រុស្ស៊ី អស់៣ថ្ងៃជាប់ បានធ្វើម្ចាស់ផ្ទះ ទទួលជំនួបកំពូលអន្តរជាតិ ពីរតែម្តង
ចុះផ្សាយនៅថ្ងៃ៖
ស្តាប់ - ០៥:១២
ថ្ងៃ៨និង៩កក្កដា គឺជំនួបកំពូលក្រុម៥ប្រទេសធំៗ ហៅថា BRICS ហើយថ្ងៃ១០ កក្កដានេះ គឺជំនួបកំពូលនៃ “អង្គការសហប្រតិបត្តិការក្រុងសៀងហៃ” OCS ដែលទាំងពីរ សុទ្ធតែប្រព្រឹត្តទៅនៅក្រុងរុស្ស៊ី អ៊ូហ្វា ចម្ងាយ ប្រមាណ១.២០០គ.ម. ប៉ែកខាងកើតពី រដ្ឋធានី ម៉ូស្គូ។ លោកប្រធានាធិបតីពូទីន ជាម្ចាស់ផ្ទះ បានទទួលនៅទីនោះ គឺប្រមុខរដ្ឋបរទេស ដល់ ទៅ១៤ រូប អមដោយគណៈប្រតិភូសរុបទៅ ចំនួន១ម៉ឺន៥ពាន់នាក់។ គ្រាន់តែអ្នកកាសែតដែល តាមដានយកការណ៍ មានដល់១.៥០០នាក់ ដែលច្រើនជាងគេ គឺអ្នកកាសែតចិននិងរុស្ស៊ី ដ្បិតទាំងចិន ទាំងរុស្សី ជាសមាជិកអង្គការទាំងពីរ។
បញ្ហាមួយជាគោលនៃជំនួបកំពូល “អង្គការសហប្រតិបត្តិការក្រុងសៀងហៃ” OCSនៅថ្ងៃ១០កក្កដានេះ គឺការទទួលឥណ្ឌា និង ប៉ាគីស្ថាន ដែលជាសមាជិក-សង្កេតការណ៍អស់ ១០ឆ្នាំមកហើយ ឲ្យក្លាយទៅជាសមាជិកពេញលក្ខណៈ របស់អង្គការនេះ ទៅតាមសំណូមពរ ប្រទេសទាំងពីរ។
លោកប្រធានាធិបតីរុស្ស៊ី ពូទីន ក្នុងជំនួបទ្វេភាគីដាច់ដោយឡែក ជាមួយលោកនាយករដ្ឋមន្ត្រី ឥណ្ឌា Narendra Modi បានថ្លែងឲ្យដឹងថា ពិតជាក្នុងជំនួបកំពូលលើកនេះ ដែល OCS នឹង ចាប់ផ្តើមរបៀបរបបទទួលតាមនីតិវិធី ឲ្យរដ្ឋឥណ្ឌា ក្លាយទៅជាសមាជិកពេញសិទ្ធិមែន។ លោកនាយករដ្ឋមន្ត្រីឥណ្ឌា ពីចំណែកខ្លួន បានថ្លែងអំណរគុណ ទៅកាន់លោកពូទីន ដោយគូសបញ្ជាក់ថា ពិតជាក្រោមអធិបតីភាពប្រមុខរដ្ឋរុស្ស៊ី ដែល OCS ដោះស្រាយបញ្ហានេះ បានរួច ដូចក្តីប្រាថ្នាចង់បានរបស់ឥណ្ឌា។
ដំណឹងនេះ ត្រូវបានប្រព័ន្ធផ្សព្វផ្សាយរុស្ស៊ី ធ្វើអត្ថាធិប្បាយថា ការទទួលឥណ្ឌានិងប៉ាគីស្ថាន ដែលសុទ្ធតែជាប្រទេសមានអាវុធបរមាណូ ឲ្យចូលជាសមាជិកថ្មីរបស់ OCS ជាទី ដែលមាន មហាអំណាចបរមាណូពីរស្រាប់ទៅហើយ គឺរុស្ស៊ី និង ចិន ពិតជានឹងបង្កើនសក្តានុពល មិនគ្រាន់តែនយោបាយប៉ុណ្ណោះទេ តែជាពិសេស គឺសក្តានុពលយោធា របស់អង្គការតំបន់នេះ លុះទាល់តែបង្ខំបស្ចិមលោក ឲ្យផ្តោតការយកចិត្តទុកដាក់។
ឥណ្ឌា និងប៉ាគីស្ថាន ដែលមើលមុខគ្នាមិនសូវចំពេលវត្តមានក្នុងបរិវេណ OCS តាម យោបល់លោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ្រ៉ូវ គឺនឹងទទួលលទ្ធភាពសម្រាប់សន្តិសហវិជ្ជមាន ពុំខាន។
ទាក់ទងនឹងករណីប្រទេសអ៊ីរ៉ង់ ដែលក៏ជាសមាជិកសង្កេតការណ៍ របស់ OCS តាំងពីឆ្នាំ ២០០៥ ដែរ ហើយក៏ចង់ចូលជាសមាជិកពេញសិទ្ធិដែរ នោះគឺត្រូវលោកប្រមុខការទូតរុស្ស៊ី ថ្លៃងក្នុងសន្និសីទកាសែតថា ក្រុងម៉ូស្គូចេញមុខ ដើម្បីដោះស្រាយបញ្ហានេះដោយអនុគ្រោះ។ គាត់លំអិតថា ស្របនឹងធម្មនុញ្ញ OCS ប្រទេសណាដែល ជាប់ក្នុងទណ្ឌកម្មអ.ស.ប. គឺមិនអាច ក្លាយជាសមាជិកពេញលក្ខណៈរបស់ OCS ឡើយ។ ប៉ុន្តែលោក ឡាវ្រ៉ូវ កត់សម្គាល់ថា កិច្ចព្រមព្រៀងរវាង ៦ប្រទេសអន្តរការីអន្តរជាតិ និង អ៊ីរ៉ង់ ត្រៀមបាន ៩៨%ហើយ រួចក្រោយពី ឯកសារនេះបានទទួលការចុះហត្ថលេខា ទណ្ឌកម្មនោះ នឹងត្រូវដកចេញពីអ៊ីរ៉ង់ បន្តិចម្តងៗ។
ជាការរំលឹក “អង្គការសហប្រតិបត្តិការក្រុងសៀងហៃ” OCS ដែលប្រសូតមកក្នុងឆ្នាំ២០០១ មាន៦ប្រទេសជាសមាជិកស្ថាបនិក គឺ ម្ខាង ចិនប៉េកាំង ម្ខាងទៀត គឺ រុស្ស៊ី និង ៤ប្រទេសតំបន់ អាស៊ីកណ្តាលនិយាយឲ្យចំ កាហ្សាក់ស្ថាន កៀហ្ស៊ីស៊ីស្ថាន តាហ្ស៊ីគីស្ថាន អ៊ូសបេគីស្ថាន ប្រសិនបើ បូកនឹងឥណ្ឌា និង ប៉ាគីស្ថាន នៅអាស៊ីខាងត្បូង និង អ៊ីរ៉ង់ នៅអាស៊ីនិរតី គឺនឹងលាតសន្ធឹង លើលំហធំសំបើមនៃទ្វីបអាស៊ី និង សឹងមួយចំហៀងទ្វីបអឺរ៉ុប។
មានលក្ខន្តិកៈជាសមាជិកសង្កេតការណ៍ដែរ ក៏ទាំងអាហ្វហ្កានីស្ថាន និង ម៉ុងហ្គោលី។
នៅមាន៣ប្រទេសទៀត ត្រូវបានទទួលស្គាល់ជា ដៃគូសន្ទនា របស់ OCS គឺ បេឡារុស តួកគី ស្រីលង្កា។ ប៉ុន្តែ លោកប្រធានាធិបតីរុស្ស៊ីពូទីន ក្នុងក្របខ័ណ្ឌជំនួបកំពូលនេះ បានប្រកាសថា បេឡារុស ចាប់ពីអំណើះតទៅ នឹងក្លាយទៅជាសមាជិក-សង្កេតការណ៍ របស់អង្គការនេះ។
ពេលថ្មីៗ ប្រទេស អេហ្ស៊ីប បានដាក់ពាក្យទៅកាន់លេខាធិការដ្ឋាន OCS ចង់ក្លាយជា ដៃគូសន្ទនា របស់អង្គការតំបន់នេះ។
ទាក់ទងនឹងរឿងនេះ ថ្លែងថ្ងៃ១៧មេសាកន្លងទៅក្នុងសន្និសីទកាសែតនៅម៉ូស្គូ តំណាងរបស់ ប្រធានាធិបតីរុស្ស៊ីខាងកិច្ចការ OCS លោក Bakhtier Hakimov បានឲ្យដឹងថា ប្រទេសកម្ពុជា បានដាក់ពាក្យ ដើម្បីក្លាយជា ដៃគូសន្ទនា របស់ OCS ផងដែរ។ មកពីមូលហេតុនេះ បានជា ស្ថានទូតខ្មែរនៅម៉ូស្គូ នៅរង់ចាំអ៊ុតមើលសេចក្តីសម្រេច របស់ជំនួបកំពូល OCS ថ្ងៃនេះ។
គោលដៅមួយជាគន្លឹះចោទដោយអង្គការសហប្រតិបត្តិការក្រុងសៀងហៃ OCS គឺ ទ្រទ្រង់និងពង្រឹងសន្តិភាពសន្តិសុខ និងស្ថិរភាពនៅតំបន់ តាមផ្លូវប្រយុទ្ធរួមគ្នាទល់នឹងភេរវនិយម ទល់នឹងនិន្នាការផ្តាច់ទឹកដីនិយមជ្រុលនិយមប្រឈម នឹងចរាចរណ៍ខុសច្បាប់នៃគ្រឿងញៀននិងអាវុធ ប្រឈមនឹងឧក្រិដ្ឋកម្មឆ្លងដែន។ល។
រីឯជំនួបកំពូល BRICS លើកនេះជាលើកទី៧ ចប់ទៅល្ងាចមិញ បានអនុម័ត យុទ្ធសាស្ត្រនៃភាពជាដៃគូសេដ្ឋកិច្ចរហូតដល់ឆ្នាំ ២០២០ រវាង ៥ប្រទេសធំៗជាសមាជិក ដែលមានសេដ្ឋកិច្ច កំពុងលូតលាស់ដោយចង្វាក់លឿន គឺ ប្រេស៊ីល រុស្ស៊ី ឥណ្ឌា ចិន អាហ្វ្រិកខាងត្បូង ឆ្ពោះទៅ ពន្លឿនការអភិវឌ្ឍន៍សង្គម-សេដ្ឋកិច្ច និង បង្កើនសមត្ថភាពប្រកួតប្រជែងនៅក្នុងលោក របស់ BRICS ក្រុមប្រទេសដែលមានបណ្តាជនសឹងពាក់កណ្តាលនៃបណ្តាជនលើផែនដី និងមាន ទំហំផលិតផលសរុបក្នុងស្រុក ហៅថា GDP ស្មើនឹង ៣០% នៃGDP ក្នុងលោកទាំងមូល។
ជាការកត់សម្គាល់ ខុសពី អង្គការ OCS ធម្មនុញ្ញរបស់ BRICS មិនអនុញ្ញាតឲ្យពង្រីកក្រុម ៥ប្រទេសនេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ