែមាន អំពើពុករលួយក៏តែមាន។
អង្គភាពប្រឆាំងអំពើពុករលួយកំពុងបន្តអនុវត្តន៍បេសកកម្មរបស់ខ្លួន។ ក្នុងរយៈពេលចុងក្រោយនេះ គេឃើញសេចក្តីប្រកាសព័ត៌មានរបស់អង្គភាពប្រឆាំងអំពើពុករលួយ ដែលផ្សាយអំពីការកោះហៅមន្ត្រីតាមខេត្តមកសាកសួរ និងចាប់ខ្លួនក្នុងបណ្តឹងពាក់ព័ន្ធនឹងអំពើពុករលួយ។ ការអនុវត្តន៍ច្បាប់ដ៏រសើបមួយនេះ បានធ្វើអោយមន្ត្រីដែលធ្លាប់តែប្រព្រឹត្តអំពើពុករលួយ ខ្លាចរអា និយាយដោយឡែក និងបានធ្វើអោយស្ថាប័នរដ្ឋនានារៀបចំរបៀបធ្វើការងារប្រកបដោយតម្លាភាព និងគណនេយ្យភាពឡើងវិញ និយាយជារួម ដោយសារតែវាជាគោលនយោបាយកំណែទម្រង់របស់រដ្ឋាភិបាលផង។
ប៉ុន្តែ គេហាក់បានមើលរំលង ទិដ្ឋភាពពុករលួយដែលកំពុងកើតនៅក្បែរក្លៀក នៅតាមស្ថាប័ន។ នោះគឺសេវាឈ្មួញកណ្តាល។ អ្នកធ្វើការងារនេះ ពេលខ្លះជាមន្ត្រីផ្ទាល់តែម្តង ហើយពេលខ្លះក៏ជាអ្នកដែលមន្ត្រីស្គាល់ស្និទ្ធ ហើយក៏អនុញ្ញាតអោយនៅចាំរត់ការបំពេញឯកសារនានាសម្រាប់ពលរដ្ឋ ដែលសុខចិត្តចំណាយថវិកា។ បន្ទាប់មក ពួកគេក៏បែងចែកលាភសក្តារៈគ្នាជាមួយមន្ត្រី។
សព្វថ្ងៃនេះ ប្រសិនបើពលរដ្ឋទៅធ្វើស្លាកលេខរថយន្ត ឬស្លាកលេខម៉ូតូនោះ គេកម្រឃើញពលរដ្ឋតម្រង់ជួរ ដើម្បីបំពេញពាក្យស្នើសុំដោយខ្លួនឯងណាស់។ គ្រាន់តែចុះពីរថយន្ត ឬពីម៉ូតូភ្លាម គេដឹងថា ត្រូវទៅរកអ្នកណាហើយ។ ភាគច្រើន គឺជាមន្ត្រីក្នុងស្ថាប័ននោះតែម្តង ដែលរត់ការបំពេញសំណុំបែបបទ ស្នើសុំធ្វើស្លាកលេខ។ ប្រសិនបើពលរដ្ឋចង់ធ្វើសៀវភៅគ្រួសារ ប៉ូលិសប៉ុស្ត៍នឹងអាចនិយាយយ៉ាងតឹងតែងថា ពិបាកធ្វើ មន្ត្រីរវល់ច្រើន។ ប៉ុន្តែ ប្រសិនបើគេ ប្រគល់អោយមន្ត្រីប៉ូលិសណាម្នាក់រត់ការតែម្តងនោះ វាក្លាយទៅជារឿងផ្សេង ហើយងាយស្រួលទៅវិញ។
នៅកន្លែងធ្វើលិខិតឆ្លងដែនវិញ មិនមែនថាគ្មានច្រកចេញចូលរបស់រដ្ឋនោះទេ។ ពលករដែលមានប្រាក់ត្រឹមតែធ្វើលិខិតឆ្លងដែន ត្រូវបំពេញឯកសារខ្លួនឯងយ៉ាងច្រើន និងត្រូវតម្រង់ជួរចាំគ្នាជាបន្តបន្ទាប់ យ៉ាងយូរ។ ប៉ុន្តែសម្រាប់អ្នកមានប្រាក់កាសវិញ គេគ្រាន់តែដើរតម្រង់ការិយាល័យរបស់មន្ត្រីណាម្នាក់ មន្ត្រីនោះនឹងបំពេញឯកសារជូន ហើយធ្វើតាមនីតិវិធីយ៉ាងលឿនទៀតផង។ គ្រាន់តែថា គេត្រូវបង់ថវិកាថ្លៃជាងតម្លៃធម្មតាប៉ុណ្ណោះ។ សេវារត់ការ មាននៅច្រើនកន្លែងទៀត ក្នុងទ្រង់ទ្រាយតូច ឬធំតែប៉ុណ្ណោះ។
តើសេវារត់ការ ដែលប្រព្រឹត្តដោយមន្ត្រីផងនោះ ផ្តល់ផលវិបាកអ្វីខ្លះ?
ទី១- ការដែលអនុញ្ញាតអោយមានសេវាក្រៅផ្លូវការយ៉ាងនេះ វាមិនខុសអ្វីពីការបង្កើតអោយមានស្តង់ដារការងារពីរ ហើយវាបានបង្កើតអោយមានភាពអយុត្តិធម៌ រវាងអ្នកទៅរកសេវានោះ។ បានន័យថា អ្នកមានប្រាក់នៅតែមានអាទិភាព ជាងអ្នកគ្មានប្រាក់ ហើយទីបំផុតទៅ ការរិះគន់នឹងធ្លាក់ទៅលើរដ្ឋ។
ទី២- ដោយសារតែការយកលុយពីអតិថិជននេះហើយបានជាមន្ត្រីត្រូវខំធ្វើការងារ ដើម្បីអោយអតិថិជនផ្តល់លុយអោយពួកគេ ហើយពួកគេក៏ទុកចោលការងាររបស់ពលរដ្ឋធម្មតា។ តើប្រសិទ្ធភាពការងារនៅត្រង់ណា?
ទី៣- ការអនុញ្ញាតអោយមានមន្ត្រីរត់ការបែបនេះ វាក៏ជាការផ្តល់ឱកាសអោយមន្ត្រីប្រព្រឹត្តអំពើពុករលួយនេះឯង។
កន្លងមក ក៏ធ្លាប់មានមន្ត្រីនិយាយបន្ទោសពលរដ្ឋវិញថា មិនចេះធ្វើការងារដោយខ្លួន ហើយក៏ចង់តែប្រញាប់ទើបជួលមន្ត្រីអោយរត់ការ។ តាមពិតទៅ អ្វីដែលត្រូវនិយាយគ្នាត្រង់នេះ គឺថា តើរដ្ឋឬមន្ត្រីចង់បញ្ចប់សេវាឈ្មួញកណ្តាលរត់ការឯកសារ ដែលជាជម្រកនៃអំពើពុករលួយ ឬមិនចង់បញ្ចប់ទេ? បន្ទាប់មកទៀត ដើម្បីសំរួលពលរដ្ឋក្នុងការមករកសេវារបស់រដ្ឋ នៅតាមស្ថាប័ននានា ច្រកចេញចូលតែមួយ គឺជាមធ្យោបាយដ៏មានប្រសិទ្ធភាព។
ទន្ទឹមគ្នានេះ ប្រជាពលរដ្ឋក៏ត្រូវចូលរួមចំណែកក្នុងការកសាង ភាពស្អាតស្អំក្នុងសង្គមខ្មែរនេះដែរ តាមរយៈការបញ្ឈប់រកសេវារត់ការទាំងនេះ។ ប្រជាពលរដ្ឋក៏គួរតែសាកល្បងអនុវត្តសិទ្ធិរបស់ខ្លួន ដែលខ្លួនត្រូវទទួលបាន ខណៈដែលរដ្ឋាភិបាលកម្ពុជាកំពុងចាប់ផ្តើមធ្វើកំណែទម្រង់ស៊ីជម្រៅនោះ។ ពលរដ្ឋត្រូវហ៊ានតវ៉ា និងប្តឹងមន្ត្រីពុករលួយ។ រីឯមន្ត្រីវិញ ក៏គួរតែយល់ថា កំណែទម្រង់មានតម្លៃធំធេង ធ្ងន់ជាងមន្ត្រីដែលប្រព្រឹត្តអំពើពុករលួយ ដែលធ្វើអោយអោយរដ្ឋាភិបាលបាត់បង់កិត្តិយស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ