អន្តោប្រវេសន៍ ៖ បាល់កង់ផ្លូវថ្មីសម្រាប់រត់ទៅ (អឺរ៉ុបខាង) លិច
ចុះផ្សាយនៅថ្ងៃ៖
ស្តាប់ - ០៤:៤០
មានគ្រោះថ្នាក់តិចជាងតាមផ្លូវសមុទ្ទមេឌីទែរ៉ាណេ ផ្លូវគោកបាល់កង់ បានទទួលចំណាប់អារម្មណ៍ ពីក្រុមមេខ្យល់រកស៊ីជួញដូរអន្តោប្រវេសន៍មកអឺរ៉ុបកាន់តែខ្លាំងឡើង។ ចំនួនអន្តោប្រវេសន៍មកពីស៊ីរី អ៊ីរ៉ង់ អាហ្វហ្កានីស្ថាន បានធ្វើដំណើរ មកដល់ទឹកដីអឺរ៉ុប ទាំងរយៗនាក់ ជារៀងរាល់ថ្ងៃ។ បន្ទាប់ពីអ៊ីតាលី ឥលូវដល់វេន ក្រិក ហុងគ្រី អាល្លឺម៉ង់ ដែលត្រូវទប់ទល់នឹងចរន្តអន្តោប្រវេសន៍ដ៏គំហុក មកពីខាងកើត។
ចរន្តអន្តោប្រវេសន៍មកអឺរ៉ុបក៏មិនខុសអ្វីពីទឹកបាក់ទំនប់ ទប់ខាងកើតធ្លាយខាងលិច ! បន្ទាប់ពីពុះកញ្ជ្រោលខ្លាំង នាំគ្នាឆ្លងសមុទ្ទមេឌីទែរ៉ាណេ ឥលូវមេខ្យល់បានរកឃើញផ្លូវមួយទៀត ហើយមានសកម្មភាពកាន់តែខ្លាំងឡើងៗជាលំដាប់ ! គឺផ្លូវគោកកាត់តាមតំបន់បាល់កង់។ ជាផ្លូវដែលអន្តោប្រវេសន៍ ភាគច្រើនជាជនជាតិស៊ីរី និងអ៊ីរ៉ាក់ ព្រមទាំងអាហ្វហ្កានីស្ថាន ប្រកាន់យកដើម្បីឆ្លងមកសហភាពអឺរ៉ុប (អឺរ៉ុបខាងលិច) និង អឺរ៉ុបខាងជើង។
គន្លងផ្លូវនេះមិនមែនថ្មី តែទើបត្រូវបានពួកមេខ្យល់ចាប់អារម្មណ៍ និងបង្កើនសកម្មភាពរត់ពន្ធអន្តោប្រវេសន៍ខ្លាំង។ ជាដំណើរផ្លូវដែលត្រូវឆ្លងកាត់ជាដំបូង ប្រទេសតួកគី ក្រិក ម៉ាសេដ្វាន សែរប៊ី ហុងគ្រី ដើម្បីភ្ជាប់ទិសដៅចុងក្រោយ គឺអាល្លឺម៉ង់ឬស៊ុយអែត។ ហេតុអ្វីមេខ្យល់ប្តូរទម្លាប់ មិនប្រើផ្លូវខាងត្បូង ឆ្លងកាត់សមុទ្ទមេឌីទែរ៉ាណេ ? មូលហេតុចម្បងដែលងាយឆ្លើយជាងគេ គឺទំនងមកពីផ្លូវគោកនេះមិនសូវមានគ្រោះថ្នាក់ខ្លាំង និងខ្លីជាង។ មិនចាំបាច់ឆ្លងកាត់ប្រទេសអេហ្ស៊ីប ដែលអាចជួបពួកជីហាត ឬមិនបាច់ទៅលីប៊ី ដែលមានវិបត្តិនយោបាយ និងជាពិសេសមិនប្រថុយជីវិត ក្នុងមហាសាគរមេឌីទែរ៉ាណេ ដែលបានសម្លាប់អន្តោប្រវេសន៍អស់ជាង២០០០នាក់ ក្នុងរយៈពេល៦ខែដើមឆ្នាំ២០១៥នេះ។
ជនអន្តោប្រវេសន៍សុខចិត្តប្រឈមមុននឹងត្រួតពិនិត្យរបស់ប៉ូលិសអឺរ៉ុប លើដីគោក ជាជាងរត់តាមទូកកញ្ចាស់ឆ្លងសមុទ្ទ។ បើតាមឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន មានជនភៀសខ្លួន១សែនពីរម៉ឺនបួនពាន់នាក់ បានជ្រើសរើសរត់តាមប្រទេសក្រិក ឯតាមអ៊ីតាលីមានត្រឹម៩ម៉ឺន៨ពាន់នាក់ប៉ុណ្ណោះ។
ហុងគ្រី ជញ្ជាំងប្រឆាំងអន្តោប្រវេសន៍
ច្រកទ្វារចូលអឺរ៉ុបថ្មីនេះ មានឈ្មោះថា កូស ! ជាកូនកោះតូចមួយរបស់ក្រិក ស្ថិតនៅចម្ងាយតែ ៦គីឡូមែត្រពីត្រើយតួកគី គឺខ្លីជាងការឆ្លងពីត្រើយលីប៊ី មកកោះឡំប៉េដូសា អ៊ីតាលីឆ្ងាយណាស់ដែលមានប្រវែងដល់ទៅ៣៣០ឝ.ម.។ មួយថ្ងៃៗមានជនភៀសខ្លួនជាង២០០នាក់បានឆ្លងដល់។ ចំពេលដែល អាជ្ញាធរក្រិកខ្វះសព្វខ្វះគ្រប់ មិនខ្វល់ខ្វាយនឹងទទួល និងឱ្យអាហារ អន្តោប្រវេសន៍បន្តដំណើរទាំងត្រដាបត្រដួស ជាដំណាក់កាលទីពីរឆ្លងព្រំដែនដោយខុសច្បាប់ទៅប្រទេសម៉ាសេដ្វាន។ គេចពីពួកបងធំបនឧក្រិដ្ឋ ម៉ាហ្វីយ៉ា ក្រុមចាប់ជំរិតហើយ ជនភៀសខ្លួនទាំងនោះត្រូវតោងឡើងរបងកម្ពស់៤ម៉ែត្រ ប្រវែង១៧៥គីឡូម៉ែត្រសង់ខ័ណ្ឌចែកសែរប៊ីនិងហុងគ្រី ជារនាំងទប់អន្តោប្រវេសន៍។
វិញ្ញាសាចុងក្រោយ គឺរាល់គ្រប់ដំណាក់កាល គេត្រូវយកឈ្នះបរិយាកាសស្អប់ខ្ពើមអន្តោប្រវេសន៍។ ឧទាហរណ៍ នៅប្រទេសហុងគ្រី នាយករដ្ឋមន្ត្រីជាតិនិយម វិច័រ អ័របង់ មាននយោបាយជ្រុលនិយមប្រឆាំងនឹងអន្តោប្រវេសន៍ ចាត់ទុក “ជនភៀសខ្លួនជាភេរវជន មកដណ្តើមការងារ ដណ្តើមបាយ និងជំនួយពេលរដ្ឋហុងគ្រី។ នៅឆ្នាំ២០១៥នេះ ចំនួនអ្នកសុំសិទ្ធិជ្រកកោនបានកើនឡើង៥០ដងបើប្រៀបទៅនឹងឆ្នាំ២០១២ និង៥ដងបើប្រៀបទៅនឹងឆ្នាំ២០១៤។
ជំរំលត់ដំណាហ្សីក្លាយជាជំរកអន្តោប្រវេសន៍
សម្រាប់អ្នកមានសំណាងបានទៅដល់អាល្លឺម៉ង់ ដំណើរផ្សងព្រេងមិនប្រាកដថាចប់ទេ។ ប្រឈមមុខនឹងកំណើនយ៉ាងគំហុកនៃចរន្តអន្តោប្រវេសន៍ កន្លែងទទួលសង្គ្រោះបន្ទាន់ពេញ សន្ទុះប្រកាន់ពូជសាសន៍បានស្តែងឡើងកាន់តែខ្លាំង វិបត្តិមនុស្សធម៌ កំពុងក្លាយជាល្បែង។ អាល្លឺម៉ង់នៅឆ្នាំនេះ បានទទួលអន្តោប្រវេសន៍ច្រើនបំផុតមិនដែលជួបប្រទះពីមុនឡើយ។ ជំរំលត់ដំរបស់ពួកណាហ្ស៊ី បានកែទៅជាជម្រកទទួលជនភៀសខ្លួន។ សម្រាប់លោកស្រី អង់ហ្គឺឡា មែរកិល ស្ថានការណ៍នេះ គឺអាទិភាពនយោបាយចំបងរបស់អាល្លឺម៉ង់ សំខាន់ជាងវិបត្តិក្រិក ឬស្ថិរភាពអឺរ៉ូទៅទៀត។
ម្យ៉ាងទៀត ក្រៅពីបង្ខំចិត្តត្រូវជួយអន្តប្រវេសន៍មកស៊ីរី ឬអ៊ីរ៉ាក់ ដែលគេចសង្គ្រាម អាល្លឺម៉ង់ ព្រួយបារម្ភនឹងការឆ្លៀតឱកាសរបស់ជនពនេចររ៉ូមានី ឬរ៉ូម នៅកូសូវូ ឬសែរប៊ី មកធ្វើជាជនភៀសខ្លួន សុំសិទ្ធិជ្រកកោននយោបាយ។ ក្នុងពេលរង់ចាំសន្និសីទជាន់ខ្ពស់ ដោះស្រាយវិបត្តិអន្តោប្រវេសន៍ នៅខែតុលាខាងមុខ លោកស្រីមែរកិល បានអំពាវនាវឱ្យអឺរ៉ុបអនុវត្តនយោបាយអន្តោប្រវេសន៍រួម។ ចំណែកសហភាពអឺរ៉ុប បានស្នើសុំឱ្យក្រុមប្រទេសនៅតំបន់បាល់កង់ ពង្រឹងការត្រួតពិនិត្យព្រំដែន របស់ខ្លួន ប៉ុន្តែស្ថានការណ៍ហាក់គ្រប់គ្រងលែងបានទៅហើយ បើមើលទៅលើទំហំនៃវិបត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ