អឺរ៉ុបខិតខំធ្វើឲ្យក្រុមប្រទេស G20 ទុកចិត្តលើខ្លួនក្នុងការប្រយុទ្ធទល់នឹងវិបត្តិសេដ្ឋកិច្ច
ក្រោយពីបានជួបពិភាក្សាគ្នាអស់រយៈពេលពីរថ្ងៃ ជំនួបកំពូល G20 បានត្រូវបិទបញ្ចប់នៅថ្ងៃទី១៩មិថុនាម្សិលមិញនៅទីក្រុងឡូសកាបូសនៃប្រទេសម៉ិកស៊ិក។ ក្នុងខណៈពេលដែលសេដ្ឋកិច្ចពិភពលោកកំពុងជួបនឹងវិបត្តិដ៏សែនធ្ងន់ធ្ងរ ប្រមុខរដ្ឋនិងប្រមុខរដ្ឋាភិបាលនៃក្រុមប្រទេស G20 បានសន្យាថា នឹងខិតខំធ្វើយ៉ាងណាឲ្យកំណើនសេដ្ឋកិច្ចពិភពលោកមានសន្ទុះឡើងវិញ ហើយវិបត្តិសេដ្ឋកិច្ចនិងហិរញ្ញវត្ថុនៅអឺរ៉ុបគឺជាប្រធានបទដែលគេលើកយកមកពិភាក្សាគ្នាយ៉ាងផុសផុល។
ចុះផ្សាយនៅថ្ងៃ៖
នាឱកាសជំនួបកំពូល G20 នៅទីក្រុងឡូសកាបូសនៃប្រទេសម៉ិកស៊ិក អ្នកដឹកនាំអឺរ៉ុបបានសន្យាយ៉ាងមុតមាំថា នឹងចាត់វិធានការធ្វើឲ្យមានសមាហរ័ណកម្មថវិកានិងសមាហរ័ណកម្មសេដ្ឋកិច្ចនៅអឺរ៉ុប។ វិធានការទាំងនោះមានដូចជា ការត្រួតពិនិត្យទៅលើធនាគារ ការដំឡើងមូលធនរបស់ធនាគារដែលកំពុងមានការលំបាក ការរៀបចំឲ្យមានយន្តការសម្រាប់ជួយដោះស្រាយបញ្ហាធនក្ស័យ។ ទាំងនេះសុទ្ធសឹងជាកិច្ចសន្យានិងជាវិធានការដែលក្រុមប្រទេសអឺរ៉ុបនៅជំនួបកំពូល G20ត្រូវអនុវត្តឲ្យបានឆាប់រហ័ស ដើម្បីធ្វើឲ្យទីផ្សារហិរញ្ញវត្ថុមានស្ថិរភាព ហើយភាពបន្ទាន់និងភាពចាំបាច់នេះ លោកប្រធានាធិបតីបារាំងហ្វ្រង់ស័រហូឡង់ក៏យល់ដឹងយ៉ាងជាក់ច្បាស់ដែរ។
គួរកត់សម្គាល់ថា le Fonds européens de stabilité ឬ “មូលនិធិអឺរ៉ុបសម្រាប់ស្ថិរភាព”ក៏មានរួចហើយ ហើយ le mécanisme européen de stabilité ឬ យន្តការសម្រាប់ស្ថិរភាព ក៏នឹងឈានមកដល់ ដូច្នេះអ្វីៗក៏មានគ្រប់គ្រាន់សម្រាប់ដោះស្រាយវិបត្តិសេដ្ឋកិច្ចនិងវិបត្តិហិរញ្ញវត្ថុនៅអឺរ៉ុប។ មិនតែប៉ុណ្ណោះ មូលនិធិរូបិយវត្ថុអន្តរជាតិ FMI ក៏ដំឡើងបរិមាណនៃមូលនិធិរបស់ខ្លួន អ៊ីចឹងគេត្រូវតែប្រើវិធានការនិងមធ្យោបាយទាំងនេះឲ្យបានត្រឹមត្រូវនិងឲ្យបានសមសួន ដើម្បីប្រយុទ្ធប្រឆាំងទល់នឹងវិបត្តិសេដ្ឋកិច្ចនិងវិបត្តិហិរញ្ញវត្ថុដែលបានធ្វើឲ្យប្រទេសមួយចំនួនក្នុងទ្វីបអឺរ៉ុបទទួលរងគ្រោះយ៉ាងសែនធ្ងន់ធ្ងរ។
នៅថ្ងៃសុក្រខាងមុខនេះ ប្រមុខដឹកនាំនៃប្រទេសមហាអំណាចសេដ្ឋកិច្ចអឺរ៉ុបសំខាន់ទាំងបួនក្នុងតំបន់ចាយប្រាក់អឺរ៉ូពោលគឺមាន(អាល្លឺម៉ង់ បារាំង អ៊ីតាលី និងអេស្ប៉ាញ)នឹងត្រូវជួបពិភាក្សាគ្នាក្នុងជំនួបកំពូលតូចមួយនៅទីក្រុងរ៉ូម ដើម្បីរិះរកជំហររួមគ្នាមួយ មុននឹងជួបប្រជុំគ្នាជាចុងក្រោយនៅក្នុងជំនួបកំពូលអឺរ៉ុបនៅទីក្រុងព្រុចសែលនៅថ្ងៃទី២៨និង២៩ខែមិថុនាឆ្នាំ២០១២នេះ ដើម្បីស្វែងរកដំណោះស្រាយឲ្យវិបត្តិសេដ្ឋកិច្ចនិងវិបត្តិហិរញ្ញវត្ថុដែលកំពុងគំរាមប្រទេសអេស្ប៉ាញនិងប្រទេសអ៊ីតាលី។ ដូច្នេះ“ជំនួបកំពូលតូច”នេះគឺពិតជាឱកាសមួយប្រពៃសម្រាប់អ្នកដឹកនាំនៃប្រទេសធំៗស្វែងរកការបង្រួបបង្រួមគ្នា មុននឹងមានជំនួបកំពូលអឺរ៉ុបនៅទីក្រុងព្រុចសែល។
នាឱកាសជំនួបកំពូល G20 នៅប្រទេសម៉ិកស៊ិក លោកប្រធានាធិបតីអាមេរិកបារ៉ាក់អូបាម៉ាបានខិតខំយ៉ាងក្រៃលែង ក្នុងការជួយជំរុញឲ្យប្រទេសអឺរ៉ុបសំខាន់ៗដែលបានស្គាល់ការបែកបាក់គ្នាមុនជំនួបកំពូល G20 ឲ្យខិតជិតរួបរួមគ្នា ដើម្បីរិះរកដំណោះស្រាយរួមគ្នាឲ្យវិបត្តិសេដ្ឋកិច្ចនិងវិបត្តិហិរញ្ញវត្ថុដែលកំពុងគំរាមប្រទេសក្នុងតំបន់ចាយប្រាក់អឺរ៉ូ។ លោកអូបាម៉ាមានក្តីបារម្ភពុំតិចឡើយនៅចំពោះមុខស្ថានការណ៍ដ៏គ្រោះថ្នាក់នៃប្រទេសអឺរ៉ុប។
លោកប្រធានាធិបតីអាមេរិកបារ៉ាក់អូបាម៉ាក៏បានផងដែរធ្វើការសរសើរដល់ការប្តេជ្ញាចិត្តហើយនិងវិធានការដ៏មហិច្ឆតារបស់ក្រុមប្រទេសអឺរ៉ុប ក្នុងការស្វែងរកដំណោះស្រាយឲ្យវិបត្តិសេដ្ឋកិច្ចនិងវិបត្តិហិរញ្ញវត្ថុនៅអឺរ៉ុបនិងនៅលើពិភពលោកទាំងមូល។
ជំនួបកំពូល G20 នៅប្រទេសម៉ិកស៊ិកនេះ គឺជាជោគជ័យសម្រាប់អ្នកដឹកនាំនៃប្រទេសអឺរ៉ុបសំខាន់ៗក្នុងតំបន់ចាយប្រាក់អឺរ៉ូ ទោះបីជាមានសម្ពាធយ៉ាងណាក៏ដោយ ក៏ក្រុមប្រទេសអឺរ៉ុបសំខាន់ៗបានធ្វើឲ្យសមាជិកនៃក្រុមប្រទេស G20 មានទំនុកចិត្តកក់ក្តៅឡើងវិញ។
ជំនួបកំពូល G20 នៅទីក្រុងឡូសកាបូសនៃប្រទេសម៉ិកស៊ិកគឺជាឱកាសមួយដ៏ប្រពៃសម្រាប់ ប្រទេសអឺរ៉ុបសំខាន់ៗក្នុងតំបន់ចាយប្រាក់អឺរ៉ូបង្ហាញឲ្យឃើញនូវការប្តេជ្ញាចិត្តរបស់ពួកគេក្នុងការពន្លឿនសមាហរ័ណកម្មអឺរ៉ុប ដើម្បីជួយដោះស្រាយវិបត្តិសេដ្ឋកិច្ចនិងវិបត្តិប្រាក់បំណុលនៅក្នុងតំបន់អឺរ៉ូ។
គួរកត់សម្គាល់ថា ជំនួបកំពូលអឺរ៉ុបនៅថ្ងៃទី២៨និង២៩ខែមិថុនាខាងមុខនេះនៅទីក្រុងព្រុចសែល នឹងត្រូវពិភពលោកទាំងមូលទន្ទឹងរង់ចាំមើលក្រៃលែង ដោយហេតុថា នេះពិតជាឱកាសមួយសម្រាប់បញ្ជាក់បង្ហាញឲ្យឃើញថា តើអ្នកដឹកនាំនៃប្រទេសអឺរ៉ុបសំខាន់ៗក្នុងតំបន់ចាយប្រាក់អឺរ៉ូពិតជាគោរពពាក្យសន្យារបស់ខ្លួននៅមុខសហគមន៍អន្តរជាតិដែរឬទេ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ