គណបក្សប្រជាជននិងសង្គ្រោះជាតិជួបគ្នាដើម្បីជជែករកដំណោះស្រាយ
ស្ថានការណ៍នយោបាយហាក់បានឈានទៅរកភាពធូរស្រាលបន្តិចឡើងវិញហើយ នៅពេលនេះ។ គណបក្សប្រជាជនកម្ពុជា និងគណបក្សសង្គ្រោះជាតិបានយល់ព្រមអង្គុយទល់មុខគ្នាដើម្បីជជែកគ្នារកដំណោះស្រាយ។ នៅព្រឹកមិញនេះ ក្រុមការងារគណបក្សទាំងពីរដែលមានសមាភាព៣នាក់មកពីគណបក្សនីមួយៗ បានជួបគ្នាដើម្បីរកច្រកចេញពីវិបត្តិក្រោយការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
គណៈកម្មការចម្រុះចំពោះកិច្ចរវាងគណបក្សប្រជាជនកម្ពុជា និងគណបក្សសង្គ្រោះជាតិ អាចនឹងលេចរូបរាងសាជាថ្មីហើយ បន្ទាប់ពីមន្ត្រីជាន់ខ្ពស់គណបក្សទាំងពីរបានជួបប្រជុំគ្នានៅព្រឹកថ្ងៃសុក្រ ៩ សីហានេះ នៅវិមានរដ្ឋសភា។
កិច្ចប្រជុំនៅព្រឹកថ្ងៃសុក្រ៩សីហានេះ មានសមាសភាព៣នាក់មកពីគណបក្សម្ខាងៗ គឺលោក ជាម យៀប លោក ព្រុំ សុខា និង លោក អ៊ុក គឹមហាន មកពីគណបក្សប្រជាជនកម្ពុជា និងលោក សុន ឆ័យ លោក គួយ ប៊ុនរឿន និងលោក យ៉ែម បុញ្ញឫទ្ធិ មកពីគណបក្សសង្គ្រោះជាតិ។
ក្រោយពីកិច្ចប្រជុំរយៈពេលជាងពីរម៉ោង លោកយ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានប្រាប់វិទ្យុបារាំងអន្តរជាតិថា គណបក្សទាំងពីរបានសម្រេចបង្កើតគណៈកម្មការចម្រុះចំពោះកិច្ច ដែលនឹងដោះស្រាយភាពមិនប្រក្រតីនៃការបោះឆ្នោតនីតិកាលទី៥នេះ។
អ្នកនាំពាក្យរូបនេះ បានបន្តថា បើទោះបីជាមិនទាន់មានការសម្រចជាក់លាក់ណាមួយក៏ដោយ តែជាគោលការណ៍ ក្រៅពីសមាសភាពមកពីគណបក្សនយោបាយទាំងពីរ ក៏មានដែរតំណាងអង្គការសហប្រជាជាតិជាអ្នកអង្កេតការណ៍ អង្គការសង្គមស៊ីវិលជាអ្នកជំនួយផ្នែកបច្ចេកទេស ធ្វើរបាយការណ៍ និងផ្តល់អនុសាសន៍ដល់គណបក្សនយោបាយទាំងពីរ។ គណបក្សទាំងពីរដែលគ្រោងបើកកិច្ចប្រជុំជាមួយគ្នាម្តងទៀតក្នុងពេលឆាប់ៗនេះ។
គួរកត់សម្គាល់ថា ការឈានដល់ការបើកកិច្ចប្រជុំរវាងគណបក្សកាន់អំណាច និងគណបក្សប្រឆាំងនៅថ្ងៃនេះ បានកើតឡើងបន្ទាប់ពីប្រធានគណបក្សសង្គ្រោះជាតិ លោក សម រង្ស៊ី បានបន្ទន់ឥរិយាបថរបស់ខ្លួនដោយស្នើអង្គការសហប្រជាជាតិត្រឹមជាអ្នកអង្កេតការណ៍ក្នុងគណៈកម្មការចម្រុះតែប៉ុណ្ណោះ។ លោក កឹម សុខា ប្រធានស្តីទីគណបក្សសង្គ្រោះជាតិបានពន្យល់ថា ការបន្ទន់ឥរិយាបថរបស់គណបក្សសង្គ្រោះជាតិនេះ គឺជាការសម្របសម្រួលដើម្បីបន្ធូរភាពតានតឹងនយោបាយ និងបានកើតចេញពីការជជែកគ្នារវាងគណបក្សទាំងពីរ ។
ជំនួបនេះក៏បានកើតឡើងស្របពេលដែលគណៈកម្មាធិការជាតិរៀបចំការបោះឆ្នោត គ.ជ.ប បានកោះហៅគណបក្សប្រជាជកម្ពុជា និងគណបក្សសង្គ្រោះជាតិ ឱ្យចូលរួមប្រជុំបង្កើត គណៈកម្មការពិសេសមួយ សម្រាប់ដោះស្រាយភាពមិនប្រក្រតីក្នុងថ្ងៃបោះឆ្នោតនីតិកាលទី៥នេះ។
កិច្ចប្រជុំរវាងគណបក្សប្រជាជនកម្ពុជា និងគណបក្សសង្គ្រោះជាតិ នៅព្រឹកមិញនេះ គឺជាសញ្ញាណជាវិជ្ជមានមួយ ឈានទៅរកការបង្កើតគណៈកម្មការចម្រុះដើម្បីអង្កេតលើភាពមិនប្រក្រតីនៃការបោះឆ្នោត ដែលជាដើមចមនៃវិបត្តិនយោបាយនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ