អាហ្សង់ទីនប្តឹងអាមេរិកទៅតុលាការយុត្តិធម៌អន្តរជាតិ
ចុះផ្សាយនៅថ្ងៃ៖
ស្តាប់ - ០៥:១៤
ជម្លោះ ប្តឹងផ្តល់នៅមិនទាន់ចប់រវាងតុលាការក្រុងញូវយ៉ក និងរដ្ឋាភិបាលអាហ្សង់ទីន។ នៅថ្ងៃសុក្រ កន្លងទៅ ចៅក្រមញូវយ៉កដែលបានសម្រេចបញ្ជាឲ្យប្រទេសអាហ្សង់ទីនសងបំណុលទាំងអស់ទៅក្រុមហ៊ុនអាមេរិកពីរ បានព្រមានថា នឹងចាត់វិធានការធ្ងន់ជាងនេះប្រឆាំងទីក្រុងប៊ុយណូស៊ែរ ប្រសិនបើ អាហ្សង់ទីនមិនព្រមឈប់ចេញព័ត៌មានខុស និងបោកប្រាស់។ ដោយសារសាលក្រមរបស់តុលាការញូវយ៉ក រដ្ឋាភិបាលអាហ្សង់ទីន កាលពីថ្ងៃព្រហស្បតិ៍ បានដាក់ពាក្យប្តឹងអាមេរិកទៅតុលាការយុត្តិធម៌អន្តរជាតិ។
នៅក្នុងពាក្យបណ្តឹងរបស់ខ្លួនទៅតុលាការយុត្តិធម៌អន្តរជាតិ អាហ្សង់ទីនចង់សុំឲ្យតុលាការរបស់អង្គការសហប្រជាជាតិចោទប្រកាន់ សហរដ្ឋអាមេរិកពីបទរំលោភដែនអធិបតេយ្យភាព និងអភ័យឯកសិទ្ធិតុលាការរបស់ប្រទេសអាហ្សង់ទីន។ អាហ្សង់ទីនបានដាក់ពាក្យប្តឹងសហរដ្ឋអាមេរិកនៅថ្ងៃព្រហស្បតិ៍ គឺនៅមួយថ្ងៃក្រោយតុលាការក្រុងញូវយ៉កបានចេញបញ្ជាមិនឲ្យអាហ្សង់ទីន ប្រើប្រាស់ទីភ្នាក់ងារហិរញ្ញវត្ថុនៅទីក្រុងញូវយ៉កដើម្បីសង ប្រាក់បំណុលទៅក្រុមហ៊ុនដទៃទៀត។
នៅខែកក្កដា កន្លងទៅ តុលាការញួវយ៉កធ្លាប់ចេញសាលក្រមថា បើអាហ្សង់ទីនមិន សងប្រាក់បំណុល១០០ភាគរយទៅឲ្យក្រុមហ៊ុនអាមេរិកពីររដែលធ្លាប់ជា ម្ចាស់បំណុលរបស់អាហ្សង់ទីនទេ អាហ្សង់ទីនមិនអាចប្រើប្រព័ន្ធហិរញ្ញវត្ថុ និងប្រព័ន្ធធនាគារអាមេរិក ដើម្បីសងម្ចាស់បំណុលផ្សេងទៀតបានទេ។ សេចក្តីសម្រេចរបស់តុលាការក្រុងញូវយ៉កបានធ្វើឲ្យអាហ្សង់ទីនខកខាន មិនអាចគោរពករណីយកិច្ចរបស់ខ្លួន ពោល គឺអាហ្សង់ទីនមិនអាចសងទាន់ពេលវេលាទឹកប្រាក់ប្រមាណ៥៣៩លានដុល្លារ ទៅម្ចាស់បំណុល ដែលធ្លាប់សុខចិត្តកាត់បន្ថយបំណុលជាង៧០ភាគរយ ហើយនៅសល់៣០ភាគរយដែលអាហ្សង់ទីនបានសន្យាសងរហូតដល់ឆ្នាំ ២០៣៣។
សូមរំលឹកឡើងវិញបន្តិចថា ដោយសារតែវិបត្តិក្ស័យធន នៅឆ្នាំ ២០០១ អាហ្សង់ទីនបានចរចាជាមួយម្ចាស់បំណុលដែលជាង៩០ភាគរយបានសុខចិត្តកាត់បន្ថយបំណុល៧០ភាគរយជាមួយអាហ្សង់ទីន។ ប៉ុន្តែ នៅមានម្ចាស់បំណុល១០ភាគរយដែលមិនសុខចិត្ត និងទាមទារឲ្យរដ្ឋាភិបាលអាហ្សង់ទីនសងខ្លួនវិញ ១០០ភាគរយ។ ក្នុងចំណោមម្ចាស់បំណុលទាំងនោះ មានក្រុមហ៊ុនអាមេរិកពីរដែលបានប្តឹងទៅតុលាការញូវយ៉ក ដែល១៣ឆ្នាំក្រោយ បានកាត់ក្តីឲ្យក្រុមហ៊ុនអាមេរិកទាំងពីរឈ្នះ និងបានតម្រូវឲ្យរដ្ឋអាហ្សង់ទីនសងប្រាក់បំណុល១០០ភាគរយ។
តាមតុលាការញូវយ៉ក អាហ្សង់ទីនអាចសងបំណុលទៅក្រុមហ៊ុនទាំងពីរដែលជាម្ចាស់ដើមបណ្តឹង ប៉ុន្តែ អាហ្សង់ទីនមិនចាំបាច់ត្រូវសងបំណុល១០០ភាគរយទៅក្រុមហ៊ុនផ្សេងទេ ដរាបណាក្រុមហ៊ុនមិនប្តឹងឲ្យអាហ្សង់ទីនសងបំណុល១០០ភាគរយនោះ។ ប៉ុន្តែ អាហ្សង់ទីននៅតែបដិសេធមិនទទួលយកការសម្រេចរបស់តុលាការញូវយ៉ក ដោយសំអាងហេតុផលថា បើខ្លួនយល់ព្រមសងបំណុលដល់ក្រុមហ៊ុនអាមេរិកទាំងពីរ១០០ភាគរយ នោះអាហ្សង់ទីននឹងធ្វើខុសកិច្ចសន្យា ដែលនៅក្នុងនោះអាហ្សង់ទីន និងម្ចាស់បំណុលជាង៩០ភាគរយយល់ព្រមព្រៀងគ្នាពីការកាត់បន្ថយបំណុល ដោយសារវិបត្តិក្ស័យធនរបស់អាហ្សង់ទីន នៅឆ្នាំ២០០១។ និយាយក្នុងន័យម្យ៉ាងទៀត គឺបើអាហ្សង់ទីនយល់ព្រមសងប្រាក់បំណុល១០០ភាគរយ ទៅឲ្យក្រុមហ៊ុនអាមេរិកទាំងពីរទៅតាមការសម្រេចរបស់តុលាការ ក្រុងញូវយ៉ក នោះម្ចាស់បំណុលដទៃទៀត ដែលព្រមព្រៀង សុខចិត្តកាត់បន្ថយបំណុល៧០ភាគរយរួចហើយ កាលពេលដែលអាហ្សង់ទីនក្ស័យធន ក៏នឹងអាចកម្រើកចិត្ត ទាមទារឲ្យអាហ្សង់ទីនសងបំណុល១០០ភាគរយវិញដែរ។ បើម្ចាស់បំណុលទាមទារឲ្យអាហ្សង់ទីនសងបំណុល១០០ភាគរយ នោះអាហ្សង់ទីនត្រូវវ័ណ្ឌក ព្រោះប្រាក់បំណុលដែលអាហ្សង់ទីនជំពាក់គេមានរហូតដល់ជាង១០០ពាន់លាន ដុល្លារ ក្នុងពេលដែលអាហ្សង់ទីនមានប្រាក់បម្រុងប្រមាណ២៨ពាន់លានដុល្លារ ប៉ុណ្ណោះសម្រាប់សងបំណុល។
អាហ្សង់ទីនខកខានមិនអាចសងការប្រាក់ ដល់ម្ចាស់បំណុលដោយសារតែចៅក្រមញូវយ៉កបញ្ជាហាមឃាត់ធនាគារអាមេរិកនៅ ទីក្រុងញូវយ៉កមិនឲ្យផ្ទេរទឹកប្រាក់របស់រដ្ឋាភិបាលអាហ្សង់ទីនទៅឲ្យ ម្ចាស់បំណុល។ សេចក្តីសម្រេចនេះបានធ្វើឲ្យទីភ្នាក់ងារវាយតម្លៃហានិភ័យStandard and Poor ដាក់អាហ្សង់ទីនឲ្យស្ថិតនៅក្នុងដំណាក់កាលក្ស័យធនពាក់កណ្តាល។ តុលាការញូវយ៉កក៏បានប្រកាសដាក់អាហ្សង់ទីនឲ្យស្ថិតនៅក្នុងស្ថានភាពក្ស័យធន ដែលអាហ្សង់ទីនបានបដិសេធរុញច្រានចោល ក្នុងមូលហេតុថា ខ្លួននៅតែគោរពករណីយកិច្ចបន្តសងប្រាក់ទៅម្ចាស់បំណុល។
ក្ស័យធន ជាលើកទីពីរនឹងប៉ះពាល់ធ្ងន់ធ្ងរដល់សេដ្ឋកិច្ចអាហ្សង់ទីនដែលទើបតែ ងើបចេញវិបត្តិក្ស័យធនចាស់។ ដោយសារតែចង់ជៀសផុតពីវិបត្តិក្ស័យធនជាថ្មី អាហ្សង់ទីនបានប្តឹងអាមេរិកទៅតុលាការយុត្តិធម៌អន្តរជាតិ ដែលមានតួនាទីដោះស្រាយជម្លោះរវាងប្រទេស សមាជិករបស់អង្គការសហប្រជាជាតិ។ តាមអាហ្សង់ទីន រដ្ឋាភិបាលអាមេរិកជាម្ចាស់មានសិទ្ធិអំណាចលើតុលាការអាមេរិក។ នេះអាចជាការយល់ខុស ព្រោះថា តុលាការជាស្ថាប័នឯករាជ្យបំផុត មិនស្ថិតនៅក្រោមអំណាចប្រតិបត្តិរបស់រដ្ឋាភិបាលឡើយ។ មួយវិញទៀត ពាក្យបណ្តឹងរបស់អាហ្សង់ទីនប្តឹងអាមេរិកទៅតុលាការអន្តរជាតិ មិនប្រាកដថា នឹងអាចធ្វើឲ្យអាហ្សង់ទីនឈ្នះទៅលើអាមេរិកដែរ។ តាមសេចក្តីថ្លែងការណ៍របស់តុលាការយុត្តិធម៌អន្តរជាតិដែលមានទីតាំង នៅទីក្រុងឡាអេ តុលាការបានបញ្ជូនពាក្យបណ្តឹងអាហ្សង់ទីនទៅរដ្ឋាភិបាលអាមេរិករួចហើយ។ លើសពីនោះទៀត សេចក្តីសម្រេចរបស់តុលាការក្រុងឡាអេអាចមានសុពលភាព លុះណាអាមេរិកទទួលយកយុត្ថាធិការរបស់តុលាការអន្តរជាតិ។
ក្នុងអតីតកាល អាមេរិកធ្លាប់ទទួលស្គាល់ម្តង សាលក្រមដែលពិន័យអាមេរិកពីរឿងមិនគោរពសិទ្ធិអ្នកជាប់ទោសជនជាតិម៉ិកស៊ិច នៅឆ្នាំ ២០០៤។ នៅក្នុងសេចក្តីថ្លែងការណ៍របស់ខ្លួន អាហ្សង់ទីនបានបញ្ជាក់ហើយថា បើសិនរដ្ឋាភិបាលអាមេរិកមិនព្រមទទួលស្គាល់យុត្ថាធិការរបស់តុលាការក្រុងឡាអេ នៅក្នុងជម្លោះរវាងតុលាការញូវយ៉ក និងរដ្ឋាភិបាលអាហ្សង់ទីន ប៉ុន្តែ អាមេរិកត្រូវមានកាតព្វកិច្ចរកវិធានការណាមួយ ដើម្បីរកដំណោះស្រាយសន្តិភាពបញ្ចប់ជម្លោះរវាងប្រទេសទាំងពីរ ទៅតាមច្បាប់របស់អង្គការសហប្រជាជាតិ។ យ៉ាងណាក៏ដោយ រហូតមកដល់ថ្ងៃនេះ គេនៅមិនទាន់ឃើញមានអន្តរាគមន៍ណាមួយរបស់ទីក្រុងវ៉ាស៊ីនតោន នៅក្នុងជម្លោះរវាងតុលាការក្រុងញូវយ៉ក និងរដ្ឋាភិបាលអាហ្សង់ទីននៅឡើយទេ។ ចំណែកអាហ្សង់ទីនកំពុងរត់ស្រវេស្រវ៉ា រកមធ្យោបាយសងប្រាក់បំណុលឲ្យទាន់ពេល ដើម្បីកុំឲ្យធ្វើឲ្យម្ចាស់បំណុលអន់ចិត្ត លែងចង់ឲ្យអាហ្សង់ទីនខ្ចីលុយតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ