សេដ្ឋកិច្ចអឺរ៉ុបកំរើក បារាំងអរ តែមូលនិធិរូបិយវត្ថុព្រមាន
ចុះផ្សាយនៅថ្ងៃ៖
ស្តាប់ - ០៤:០០
សកម្មភាពសេដ្ឋកិច្ចតំបន់ចាយប្រាក់អឺរ៉ូ ហាក់ដូចចាប់ផ្តើមមានកំរើកឡើងវិញបន្តិច ! សញ្ញាវិជ្ជមាន ដែលបានឆេះឡើងជាលើកទីមួយ គិតចាប់ពី២ឆ្នាំមកនេះ បានបណ្តុះសេចក្តីសង្ឃឹមថានឹងឃើញតំបន់អឺរ៉ូចេញពីវិបត្តិសេដ្ឋកិច្ចដើរថយក្រោយ។ ដំណឹងនេះគ្រប់គ្រាន់នឹងធ្វើផ្តល់កម្លាំងចិត្ត ដល់ប្រធានាធិបតីបារាំង លោក ហ្វ្រង់ស័រ ហូឡង់ ឱ្យកាន់តែមានសុទិដ្ឋិនិយម និងជំនឿ។
បើតាមអ្នកវិភាគ មានសញ្ញាវិជ្ជមានក្នុងតំបន់ចាយប្រាក់អឺរ៉ូ ស្ថិរភាពសេដ្ឋកិច្ច ទំនងកើតមាននៅក្នុងត្រីមាសទីពីរឆ្នាំ២០១៣នេះ មុននឹងចាប់មានកំណើនសេដ្ឋកិច្ចឡើងវិញ នៅចុងឆ្នាំ។ នៅប្រទេសអាល្លឺម៉ង់ សេដ្ឋកិច្ចចាប់ផ្តើមកំរើកខ្លាំងវិញហើយ ចំណែក បារាំង អ៊ីតាលី ឬអេស្ប៉ាញវិញ ផលិតផលសរុបក្នុងស្រុក នៅទ្រឹង-លែងធ្លាក់ចុះ ឯសេដ្ឋកិច្ចក៏ចាប់មានសកម្មភាពដែរ។ លោកប្រធានាធិបតីបារាំង ចង់ជឿលើភាពរស់រវើកឡើងវិញនៃសេដ្ឋកិច្ចនេះ ទោះបីជានៅ ផុយស្រួយ មិនទៀតទាត់ក៏ដោយ។ នយោបាយសុទិដ្ឋនិយម ដែលជាឯកទេសរបស់លោកប្រធានាធិបតី បារាំង ហ្វ្រង់ស័រហូឡង់! ទស្សនៈរបស់លោកគឺ “ផ្តល់ក្តីសង្ឃឹម គឺដើម្បីស្វែងរកទំនុកចិត្តឡើងវិញ !” ទោះបីជាត្រូវឃ្លាតឆ្ងាយពីការពិត ប្រជាជនត្រូវត្រដាបត្រដួសយ៉ាងណាក៏ដោយ។
ប៉ុន្តែសម្រាប់មូលនិធិរូបិយវត្ថុអន្តរជាតិ គឺមិនទាន់ពេលវេលាទេ។ បារាំងនៅមានកិច្ចការនិងការខិតខំប្រឹងប្រែង ធ្វើកំណែទម្រង់ច្រើនទៀត ទើបអាចរក្សាសេដ្ឋកិច្ចមានសកម្មភាព ឱ្យបាននៅគង់វង់បាន។ ព្រោះចំនួនអ្នកអត់ការងារធ្វើដែលនៅតែបន្តកើនឡើងជានិច្ច អាចនឹងធ្វើក្តីរំពឹងនេះ ត្រូវអូសបន្លាយ និងអាចជះឥទ្ធិពលយ៉ាងខ្លាំងដល់សម្មភាពសេដ្ឋកិច្ច និងពិសេសសម្ពាធសង្គមនិងនយោបាយ។
តាំងពីបាននៅជាបេក្ខជនប្រធានាធិបតី រហូតមកកាន់តំណែងកំពូលនេះ លោកហ្វ្រង់ស័រ ហូឡង់ នៅតែទន្ទេញដដែល ជាដដែល ក្នុងរាល់សុន្ទរកថា លុបចោលកំណើនអត្រាអ្នកអត់ការងារ ឱ្យបាននៅចុងឆ្នាំ២០១៣។ ចុះសួរថាតើមានសញ្ញាធ្លាក់ចុះហើយឬនៅ ?!
គ្មានទេ អត្រាអ្នកអត់ការងារធ្វើបន្តកើនឡើងជាលំដាប់ ! តួលេខថ្មី គួរឱ្យព្រឺខ្លាច ព្យាករដោយមូលនិធិរូបិយវត្ថុ ថានឹងមានបណ្តាជនបារាំងដល់ទៅ ១១,២% អត់ការងារធ្វើនៅដំណាច់ឆ្នាំ២០១៣ អត្រានេះនឹងបន្តឡើងដល់ ១១,៦% នៅឆ្នាំ២០១៤ មុននឹងអាចធ្លាក់ចុះមកវិញបន្តិចនៅចុងឆ្នាំ២០១៤ មកត្រឹម១១,៤%។
បង្កើតការងារ ជាកម្មវត្ថុចម្បងរបស់រដ្ឋាភិបាលលោក ហ្វ្រង់ស័រ ហូឡង់ ! ដើម្បីមានការងារ ត្រូវមានការធ្វើវិនិយោគ ប៉ុន្តែអ្នកវិនិយោគខ្លាចបារាំងណាស់ ព្រោះប្រទេសនេះមាននយោបាយបង់ពន្ធខ្ពស់កប់ពពក -ខ្ពស់ជាងគេបំផុតមួយនៅលើពិភពលោក។ ហេតុដូច្នេះហើយបានជាអង្គការមូលនិធិរូបិយវត្ថុ ចង់ឱ្យបារាំងធ្វើកំណែទម្រង់ឱ្យមានលំនឹង រវាងការប្រឹងសន្សំសំចៃ ដើម្បីកាត់បន្ថយចំណាយសាធារណៈ និងការទារពន្ធ។ វាពិតជាគ្មានផលល្អឡើយ ប្រសិនបើការកាត់បន្ថយឱនភាពថវិកាជាតិ បានមកតែពីការដំឡើងពន្ធដារ។ ស៊ូកាត់បន្ថយឱនភាពជាតិជាសន្យឹមៗ តិចជាងការគ្រោងទុក និងតាមរយៈការកាត់បន្ថយចំណាយ។ FMI ចង់ឱ្យបារាំងកាត់បន្ថយឱនភាពជាតិ ត្រឹម៣,៩% នៃផលិតផលសរុបក្នុងស្រុក ក្នុងឆ្នាំ២០១៣នេះ ទល់នឹង៤,៨%នៅឆ្នាំ២០១២ ៣,៥% នៅឆ្នាំ២០១៤ និងក្រោម៣% នៅឆ្នាំ២០១៥ មិនដូចអ្វីដែលបារាំងបានសន្យាជាមួយដៃគូអឺរ៉ុប សម្រេចកម្មវត្ថុតែក្នុងពេលពីរឆ្នាំនោះទេ។
សេដ្ឋកិច្ចតំបន់អឺរ៉ូ កំរើកឡើងវិញមែន ប៉ុន្តែនៅផុយស្រួយ និងពឹងផ្អែកលើកត្តាច្រើនយ៉ាងវិលវល់ ពឹងទៅពឹងមកប្រទាក់គ្នា ហើយសក្តានុពលនៃកំណើនសេដ្ឋកិច្ចបារាំង ត្រូវចាក់សេ្រស ពេញទៅដោយប្រព័ន្ធតានតឹងនិងស្មុគស្មាញ។ ប្រព័ន្ធដែលតាំងពីដើមមក ធ្លាប់បានរួមចំណែក ឱ្យ បាត់បង់ ទីផ្សារ និងភាពប្រកួតប្រជែង។ បារាំងត្រូវគិតគូរធ្វើកំណែទម្រង់លើចំណុចនេះ។
ផ្ទុយទៅវិញ ជាមួយនឹងប្រទេសអាល្លឺម៉ង់ មហាអំណាចសេដ្ឋកិច្ចទីមួយរបស់អឺរ៉ុប និងជាបង្គោលសេដ្ឋកិច្ចសម្រាប់ក្រុមអឺរ៉ូប្រទេស ដែលល្បីខាងនយោបាយរឹតត្បឹត មូលនិធិរូបិយវត្ថុអន្តរជាតិ បានណែនាំឱ្យប៊ែរឡាំង កុំររិះរឹតចំណាយសាធារណៈជ្រុលហួសហេតុខ្លាំងពេក ព្រោះអាចនឹងធ្វើកំណើនសេដ្ឋកិច្ចងាយបាក់វិញដែរ ! មានតម្រូវការក្នុងស្រុកមិនរំពឹងទាំងស្រុងលើការនាំចេញ ជាភាពចាំបាច់ក្នុងការរក្សាសុខភាពសេដ្ឋកិច្ចជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ