ទីប្រឹក្សារបស់ព្រះមហាក្សត្រថៃមិនសូវគាំទ្រឲ្យព្រះរាជបុត្រឡើងស្នងរាជ្យបន្ត
ឯកសារកំណត់ទូតសំងាត់របស់អាមេរិក ចុះផ្សាយដោយវិបសៃត៍ Wikileaksបង្ហាញបន្តិចម្តងៗពីវិបត្តិផ្ទៃក្នុង ស៊ីជម្រៅក្នុងប្រទេសថៃ។ បន្ថែមពីថ្ងៃម្សិលមិញ កាសែតក្នុងប្រទេសអង់គ្លេស បានដកយកសម្រង់ខ្លះរបស់ឯកសារការទូតអាមេរិក។ សម្រង់កំណត់ទូតអាមេរិកដែលបង្ហាញថា ទីប្រឹក្សាសំខាន់ៗរបស់ព្រះមហាក្សត្រ មិនសូវចង់ឲ្យព្រះរាជបុត្រមហាវិជ្ជរ៉ាឡុងកន ឡើងសោយរាជ្យបន្តព្រះមហាក្សត្រភូមិបុល អាឌុលយ៉ាដេត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
វិបត្តិផ្ទៃក្នុងព្រះរាជវង្សថៃ គឺរឿងរកអ្នកមកស្នងរាជ្យបន្តពីព្រះមហាក្សត្រភូមិបុល មិនមែនជារឿងថ្មីទេក្នុងប្រទេសថៃ។ ប៉ុន្តែ តាមរយៈការផ្សព្វផ្សាយរបស់វិបសែត៍ Wikileaks គេបានមើលឃើញរឹតតែច្បាស់ពីការមិនចុះសម្រុងគ្នា រវាងអ្នកធ្វើការបំរើរាជបល្ល័ង្កថៃ ជាមួយនឹងគ្រួសាររាជវង្សតែម្តង។
យោងតាមច្បាប់ ព្រះរាជបុត្រ មហាវិជ្ជរ៉ាឡុងកន ដែលជាព្រះរាជបុត្រទោល នឹងឡើងស្នងរាជ្យបន្តពីព្រះបិតារបស់ព្រះអង្គ។ ប៉ុន្តែ ទីប្រឹក្សា សំខាន់ៗបីរូបរបស់ព្រះបាទភូមិបុល បានបង្ហាញពីជំហរអវិជ្ជមានរបស់ពួកគេចំពោះការប្រគល់រាជបល្ល័ង្កទៅឲ្យព្រះរាជបុត្រអង្គនេះ។ ក្នុងកិច្ចសន្ទនាជាមួយ ឯកអគ្គរដ្ឋទូតអាមេរិកប្រចាំក្រុងបាងកក កាលពីខែមករា ដើមឆ្នាំនេះ ទីប្រឹក្សាទាំងបីរូបនោះ ដែលដឹកនាំដោយប្រធានទីប្រឹក្សាព្រះមហាក្សត្រ លោកប្រេម ទីនស៊ុនឡានន្ទដាបាននិយាយថា ពួកគេមានការបារម្ភ និងសង្ស័យទៅលើសមត្ថភាពព្រះរាជបុត្រ ប្រសិនបើព្រះអង្គត្រូវឡើងសោយរាជ្យបន្តពីព្រះបិតារបស់ព្រះអង្គពិតមែន។
បារម្ភទីមួយរបស់ទីប្រឹក្សាព្រះមហាក្សត្រថៃ គឺព្រះរាជបុត្រ មហាវិជ្ជរ៉ាឡុងកនមិនមានប្រវត្តិ និងរូបភាព គួរឲ្យកោតសរសើរពីសំណាក់ប្រជាជនថៃ។ បើតាមទីប្រឹក្សាដែលនិយាយរបៀបឌឺដង ក្នុងកំណត់ទូតអាមេរិក ព្រះអង្គ មហាវិជ្ជរ៉ាឡុងកន មិនសូវមានវត្តមានក្នុងប្រទេស និងឧស្សាហ៍ទៅយាងកំសាន្តនៅប្រទេសអាល្លឺម៉ង់ជាមួយនឹងស្រីស្នំរបស់ព្រះអង្គ និងទុកឲ្យព្រះជាយានៅគង់តែអង្គឯងក្នុងប្រទេសថៃ។ ទីពីរគឺព្រះរាជបុត្រធ្លាប់មានទំនាក់ទំនងជិតស្និទ្ធជាមួយលោកថាក់ស៊ីន។ ដូច្នេះ ព្រះអង្គអាចនឹងមិនមានសមត្ថភាពដឹកនាំប្រទេស មានទឹកមាត់ប្រៃទៅលើពួកយោធា ដូចជាព្រះបិតារបស់ព្រះអង្គ។ ជាពិសេសក្នុងកាលៈទេសៈបច្ចុប្បន្ន ពេលដែលប្រទេសកំពុងជួបភាពបែកបាក់រវាងប្រជាជនទីក្រុង និងអ្នករស់នៅតាមជនបទ គេខ្លាចថា ព្រះអង្គនឹងអាចធ្វើឲ្យស្ថានការណ៍ប្រទេសបច្ចុប្បន្នកាន់តែធ្ងន់ធ្ងរថែមទៀត។
ទឹប្រឹក្សាម្នាក់ក្នុងចំណោមបីនាក់បាននិយាយថា ប្រសិនបើគេរកឃើញជម្រើសអ្វីផ្សេងទៀត នោះគឺប្រទេសថៃនឹងអាចចៀសផុតពីវិបត្តិលើកនេះ។ នោះគឺគេសំដៅដល់ការប្រគល់រាជបល្ល័ង្កដល់ព្រះរាជបុត្រី មហាចក្រីសារិនថន ដែលប្រជាជនថៃចូលចិត្ត គាំទ្រជាទូទៅ។ សមាជិករបស់ក្រុមទីប្រឹក្សាម្នាក់ចង់ឲ្យព្រះមហាក្សត្រថៃកែប្រែច្បាប់ស្នងរាជ្យ។ ច្បាប់ដែលហាមមិនឲ្យមនុស្សស្រីមានសិទ្ធិឡើងសោយរាជ្យ។ ទាំងអស់នេះគ្រាន់តែសំណូមពរដែលគេលើកឡើងជាមួយឯកអគ្គរដ្ឋទូតអាមេរិក ប៉ុន្តែ រាល់ជំហរទាំងនេះមិនដែលត្រូវគេលើកយកមកនិយាយក្នុងចំណោមគ្រួសាររាជវង្ស ឬនៅមុខព្រះមហាក្សត្រឡើយ។ ក្នុងពេលព្រះមហាក្សត្រថៃបច្ចុប្បន្នកាន់តែមានវ័យកាន់តែច្រើន ការស្វែងរកបុគ្គលមកស្នងរាជ្យបន្ត គឺជារឿងចាំបាច់។ ប៉ុន្តែ រឿងបុគ្គលដែលត្រូវស្នងរាជ្យបន្ត នៅតែប្រធានបទដ៏រសើបបំផុត ក្នុងប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ