អេហ្ស៊ីប៖ការបោះឆ្នោតប្រធានាធិបតីដែលគេបានដឹងលទ្ធផលមុន
ចុះផ្សាយនៅថ្ងៃ៖
ស្តាប់ - ០៤:២៩
នៅក្នុងប្រទេសអេហ្ស៊ីប ការរៀបចំបោះឆ្នោតជ្រើសរើសប្រធានាធិបតីថ្មីត្រូវបានរៀបចំឡើងរយៈពេល២ថ្ងៃ គឺថ្ងៃចន្ទ ទី២៦ និងថ្ងៃអង្គារ ទី២៧ ឧសភានេះ។ មានប្រជាជនអេហ្ស៊ីបចំនួន ៥៣លាននាក់ត្រូវបានគេអញ្ជើញឲ្យចូលរួមបោះឆ្នោតជ្រើសរើសបេក្ខជនម្នាក់ក្នុងចំណោមបេក្ខជនឈរឈ្មោះតែ ២នាក់គត់ គឺលោកហំាឌីន សាបាហ៊ី (Hamdeen Sabahi) និងលោកអាប់ដែល ហ្វាតតា អាល់-ស៊ីសស៊ី (Abdel Fattah al-Sissi)។ ក្រុមភាតរៈអ៊ីស្លាមបានអំពាវនាវសកម្មជនរបស់ខ្លួនមិនឲ្យចូលរួមនៅក្នុងការបោះឆ្នោតនោះទេ។ យ៉ាងណាក៏ដោយ លោកអាប់ដែល ហ្វាតតា អាល់-ស៊ីសស៊ីត្រូវបានគេមើលឃើញថា ជាបេក្ខជនដែលនំាមុខដាច់ឆ្ងាយគូប្រជែងរបស់ខ្លួនខ្លំាងណាស់។
បើគ្មានអភូតការណ៍ចៃដន្យណាមួយកើតឡើងទេ ប្រធានាធិបតីថ្មីរបស់ប្រទេសអេហ្ស៊ីប គឺគ្មាននរណាក្រៅពីលោកអាប់ដែល ហ្វាតតា អាល់ ស៊ីសស៊ី (Abdel Fattah al-Sissi) នោះឡើយ។ អ៊ីចឹងហើយបានជាមតិភាគច្រើនបានយល់ឃើញថា ការប្រកួតដណ្តើមកៅអីប្រធានាធិបតីរវាង លោកហំាឌីន សាបាហ៊ី (Hamdeen Sabahi) និងលោកអាប់ដែល ហ្វាតតា អាល់ ស៊ីសស៊ី (Abdel Fattah al-Sissi) គឺជាការប្រកួតមួយមិនស្មើភាពគ្នាទាល់តែសោះ។ លោកហំាឌីន សាបាហ៊ី និងលោកអាប់ដែល ហ្វាតតា អាល់ ស៊ីសស៊ី គឺជាឥស្សរជននយោបាយដែលប្រជាជនអេហ្ស៊ីបស្គាល់ដូចគ្នា។ លោកហំាឌីន សាបាហ៊ីជាឥស្សរជននយោបាយឆ្វេងនិយម និងដែលរូបលោកធ្លាប់បានឈរឈ្មោះម្តងហើយនាការបោះឆ្នោតជ្រើសរើសប្រធានាធិបតីថ្មីកាលពីឆ្នំា ២០១២។ កាលណោះ ជោគជ័យបានធ្លាក់ក្នុងកណ្តាប់បេក្ខជនភាតរៈអ៊ីស្លាម លោកម៉ូហាម៉េដ ម័រស៊ី និងដែលលោកហំាឌីន សាបាហ៊ីទទួលបានសម្លេងគំាទ្រលំដាប់ទី៣។
ចំណែកលោកអាប់ដែល ហ្វាតតា អាល់ ស៊ីសស៊ីវិញ លោកមិនមែនជាឥស្សរជននយោបាយចំតួទេ តែជាឥស្សរជនម្នាក់ចេញមកពីប្រភពយោធា និងដែលកំពុងទទួលបានការគំាទ្រច្រើនណាស់ពីសំណាក់ប្រជាជនអេហ្ស៊ីបទូទៅ។ មុននឹងដោះខោ អាវទាហានដែលលោកបានពាក់ជាប្រចំារយៈពេល ៤៤ឆ្នំាចេញ និងឈរឈ្មោះបោះឆ្នោតប្រធានាធិបតីថ្ងៃនេះ លោកអាប់ដែល ហ្វាតតា អាល់ ស៊ីសស៊ីបានសុខចិត្តលះបង់នូវឋានន្តរសក្តិជាសេនាប្រមុខ តួនាទីជារដ្ឋមន្រ្តីការពារជាតិក្នុងជំនាន់លោកប្រធានាធិបតីម័រស៊ី និងឋានៈជាឧត្តមសេនីយ។ តែគេក៏មិនត្រូវភ្លេចនិយាយទេថា គឺលោកអាប់ដែល ហ្វាតតា អាល់ ស៊ីសស៊ីរូបនេះឯងដែលបានកំចាត់លោកម័រស៊ីចេញពីអំណាចកាលពី ១១ខែមុន គឺរូបលោកអាប់ដែល ហ្វាតតា អាល់ ស៊ីសស៊ីនេះហើយដែលបានតាមកំចាត់ក្រុមភាតរៈអ៊ីស្លាមមកដល់សព្វថ្ងៃ។
ទំាងបេក្ខជនអាប់ដែល ហ្វាតតា អាល់ ស៊ីសស៊ី និងបេក្ខជនហំាឌីន សាបាហ៊ីសុទ្ធតែបានបញ្ជាក់យ៉ាងច្បាស់ៗថា សាធារណៈរដ្ឋថ្មីរបស់អេហ្ស៊ីបមិនបានព្រៀងកន្លែងទុកសម្រាប់ក្រុមភាតរៈអ៊ីស្លាមទេ និយាយឲ្យស្រួលយល់ គេត្រូវតែចាត់វិធានការគ្រប់បែបយ៉ាងទំាងអស់ដើម្បីទប់ស្កាត់ការវិលចូលឆាកនយោបាយអេហ្ស៊ីបជាថ្មីរបស់ក្រុមភាតរៈអ៊ីស្លាម។ អ៊ីចឹងហើយជាចលនាមួយនេះបានអំពាវនាវសកម្មជនរបស់ខ្លួនកុំឲ្យចូលរួមបោះឆ្នោត។ មួយវិញទៀត ក្រុមភាតរៈអ៊ីស្លាមបានយល់ឃើញថា លោកអាប់ដែល ហ្វាតតា អាល់ ស៊ីសស៊ី ជាបេក្ខជនដែលមានបំណងកប់ចោលទំាងស្រុងនូវឧត្តមគតិនៃបដិវត្តន៍រំលំរបបរបស់លោកហូស្ន៊ី មូបារ៉ាក់កាលពីឆ្នំា ២០១១។ តែបញ្ហានៅត្រង់ថា នេះមិនមែនជាការយល់ឃើញរបស់ប្រជាជនអេហ្ស៊ីបទូទៅឯណា។
ក្រោមភ្នែក ច្រមុះរបស់ប្រជាជនអេហ្ស៊ីបភាគច្រើន លោកអាប់ដែល ហ្វាតតា អាល់ ស៊ីសស៊ី ជាអ្នកស្រោចស្រង់ជាតិ និងជាអ្នកដែលមានសមត្ថភាពក្នុងនំាស្ថិរភាពនយោបាយឲ្យប្រទេសដែលបានធ្លាក់ក្នុងវិបត្តិនយោបាយ និងសេដ្ឋកិច្ចរុំារ៉ៃក្នុងរយៈពេល ៣ឆ្នំាកន្លងទៅ ពោលតំាងពីក្រោយបដិវត្តន៍ផ្តួលរំលំលោកប្រធានាធិបតីហូស្ន៊ី មូបារ៉ាក់ក្នុងឆ្នំា ២០១១។ ដូច្នេះគេអាចនិយាយបានថា ចាប់ពីពេលនេះតទៅ លោកអាប់ដែល ហ្វាតតា អាល់ ស៊ីសស៊ីដែលមានអាយុ ៥៩ឆ្នំា គឺជាបេក្ខជនដែលប្រជាជនអេហ្ស៊ីបទូទៅចង់ឃើញ និងចង់បានជាប្រធានាធិបតីរបស់ខ្លួន ពោលគឺមិនមែនបេក្ខជនហំាឌីន សាបាហ៊ីទេ។
ពិតណាស់ថា ជម្រើសបេក្ខជនមួយណាឲ្យធ្វើជាប្រធានាធិបតី វាជាសិទ្ធិរបស់ប្រជាជនអេហ្ស៊ីបខ្លួនឯង។ ការដែលប្រជាជនអេហ្ស៊ីបបានចូលរួមបោះឆ្នោតយ៉ាងច្រើនកុះករ និងនំាគ្នាឲ្យតម្លៃខ្លំាងលើបេក្ខជនអាល់ ស៊ីសស៊ីនាពេលនេះ ក៏មកពីពួកគេចង់បានរបបមួយថ្មីខុសពីរបបផ្តាច់ការដឹកនំាដោយលោកហូស្ន៊ី មូបារ៉ាក់។ តែអ្វីក៏ពួកហាក់ដូចជាមិនបានគិតដល់នោះនៅត្រង់ថា បេក្ខជនអាល់ ស៊ីសស៊ីជាឥស្សរជនមានប្រភពចេញពីកងទ័ព និងដែលលោកគ្រាន់តែដោះខាវ អាវទាហាន រួចពាក់ស៊ីវិលដើម្បីចូលប្រឡូកក្នុងឆាកនយោបាយប៉ុណ្ណោះ។ អ៊ីចឹងហើយបានជាមានសំណួរមួយចោទឡើងថា តើអេហ្ស៊ីបក្រោមការដឹកនំារបស់លោកអាប់ដែល ហ្វាតតា អាល់ ស៊ីសស៊ី មិនមែនជាអេហ្ស៊ីបនៅមុនបដិវត្តន៍ផ្តួលរំលំរបបលោកមូបារ៉ាក់ទេ ឬយ៉ាងណា ព្រោះចូរកុំភ្លេចថា ប្តូរសម្លៀកបំពាក់ពីទាហានទៅស៊ីវិល ឬពីស៊ីវិលទៅទាហាន គឺនៅតែមានគំនិតជាទាហានតែដដែល។
ណ្ហើយចុះ វាហាក់ដូចជារហ័សពេកដែលគេហ៊ានវាយតម្លៃសមត្ថភាពរបស់លោកអាល់ ស៊ីសស៊ីយ៉ាងម៉េចនោះ។ តើស្ថានការណ៍អេហ្ស៊ីបក្រោមអំណាចរបស់លោកអាល់ ស៊ីសស៊ីនឹងក្លាយជាយ៉ាងណានោះ គឺមានតែលោកអាល់ ស៊ីសស៊ីខ្លួនឯងទេដែលអាចឆ្លើយបាន ព្រោះថា ជោគវាសនា អនាគតរបស់ប្រទេសជាតិត្រូវបានប្រជាជនផ្តល់ឲ្យលោករួចហើយ។ ខកចិត្ត ឬពេញចិត្តចំពោះការងាររបស់លោកអាល់ ស៊ីសស៊ី នៅថ្ងៃខាងមុខ គឺមានតែប្រជាជនអេហ្ស៊ីបមួយគត់ជាអ្នកកាត់សេចក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ