ហេតុដូចម្តេច បានជាពួកពីឡុតរុស្ស៊ី ចាកចេញទៅធ្វើការឲ្យក្រុមហ៊ុនអាកាសចរបរទេស?
ចុះផ្សាយនៅថ្ងៃ៖
ស្តាប់ - ០៦:១៤
អង្គការភាពរដ្ឋនិងក្រុមហ៊ុនអាកាសចរណ៍រុស្ស៊ី ខិតខំទប់ពួកពីឡុត ដែលមានបំណងចាកចេញទៅ ធ្វើការនៅបរទេស ប៉ុន្តែ មិនបានសម្រេចដូចចិត្តឡើយ ពីព្រោះពួកពីឡុតរុស្ស៊ី មិនជឿពាក្យសន្យាថា ដំឡើង ប្រាក់ខែឲ្យគេ ចំណែកវិធានការរឹតត្បឹតថ្មីៗ នៅតែមិនអាចខាឃាំង រាល់នរណា ដែលបានតាំងចិត្តទៅហើយ ទៅបម្រើ ក្រុមហ៊ុនអាកាសចរណ៍បរទេសណា ដែលផ្តល់ប្រាក់ឈ្នួលការងារយ៉ាងក្រាស់ក្រែលដល់គេ។ ត្បិតថ្មីៗ នៅតែមិនអាចខាឃាំងរាល់នរណា ដែលបានតាំងចិត្តទៅហើយ ទៅបម្រើ ក្រុមហ៊ុនអាកាសចរណ៍បរទេសណា ដែលផ្តល់ប្រាក់ឈ្នួលការងារយ៉ាងក្រាស់ក្រែលដល់គេ។
ក្នុងពីរឆ្នាំចុងក្រោយ មានមេក្រុមបើកបរយន្តហោះស៊ីវិល និង គ្រូបង្ហាត់រុស្ស៊ីជាង ៣០០នាក់ បាន ចាកចេញទៅធ្វើការនៅបរទេស ហើយ ៤០០នាក់ទៀត កំពុងត្រៀមដើរតាមផ្លូវនេះដែរ-តួលេខនេះ ចុះ ផ្សាយ ក្នុងសប្តាហ៏កន្លងទៅ ដោយកាសែតក្រុងម៉ូស្គូ Kommersant យោងទៅលើប្រភពរបស់ខ្លួនផ្ទាល់ គឺ សហជីពពីឡុត ប្រចាំអាកាសយានដ្ឋានអន្តរជាតិដ៏ធំបំផុតនៃក្រុងម៉ូស្គូឈ្មោះ Sheremetievo។ ពីឡុតរុស្ស៊ី ភាគច្រើនដែលបានចាកចេញទៅ សព្វថ្ងៃធ្វើការ នៅប្រទេសចិន ហើយក៏ក្នុងចំនួនច្រើនដែរ ធ្វើការនៅតាម ប្រទេសអាស៊ីអាគ្នេយ៏ និង តំបន់ដើមបូព៏ា។
ចំណែកអ្នកឆ្លើយឆ្លងរបស់ BBC ទាក់ទងនឹងរឿងនេះ បានទៅជីកសួរក្រុមហ៊ុនអាកាសចរណ៍ឯកជន ៣ ធំៗ នៅរុស្ស៊ី គឺក្រុមហ៊ុន Sibir Utair និង Ural Lines ដែលក្នុងចម្លើយរបស់គេ មិនបញ្ជាក់អំពី លំហូររង្គាល ទៅក្រៅ នៃពួកពីឡុតរបស់គេឡើយ។
ជាការកត់សម្គាល់ តាមស្ថិតិ ទី ភ្នាក់ងារសហព័ន្ធខាងដឹកជញ្ជូនតាមផ្លូវអាកាស ហៅកាត់ថា RosAviatsia នៅរុស្ស៊ី មានក្រុមហ៊ុនអាកាសចរណ៍ធំៗ ចំនួន ១៥ ក្នុងនោះនាំមុខគេ គឺ ក្រុមហ៊ុនរដ្ឋ Aeroflot ដែលធំជាងគេ នៅអឺរ៉ុបខាងកើត ហើយដែលប្រដាប់ទៅដោយយន្តហោះដឹកអ្នកដំណើរទៅឆ្ងាយៗនិងទៅចម្ងាយមធ្យម គិត មកទល់ថ្ងៃ១សីហាឆ្នាំនេះ មាន ១៩៨ គ្រឿងច្រើនតែថ្មីៗ ដែលវ័យមធ្យមរបស់វា គឺ ៤,៣ឆ្នាំ។
ក្នុង RosAviatsia គេចាត់ទុកចំនួនលើកយកមកបង្ហាញដោយកាសែត Kommersant ថាជាតួលេខពន្លើស ដ្បិតស្របនឹងទិន្នន័យផ្តល់ដោយ សមាគមចិនខាងដឹកជញ្ជូនផ្លូវអាកាស មានពីឡុតរុស្ស៊ី តែ ៨១ នាក់ ប៉ុណ្ណោះ ធ្វើការនៅតាមក្រុមហ៊ុនអាកាសចរណ៍ចិន។ RosAviatsia មិនចាត់ទុកស្ថានការណ៍ដែលកើត ឡើង ថាជាវិបត្តិឡើយ ពីព្រោះនៅរុស្ស៊ី ពីឡុតពាណិជ្ជ មានចំនួនច្រើនហូរហៀរ ដល់ទៅ ១២.០០០ នាក់។ រីឯ ពីឡុតដែលបានចាកចេញទៅស៊ីឈ្នួលនៅបរទេស គិតពីដើមឆ្នាំ២០១៥មក គឺ តែក្នុងចំនួន ២០០ នាក់ ឫ តែ ១,៧% ប៉ុណ្ណោះ នៃចំនួនពីឡុតទាំងអស់នៅរុស្ស៊ី។
ប៉ុន្តែ តាមការវាយតម្លៃនៃទីភ្នាក់ងារក្របខ័ណ្ឌអាកាសចរ ហៅថា Aviapersonal ពីក្នុងចំណោមពីឡុត ពាណិជ្ជ ១២.០០០ នាក់នោះ មានតែ ៣.៥០០ នាក់ ដែលបានទទួលអាជ្ញាប័ណ្ណ ជា មេក្រុមបើកបរ ហៅ ថា អ្នកកាច់ចង្កូតយន្តហោះក្នុងឋានៈជា ពីឡុតទី១ និង ពីឡុតទី២។ ដូច្នេះ តាមកាសែត Kommersant បើគេបានចាកចេញទៅ ៣០០នាក់ ហើយត្រៀមចាកចេញ ៤០០នាក់ទៀត លុះដល់ ៧០០ នាក់ គឺជា តួលេខ មិនអាចធ្វើព្រងើយកន្តើយឡើយ។
ប្រាក់ខែតិច?
-តាមដែល BBC ចេះជីកយកបានពី សហជីពពីឡុតប្រចាំអាកាសយានដ្ឋាន Sheremetievo ៖ ក្នុង ក្រុម ហ៊ុន Aeroflot ពីឡុតទទួល ក្នុង១ខែ គឺខ្ទង់ ៦.៥០០ ដុល្លារ រួចនៅតាម ក្រុមហ៊ុនជាសាខា របស់ Aeroflot គេ ទទួលតែម្តុំ ២.០០០ ដុល្លារ។ ប៉ុន្តែ តំណាងរបស់ Aeroflot ផ្ទាល់ បានរៀបរាប់ថា មេក្រុមបើកបរយន្ត ហោះ ទទួលបាន ៧.៨៥៨ ដុល្លារឯណោះ ក្នុង១ខែ។
-តាមទិន្នន័យសហជីពអាកាសយានដ្ឋាន Sheremetievo មេក្រុមបើកបរនៅតាមក្រុមហ៊ុន អឺរ៉ុបខាងកើត ទទួលក្នុង១ខែ គឺពី ៤.០០០ ដល់ ៧.៥០០ ដុល្លារ។ នៅសរអា និង ប្រទេសចិន ពីឡុតទទួល ដល់ជាង ១៤.០០០ ដុល្លារក្នុង១ខែ។ នៅប្រទេសចិន តាមតួលេខសហជីព ពួកពីឡុតជំនាញទទួលពី ១៧.០០០ ដល់ ២៥.០០០ ដុល្លារ ក្នុង១ខែ។
មិនតែប៉ុណ្ណោះ សំខាន់ណាស់ដែរសម្រាប់ពីឡុតរុស្ស៊ី ក៏ទាំងល័ក្ខខ័ណ្ឌការងារ បែបយ៉ាង ការបង់ថ្លៃលំនៅ ថ្លៃធ្វើដំណើរទៅធ្វើការ ថ្លៃធានារ៉ាប់រង បូកទាំងសម្រាប់គ្រួសារពីឡុតផង គឺ ដោយក្រុមហ៊ុនបរទេស។
នៅទីបំផុត កត្តាសំខាន់ គឺ តារាងកំណត់ពេលធ្វើការ ។ នៅតាមក្រុមហ៊ុនបរទេស ជាអាថទិ៍ក្រុមហ៊ុនអាស៊ី តារាងនេះ គឺងាយស្រួលសម្រាប់ពីឡុតរុស្ស៊ីបំពេញការងារ។ ក្នុងសម្ភាសន៏ច្រើនឥតគណនា ពួកពីឡុតរុស្ស៊ី ដែលបានចេញទៅធ្វើការនៅបរទេស ដំណាលថា តារាងនោះមិនផ្ញុកទៅដោយបន្ទុកច្រើនជ្រុល ចំណែក ថ្នាក់ដឹកនាំក្រុមហ៊ុនបរទេស តែងខិតខំបង្កលក្ខណៈល្អប្រសើរ ដើម្បីឲ្យការងារប្រព្រឹត្តទៅយ៉ាងរលូន។
ទាក់ទងនឹងប្រាក់ខែពីឡុត ទីភ្នាក់ងារព័ត៌មានរុស្ស៊ី Russian Business Consulting RBC ថ្ងៃ ២៣ សីហា យោងទៅលើ សមាគមដឹកជញ្ជូនផ្លូវអាកាសអន្តរជាតិ Airline Pilot Central និង CNN Money បានលើក យកមកបង្ហាញស្ថិតិប្រាក់ឈ្នួលការងារពីឡុត ឆ្នាំ ២០១៦ នៅតាមក្រុមហ៊ុនអាកាសចរធំៗក្នុងលោក ៖
-ក្នុងក្រុមហ៊ុន Air France ពីឡុតទទួលប្រាក់ឈ្នួលបើកបរ ក្នុង១ម៉ោង ២២០ ដុល្លារ ឫ ២២.០០០ ដុល្លារ ក្នុង១ខែ។ ក្នុងក្រុមហ៊ុនអាល្លឺម៉ង់ Lufthansa ពីឡុតទទួលជាមធ្យម ប្រាក់ឈ្នួលការងារ ក្នុង១ម៉ោង ២៤០ ដុល្លារ ឫ ២៤.០០០ ដុល្លារក្នុង១ខែ ហើយអាស្រ័យនឹងភាពជំនាញ និង បទពិសោធន៍របស់គេ ប្រាក់ឈ្នួល នេះមានកម្រិតពី ១១៧ ដល់ ៣៦០ ដុល្លារក្នុង១ម៉ោង ឫ ១២.០០០ ដល់ ៣៦.០០០ ដុល្លារ ក្នុង ១ ខែ។
-ក្នុងក្រុមហ៊ុនអាមេរិកាំង Unted Airlines ប្រាក់ឈ្នួលការងារពីឡុត ជាមធ្យម គឺ ២៧០ ដុល្លារក្នុង១ម៉ោង ឫ ២៧.០០០ ដុល្លារក្នុង១ខែ។ ក្នុងក្រុមហ៊ុន Americain Airlines ប្រាក់ឈ្នួលការងារពីឡុត ជាមធ្យម គឺ ២៤៩ ដុល្លារក្នុង១ម៉ោង ឫ ២៥.០០០ ដុល្លារក្នុង១ខែ ដូចគ្នាបេះបិទ និងក្រុមហ៊ុនអាមេរិកមួយទៀត ក្រោមឈ្មោះថា Delta Air Lines។
-ក្នុងក្រុមហ៊ុនចិន Chengdu Airlines គេស្នើដល់ពួកពីឡុត គឺប្រាក់ខែក្នុង១ឆ្នាំ ប្រមាណ ៣០០.០០០ ដុល្លារ ឫ ២៥.០០០ ដុល្លារក្នុង១ខែ-នេះ គឺក្រោយពីបង់ពន្ធចប់សព្វគ្រប់ មិនតែប៉ុណ្ណោះ ក្រុមហ៊ុន ធានា ផ្តល់ប្រាក់រង្វាន់ ទំហំ ៣៦.០០០ ដុល្លារ ដរាបណា ដែល ពីឡុតបំពេញកុងត្រាបាន ៣ឆ្នាំជាប់។ បន្ថែមលើ នេះ ក្រុមហ៊ុនចិន ទាក់ទាញពីឡុត ដោយបង្ខើចពេលហោះហើររបស់គេ ឲ្យចុះពី ៨០ ម៉ោង តាមស្តង់ដារ មកនៅ ត្រឹម ៥០ ម៉ោង ក្នុង១ខែ លុះទាល់តែ ប្រាក់ឈ្នួលការងារ ឡើងដល់ ៥០០ ដុល្លារ ក្នុង ១ ម៉ោង សម្រាប់ពីឡុតណាដែល សម្បូណ៏បទពិសោធន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ