បេឡារុស មិនចង់បាត់ទឹកដីខ្លួនដូចអ៊ុយក្រែនបាត់គ្រីមេ
ចុះផ្សាយនៅថ្ងៃ៖
ស្តាប់ - ០៤:៤២
ការនេះឆ្លុះឲ្យឃើញដោយច្បាប់បេឡារុស ស្តីអំពី ”ភាពសង្គ្រាម” ដែលនឹងចូល ជាធរមាន នៅថ្ងៃទី១កុម្ភៈខាងមុខទៅហើយ - ច្បាប់ដែលខ្លឹមសារវា គឺ ដើម្បីបញ្ចៀស កុំឲ្យមាន កើតឡើងនៅបេឡារុស ជា “ សេណារីយោគ្រីមេ “ ។ ប៉ុន្តែ ក្រុងមិនស្ក៏ជាផ្លូវការ ថ្លែងដោះសាថា មូលហេតុ គឺមកពី បេឡារុសព្រួយបារម្ភ ដោយឃើញបក្សសម្ព័ន្ធអូតង់ ចេះតែពង្រឹង ទីតាំង យោធានៅតាមប្រទេសបាល់ទិក គឺ លីទុយអានី ឡេតូនី អេស្តូនី និងប៉ូឡូញ នៅជិតខាងខ្លួន។
ជាការកត់សម្គាល់ នៅបេឡារុស ធ្លាប់មានទៅហើយ” ច្បាប់ស្តីអំពីភាពសង្គ្រាម “ ប៉ុន្តែ ក្រោយពីមានព្រឹត្តិការណ៍បោកកញ្ជ្រោកនៅគ្រីមេ លុះទាល់តែ ចប់ទៅដោយការផ្តាច់ទឹកដីនេះ ចេញពីអ៊ុយក្រែន ហើយភ្ជាប់វាមកនឹងសហព័ន្ធរុស្ស៊ី កាលពីខែមិនាឆ្នាំទៅមិញ លោកប្រធានាធិបតី បេឡារុស លូកាឆេនកូ បានបំផុសមកជាសំនើ ឲ្យតាក់តែងឡើងអត្ថបទថ្មី នៃច្បាបនេះ។
អត្ថបទថ្មី នៃច្បាប់នេះ ដែលក្នុងខែធ្នូកន្លងទៅ ត្រូវបានរដ្ឋសភាអនុម័ត ដាច់ស្រេចជាស្ថាពរ រួច បន្ទាប់មក ចុះហត្ថលេខាដោយប្រធានាធិបតី ទាំងកំណត់ឲ្យវាចូលជាធរមានចាប់ពីថ្ងៃ ទី១កុម្ភៈ ខាងមុខទៅ ចែងអំពី កាលៈទេសៈ២ សម្រាប់ប្រកាស”ភាពសង្គ្រាម” គឺថា ៖ ទី១ - មកពីមាន ការគម្រាមយោធា លើបេឡារុស , ទី២- មកពីមានការវាយលុក លើបេឡារុស។
ចាប់ពីអំណើះតទៅ ត្រូវចាត់ទុក ជា ការគម្រាមយោធា គឺ៖
-ការប្រកាសសង្គ្រាមទល់នឹងបេឡារុស ពីខាងរដ្ឋឯទៀត ទោះបី ពុំទាន់មានសកម្មភាពយោធាក្តី
-ការផ្តុំទ័ព របស់រដ្ឋមួយផ្សេង នៅតាមបណ្តោយព្រំដែនបេឡារុស ដែលរំលេចឲ្យឃើញពី ចេតនាមែនពិត ប្រើកងកម្លាំងប្រដាប់អាវុធ ប្រឆាំងនឹងឯករាជ្យ បូរណភាពដែនដី អធិបតេយ្យនិងរដ្ឋធម្មនុញ្ញរបស់បេឡារុស។
-ការលេចចេញមកជាភ្នក់ជម្លោះ ដោយមានប្រើអាវុធ ដែលគម្រាមដល់ រដ្ឋបេឡារុស។
-ការកេណ្ឌទ័ពក្នុងរដ្ឋមួយផ្សេង ក្នុងគោលដៅវាយប្រហារលើបេឡារុសតែម្តង។
-សេចក្តីថ្លែងការណ៍និងការសម្ញែងកម្លាំងសឹក ដែលធ្វើឡើងទាំងរំលោភលើ ធម្មនុញ្ញអ.ស.ប.និងដែលចង្អុលឲ្យឃើញពីភាពត្រៀមវាយលុក។
ហើយត្រូវចាត់ទុកជា ការវាយលុក គឺ ៖
-ការវាយរុករានចូលបេឡារុសនៃកងកម្លាំងប្រដាប់អាវុធ ពីខាងរដ្ឋដ៏ទៃ ឫ ការកាន់កាប់ដែនដី បេឡារុស ដោយកងទ័ពរដ្ឋផ្សេង ទោះបីការកានកាប់នោះ មានលក្ខណៈបណ្តោះអាសន្នក្តី។
-ការភ្ជាប់ដែនដីបេឡារុស ទៅជាដែនដីរបស់រដ្ឋដ៏ទៃ ដោយកម្លាំងទ័ព។
-ការវាយប្រហារនៃកងអាកាសនៃកាំជ្រួចមីស្ស៊ីល ឫអាវុធណាផ្សេង ប្រឆាំងបេឡារុស។
-ការបញ្ជូនដោយរដ្ឋមួយផ្សេងឲ្យចូលក្នុងដែនដីបេឡារុស បែបយ៉ាងជា ក្រុមជនប្រដាប់អាវុធ ជាកងកម្លាំងមិនមែនជាទ័ពសកម្ម ជាពួកទាហានស៊ីឈ្នួល ឫក៏ជាអង្គភាពទ័ពសកម្មតែម្តងដែលប្រើអាវុធមែនពិតប្រឆាំងបេឡារុស។
ដោយហេតុថា អត្ថបទថ្មីនៃច្បាប់បេឡារុសស្តីអំពីភាពសង្គ្រាម បានពណ៏នាជាឧទាហរណ៍ គឺ បាតុភូតដែលហៅថា មនុស្សបៃតង ស្លៀកពាក់ឯកសណ្ឋានប៉ារ៉ា គ្មានសញ្ញាសម្គាល់ ដែលបាន វត្តមានមួយរយៈពេល នៅគ្រីមេ លុះទាល់តែទឹកដីគ្រីមេ របូតចេញពីអ៊ុយក្រែន ហើយភ្ជាប់មកនឹងរុស្ស៊ី បានជា ពួកអ្នកវិភាគ សន្និដ្ឋានអំពីច្បាប់នេះ ថារំលេចឲ្យឃើញ “សេណារីយោគ្រីមេ”។
គួរនិយាយថា ដោយថ្លែងក្នុង មហាសន្និសីទកាសែតកាលពីខែធ្នូ តបនឹងសំនួរទាក់ទងនឹង មនុស្សបៃតង នោះ លោកប្រធានាធិបតីពូទីន ហាក់បីបានសារភាពថា ពួកគេជាយោធា នៃ កងនាវារុស្ស៊ី ប្រចាំស្រាប់នៅទៀបកោះគ្រីមេ មាត់់សមុទ្រខ្មៅ ដែលគ្រាន់តែជួយធានាឲ្យមានសណ្តាប់ធ្នាប់និងសុវត្ថិភាពក្នុងដំណើរប្រព្រឹត្តទៅនៃប្រជាមតិនៅទីនោះ។
ដើម្បីរំសាយការចោទប្រកាន់ ដែលអាចប៉ះពាល់ដល់រុស្ស៊ី ជាសម្ព័ន្ធមិត្តដ៏ជំនិត ប៉ុន្តែដែលត្រូវ បេឡារុសនៅខ្វះជំនឿទុកចិត្តនៅឡើយ ទីក្រុងមិនស្ក៏ សង្កត់ធ្ងន់ថា ចំណុចមួយជាគន្លឹះ នៃច្បាប់ស្តីអំពីភាពសង្គ្រាមនោះ គឺថា ៖
-ត្រូវចាត់ទុកជាការវាយលុកលើបេឡារុស ក៏ទាំងអំពើឈ្លានពានប្រឆាំងនឹង រដ្ឋណាផ្សេង ក៏ ដោយ ដែលជាសមាជិកនៃ “អង្គការសន្ធិសញ្ញាស្តីអំពីសន្តិសុខរួម” គឺ រុស្ស៊ី អារមេនី កាហ្សាក់ ស្ថាន កៀហ្គីស៊ីស្ថាន តាដហ្ស៊ីគីស្ថាន។
ក្រសួងការពារជាតិបេឡារុស បានចេញសេចក្តីថ្លែងការណ៍ថា ពេលដែល ច្បាប់បេឡារុស ស្តីអំពីភាពសង្គ្រាម ត្រូវចូលជាធរមាននៅថ្ងៃទី១កុម្ភៈខាងមុខទៅហើយ បក្សសម្ព័ន្ធអូតង់ ចេះតែ បន្តពង្រឹងទីតាំងខ្លួន នៅតាមប្រទេសសមាជិកខ្លួន បែបយ៉ាង លីទុយអានី ឡេតូនី អេស្តូនី និង ប៉ូឡូញ នៅជាប់នឹងព្រំដែនបេឡារុសតែម្តង ហើយពង្រឹងនេះ មិនមែនគ្រាន់ តែដោយកង អាកាសប៉ុណ្ណោះទេ តែក៏ទាំងដោយកងយានយន្តពាសដែកទៅផង។
ទោះយ៉ាងណាក្តី ដោយវិភាគអំពីខ្លឹមសារច្បាប់ថ្មីនៅបេឡារុស កាសែតមួយនៃក្រុងម៉ូស្គូ កត់សម្គាល់ថា បើកាលមុន សម្តីលោកប្រធានាធិបតីលូកាឆេនកូ តែងបានវាយសំពង ទៅលើបស្ចិមលោកសុទ្ធសាធ នោះឥឡូវ ជាញឹកញយមានបន្ឡឺឡើងនូវមតិដែលថា សម្រាប់បេឡារុស ស្រាប់តែមានលេចចេញមកជាខ្មាំងថ្មី ដែលគ្រោះថ្នាក់ ខ្មាំងនេះ គឺប្រទេសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ