ទៀបកោះគ្រីមេ ប្រែក្លាយជា ដីគោកពេញសិទ្ធិ របស់សហព័ន្ធរុស្ស៊ី
ចុះផ្សាយនៅថ្ងៃ៖
ស្តាប់ - ០៦:៤០
ក្នុងសប្តាហ៍នេះ ថ្ងៃទី២៣ធ្នូ ក្រុងម៉ូស្គូ បានសម្ពោធដាក់ឲ្យដំណើរការ ស្ពានរថភ្លើង ដែលភ្ជាប់ភាគខាងត្បូងនៃដីគោក សហព័ន្ធ រុស្ស៊ី ទៅនឹង ទៀបកោះគ្រីមេ។ មួយឆ្នាំកន្លះមុន ក៏មានការសម្ពោធដាក់ឲ្យដំណើរការទៅហើយ ស្ពានរថយន្ដ ភ្ជាប់គ្រីមេចូលខ្លួនមកក្នុងសហព័ន្ធនេះជាថ្មីវិញ កាលក្នុងឆ្នាំ ២០១៤។ ទាំងនេះ ចំពោះរុស្ស៊ី គឺមានន័យជា ប្រវត្តិសាស្ត្រឥតប្រកែកបាន។
ដ្បិតចាប់ពីអំណឹះតទៅ គ្រីមេតាមរយៈស្ពានទាំងពីរនេះ ក្លាយជាដីគោក ដូច ដីគោកដ៏ល្វឹងល្វើយឯទៀត របស់មហាប្រទេសរុស្ស៊ីអ៊ីចឹង។ ពិធីសម្ពោធចរាចរណ៍រថភ្លើង ក៏ដូចជា ចរាចរណ៍រថយន្ដ តាមស្ពានទាំងពីរនេះ សុទ្ធតែបានប្រព្រឹត្តទៅ ក្រោមអធិបតីភាព ប្រមុខរដ្ឋរុស្ស៊ី វ៉្លាឌីមៀរ ពូទីន ផ្ទាល់។ លោកសង្កត់ធ្ងន់ថា «ហេដ្ឋារចនាសម្ព័ន្ធ បែបយ៉ាង ស្ពានដ៏អស្ចារ្យនេះ ដែលរុស្ស៊ី ចេះសង់បានដោយខ្លួនឯង ទាំងស្ថិតនៅក្រោមគំនាបទណ្ឌកម្មបស្ចិមលោក នឹងជះ ឥទ្ធិពលវិជ្ជមាន ទៅ លើ សេដ្ឋកិច្ចជាតិ ទាំងមូល»។
ចំណែកអ៊ុយក្រែន ដែលនៅតែបន្តចាត់ទុកគ្រីមេជា ទឹកដីខ្លួន បានកសាងសំណុំរឿងព្រហ្មទណ្ឌ ទល់នឹងរុស្ស៊ី ដោយមកពីមានរថភ្លើងរុស្ស៊ី មួយក្បួនដំបូង បានបើកឆ្លងកាត់ ស្ពាននេះ ចូលទៅក្នុង ទៀបកោះគ្រីមេ បានន័យថា ឆ្លងកាត់ព្រំប្រទល់អ៊ុយក្រែន ដោយខុសច្បាប់។
ចម្លើយរបស់រដ្ឋបាលម៉ូស្គូ គឺថា ស្ពាននេះសង់ឡើង ដោយត្រឹមត្រូវតាមច្បាប់ ពីព្រោះគ្រីមេអស់៥ ឆ្នាំមកហើយ ក្លាយជា ទឹកដីរុស្ស៊ីសាឡើងវិញ ស្របនឹងលទ្ធផលប្រជាមតិអ្នកស្រុករស់នៅលើទឹកដីនោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ