បារាំងពួតដៃជាមួយចិនផ្នែកស្រាវជ្រាវ ប្រយុទ្ធប្រឆាំងនឹងជំងឺអេបូឡា
ប្រទេសបារាំងនិងចិន ខ្វល់ខ្វាយយ៉ាងខ្លាំងចំពោះការរាតត្បាតនេះជំងឺអេបូឡា នៅអាហ្វ្រិក ទ្វីបដែលប្រទេសទាំងពីរស្រូបទាញប្រយោជន៍សំខាន់ៗបានដូចគ្នា។ នេះជាការប្រកាសរបស់លោករដ្ឋមន្ត្រីក្រសួងការបរទេសបារាំងនាឱកាសជួបជាមួយសមភាគីចិន លោក វង់ យី នៅទីក្រុងប៉េកាំង ដោយបានសន្យាពង្រឹងការប្រយុទ្ធប្រឆាំងនឹងមេរោគអេបូឡាជាមួយចិន ជាពិសេសក្នុងវិស័យស្រាវជ្រាវ និងជំនួយមនុស្សធម៌ សុខាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
នៅក្នុងសេចក្តីថ្លែងការណ៍រួម ចេញផ្សាយនៅថ្ងៃអាទិត្យទី ១៩តុលានេះ ប៉ារីស និងប៉េកាំងបានសម្រេចលើកស្ទួយការងារផ្នែកស្រាវជ្រាវ ដើម្បីកម្ចាត់មេរោគអេបូឡា ដោយសង្ឃឹមលើទីពិសោធន៍P4 នៅក្រុងលីយ៉ុងប្រទេសបារាំង និងមន្ទីរពិសោធន៍ វ៉ូហាន់ នៅភាគកណ្តាល ប្រទេសចិន ដែលអាចដំណើរការបាននៅដើមឆ្នាំ២០១៥។ វ៉ូហាន់ជាមន្ទីរពិសោធន៍P4ជីវចម្រុះក្នុងកំរិតសុវត្ថិភាពខ្ពស់ ទីមួយរបស់ចិន ដែលមានកិច្ចសហប្រតិបត្តិការជាមួយវិទ្យាស្ថានបារាំង Mérieux។
Mérieux ជាវិទ្យាស្ថានស្រាវជ្រាវ និងជាស្ថាប័ន ដ៏កម្របំផុតមួយនៅលើពិភពលោក មានសិទ្ធចាត់ចែងជីវ៉ាណូ ដើមហេតុមេរោគដែលងាយបង្កជំងឺបំផុត។ បារាំងនិងចិន ធ្លាប់បានផ្តោះប្តូរការងារគ្នា ទាក់ទងនឹងអេបូឡា ជំងឺគ្រុនឈាមនៅអាហ្វ្រិកដែលបានសម្លាប់មនុស្សអស់ជាង៤ពាន់៥រយនាក់ មានជាអាទិ៍រវាងមជ្ឈមណ្ឌលការពារនិងត្រួតពិនិត្យជំងឺចិន និងវិទ្យាស្ថានប៉ាស្ទ័រ INSERM និងមូលនិធិMérieux បារាំង។ កិច្ចព្រមព្រៀងរវាងវិទ្យាស្ថានជាតិតាមដានសុខភាពបារាំងក៏នឹងត្រូវចុះហត្ថលេខាជាមួយមជ្ឈមណ្ឌលការពារជំងឺចិន នៅពេលឆាប់ៗខាងមុខនេះ។
ចំពោះសកម្មភាពនៅផ្ទាល់កន្លែងរងគ្រោះអេបូឡាវិញ បារាំងនិងចិនបានសន្យានៅថ្ងៃអាទិត្យនេះ ថាក្រុមទទួលបន្ទុកជំនួយមនុស្សធម៌និងសុខាភិបាលបារាំងចិន នឹងធ្វើការផ្តោះប្តូរនិងចែករំលែកបទពិសោធន៍គ្នាទៅវិញមកដើម្បីការពារនិងត្រួតពិនិត្យការរាតត្បាត។ ប៉ារីសនិងប៉េកាំង នឹងសិក្សាអំពីមធ្យោបាយធ្វើប្រតិបត្តិការត្រីភាគី ពង្រឹងនិងសហការ លើកស្ទួយប្រព័ន្ធសុខាភិបាលសាធារណៈប្រទេសក្នុងតំបន់ដោយមានការព្រមព្រៀងយ៉ាងពេញទំហឹងពីប្រទេសពាក់ព័ន្ធ។
ការពង្រឹងសកម្មភាពប្រឆាំងនឹងជំងឺអេបូឡានេះ បានប្រកាសឡើងក្នុងខណៈដែលសហរដ្ឋអាមេរិកទើបបានធ្វើការរិះគន់ប៉េកាំងថាមានភាពកំខ្សោយខ្លាំងផ្នែកប្រយុទ្ធប្រឆាំងនឹងជំងឺរាតត្បាត ព្រោះតែចិនផ្តល់ជំនួយ ដោយផ្អែកលើផលប្រយោជន៍សេដ្ឋកិច្ច។ កាលពីថ្ងៃសុក្រ ចិនទើបបានការពារនយោបាយប្រឆាំងនឹងវីរ៉ុសអេបូឡារបស់ខ្លួន ដោយផ្សព្វផ្សាយលម្អិតផែនការជំនួយបន្ទាន់ និងសន្យាបញ្ជូនអ្នកឯកទេសជាង១០នាក់ទៅបំពាក់បំប៉នភ្នាក់ងារសុខាភិបាលនៅអាហ្វ្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ