តួកគីបន្តបោសសម្អាតផ្ទៃក្នុង លោកអ៊ែរដូហ្កានប្រតិកម្មតបការរិះគន់របស់ប្រទេសលោកខាងលិច
ចុះផ្សាយនៅថ្ងៃ៖
ស្តាប់ - ០៤:៤៣
ការបោសសម្អាតផ្ទៃក្នុងក្រោយរដ្ឋប្រហារ១៥កក្កដា នៅតួកគី នៅតែបន្តធ្វើ និងបានឈានចូលដល់ការចាប់ខ្លួនអ្នកសារព័ត៌មាននិងថ្នាក់ដឹកនាំ សហគ្រាសធំៗ។ តុលាការបានសម្រេចឃុំខ្លួនអ្នកកាសែត១៧នាក់ ជាប់ពិរុទ្ធថា ជាសមាជិកក្រុមភេរវជន។ ក្នុងចំណោមអ្នកកាសែតទាំងនេះ មានស្ត្រីជាអតីតតំណាងរាស្ត្រម្នាក់ ធ្លាប់បំរើការអោយព័ត៌មានគាំទ្ររដ្ឋាភិបាលមួយក្នុងស្រុក។
ថ្ងៃសុក្រម្សិលមិញ មេដឹកនាំសហគ្រាសសំខាន់៣នាក់ក៏ត្រូវអាជ្ញាធរចាប់ខ្លួនផងដែរ ក្នុងក្របខណ្ឌស៊ើបអង្កេតទាក់ទងបណ្តាញក្រុមលោកហ្វេទូឡា ហ្គូឡិន ដែលរដ្ឋាភិបាលចោទថា នៅពីក្រោយរដ្ឋប្រហារមិនបានសម្រចកន្លងទៅ។
លោកអ៊ែរដូហ្កាន ឆ្លើយតបនឹងការរិះគន់របស់លោកខាងលិច
ប្រធានាធិបតីអ៊ែរដូហ្កាន បានឆ្លើយតបទៅនឹងការរិះគន់របស់ប្រទេសលោកខាងលិច ចំពោះការបោសសម្អាតផ្ទៃក្នុងក្រោយរដ្ឋប្រហារ ដោយប្រាប់អាមេរិកនិងអឺរ៉ុបអោយគិតគូរចំពោះតែរឿងផ្ទាល់ខ្លួនវិញទៅ។ លោកអ៊ែរដូហ្កាន ប្រើឃ្លាប្រយោគថា មេដឹកនាំប្រទេសទាំងនេះមិនបានបារម្ភពីលទ្ធិប្រជាធិបតេយ្យតួកគី ពីប្រជាជននិងអនាគតតួកគីអីទេ។ ពួកគេរវល់តែពីរឿងជោគវាសនាក្រុមបះបោររដ្ឋប្រហារ។ ពួកគេមិនអាចធ្វើជាមិត្តនឹងយើងទេ។
លោកអ៊ែរដូហ្កានសោកស្តាយថា តាំងពីមានរដ្ឋប្រហារមិនបានសម្រេចថ្ងៃ១៥កក្កដាមក មិនទាន់មានមេដឹកនាំ រឺតំណាងប្រទេសលោកខាងលិចណាមួយ ចុះមកទស្សនកិច្ចនៅតួកគីទេ។ តែលោកអ៊ែរដូហ្កានបានឆ្លៀតអួតទៅវិញដែរ នូវភាពមេត្តាធម៌របស់លោក។ លោកថាលែងប្តឹងមនុស្សរាប់រយនាក់ដែលបានជេរប្រមាថលោក។
ប្រធានាធិបតីតួកគីមិនពេញចិត្តសហភាពអឺរ៉ុបប៉ុន្មានទេ ដែលបានគំរាមតួកគីចំពោះការសុំចូលជាសមាជិកអឺរ៉ុប។ ប្រឈមនឹងការបោសសម្អាតផ្ទៃក្នុងទ្រង់ទ្រាយធំ អឺរ៉ុបបានព្រមានដោយប្រយោលថា អាចនឹងព្យួរការចរចាទាក់ទងការសុំចូលរបស់តួកគីជាសមាជិកអឺរ៉ុប បើតួកគីមិនគោរពគោលការណ៍ច្បាប់ គោលការណ៍សិទ្ធិមនុស្សមូលដ្ឋាន។
ម្សិលមិញដែរ លោកអ៊ែរដូហ្កានចោទលោក Joe Votel ចូ វោទែល ជាឧត្តមសេនីយ៍យោធាអាមេរិកនៅដើមបូព៌ា ថា កាន់ជើងក្រុមបះបោររដ្ឋប្រហារ។ មូលហេតុដោយសារលោកចូ វោទែលនេះ បានលើកឡើងពីទំនាក់ទំនងតួកគី-អាមេរិក ព្រោះថា មានទាហានតួកគីមួយចំនួនដែលធ្លាប់មានទំនាក់ទំនងជាមួយអាមេរិក ត្រូវបានអាជ្ញាធរចាប់ដាក់គុក។ មេយោធាអាមេរិករូបនេះបានឆ្លើយបដិសេធការចោទប្រកាន់របស់លោកអ៊ែរដូហ្កានទាំងស្រុង។ សេតវិមានអាមេរិកបានគូសបញ្ជាក់ឡើងវិញថា អាមេរិកមីនបានគាំទ្រក្រុមបង្ករដ្ឋប្រហារតួកគីទេ។
ផលវិបាកនៃការបោសសំអាតផ្ទៃក្នុងតួកគីចំពោះទំនាក់ទំនងរវាងតួកគីជាមួយ អឺរ៉ុប និងអាមេរិក
សហភាពអឺរ៉ុបកំពុងបារម្ភ ថា វាអាចប៉ះពាល់ដល់កិច្ចព្រមព្រៀងតួកគី-អឺរ៉ុប ស្តីពីការទប់ស្កាត់លំហូរចូលជនភៀសខ្លួន មកអឺរ៉ុប។ កិច្ចព្រមព្រៀងនេះ ធ្វើឡើងកាលពីខែមិនា ចែងបញ្ជូនជនភៀសខ្លួនគ្រប់សញ្ជាតិ ដូចជាស៊ិរី អ៊ីរ៉ាក់ជាដើម ចេញពីក្រិក បញ្ជូនទៅតួកគីទាំងអស់។ ជាថ្នូរមកវិញ អឺរ៉ុបទទួលយកជនភៀសខ្លួនស៊ិរី តួកគីទទួលបានជំនួយ៣ពាន់លានអឺរ៉ូ ហើយពលរដ្ឋតួកគីធ្វើដំណើរមកអឺរ៉ុបដោយមិនចាំបាច់មានទិដ្ឋាការអ្វីទេ។ ស្របតាមកិច្ចព្រមព្រៀងនេះ បារាំងនិងអាល្លឺម៉ង់បានដាក់ភ្នាក់ងារការពារព្រំដែន ធ្វើអោយការហូរចូលជនភៀសខ្លួនថយចុះជាងមុន។
ក្រោយរដ្ឋប្រហារនេះ មន្ត្រីធំៗដែលទទួលបន្ទុកកិច្ចព្រមព្រៀងតួកគី-អឺរ៉ុប ត្រូវគេបណ្តេញពីការងារ។ នៅមិនទាន់មានអ្នកឡើងមកជំនួសការងារបន្តពីពួកគេទេ។ កិច្ចព្រមព្រៀងតួកគី-អឺរ៉ុបនេះ អាចជួបបញ្ហាគ្រប់ពេល ព្រោះលោកអ៊ែរដូហ្កានធ្លាប់ព្រមានច្រើនលើកហើយថា លោកអាចនឹងពិនិត្យមើលវាឡើងវិញ។ អឺរ៉ុបរិះគន់តួកគីរឿងបោសសម្អាតផ្ទៃក្នុងក្រោយរដ្ឋប្រហារខ្លាំងយ៉ាងនេះ លោកអ៊ែរដូហ្កានអាចនឹងព្រលះអឺរ៉ុបតាមរយៈកិច្ចព្រមព្រៀងនេះវិញក៏ថាបាន។
ទំនាក់ទំនងតួកគីជាមួយអាមេរិកវិញ ប្រហែលកាន់តែតានតឹងជាងមុន។ យើងដឹងថា ប្រទេសសម្ព័ន្ធមិត្តដឹកនាំដោយអាមេរិក កំពុងកំចាត់ក្រុមជីហាតរដ្ឋអ៊ីស្លាម នៅដើមបូព៌ា។ យុទ្ធនាការនេះត្រូវការតួកគីចៀសមិនរួច។ អាមេរិកប្រើមូលដ្ឋានទ័ពអាកាសមួយនៅតួកគី។ តែតួកគីបានបិទលំហអាកាស ក្រោយមានរដ្ឋប្រហារ១៥កក្កដា ធ្វើអោយអាមេរិកពិបាក។ បើអាមេរិកមិនបន្ទន់ជំហរបន្តិចប្រហែលកាន់តែពិបាកជាងនេះ។ ទោះយ៉ាងនេះក្តី តួកគីអះអាងថា នៅតែបន្តកិច្ចការកំចាត់ក្រុមភេរវជន។
ហ្វេទូឡា ហ្គូឡិនដែលតួកគីចោទថា នៅពីក្រោយខ្នងរដ្ឋប្រហារ កំពុងភៀសខ្លួននៅអាមេរិក។ លោកអ៊ែរដូហ្កានមិនសប្បាយចិត្តប៉ុន្មានទេ ដែលអាមេរិកមិនទាន់បញ្ជូនលោកហ្គូឡិន ដែលជាសត្រូវសួរពូជមកអោយតួកគីកាត់ទោស។
អាមេរិកកំពុងពិនិត្យឯកសារភស្តុតាងរបស់តួកគី ប្រឆាំងហ្វេទូឡា ហ្គូឡិន
លោកហ្វេទូឡា ហ្គូឡិនដែលត្រូវតួកគីចោទថា មេរដ្ឋប្រហារមិនបានសម្រេចនោះ កំពុងភៀសខ្លួននៅអាមេរិក។ អាមេរិកទាមទារភស្តុតាងពីតួកគីថា ហ្គូឡិនពិតជាបានរៀបចំអោយមានរដ្ឋប្រហារនោះមែន។ កន្លងមក តួកគីបានបញ្ជូនឯកសារជាភស្តុតាង ទៅអោយអាជ្ញាធរអាមេរិក រួចហើយដែរ។ ពេលនេះ អាមេរិកប្រាប់ថា កំពុងពិនិត្យសំណុំរឿងនេះ តែគេមិនដឹងថា ពេលណា ទើបអាមេរិកចេញសេចក្តីសម្រេច រឿងនេះទេ។
ការបោសសំអាតផ្ទៃក្នុងបន្តធ្វើរាល់ថ្ងៃ
២សប្តាហ៍ក្រោយរដ្ឋប្រហារ ការបោសសំអាតនៅតែបន្តធ្វើ តាមគ្រប់ក្រសួងមន្ទីរ។ ជាតួលេខ សារព័ត៌មានជាង១៣០ត្រូវបិទដំណើរការ។ អាជ្ញាធរបានដកហូតលិខិតឆ្លងដែនប្រមាណកន្លះសែន។ មនុស្ស១៨០០០នាក់ត្រូវឃុំខ្លួន ក្នុងនោះជិត១០០០០នាក់ រង់ចាំការសម្រេចពីតុលាការ។ សេនាប្រមុខកងទ័ពជាងពាក់កណ្តាលត្រូវដកហូតតំណែង។ តួកគីបានតែងតាំងកងទ័ពរៀបចំកងទ័ពឡើងវិញដែរ។
ក្រៅពីការកាត់ទោសអ្នកកាសែត ម្សិលមិញ គេចាប់ខ្លួនរហូតប្រធានក្រុមហ៊ុនទៀតផង គឺចាប់ខ្លួនលោកមូស្តាហ្វា បយដាក់ Mustafa Boydak ជាប្រធានក្រុមហ៊ុន បយដាក់ ហូលឌីង Boydak Holding និងអ្នកជំនិតលោក២នាក់ទៀត។ ក្រុមហ៊ុននេះ មានភាគហ៊ុនក្នុងផ្នែកថាមពល ហិរញ្ញវត្ថុ និងគ្រឿងសង្ហារិមនៅតួកគី។ លោកបយដាក់ជាប្រធានក្រុមហ៊ុននេះ ក៏ជាប្រធានសភាពាណិជ្ជកម្មក្រុងអភិវឌ្ឍន៍ជឿនលឿន Kayseri ដ៏ល្បីនៅតួកគីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ