ភេរវកម្មលើរថភ្លើងមិនសម្រេច កំពុងបញ្ចេះសេវាសន្តិសុខនិងសេរីភាពធ្វើដំណើរក្នុងអឺរ៉ុប
ចុះផ្សាយនៅថ្ងៃ៖
ស្តាប់ - ០៥:០០
មានសំណួរជាច្រើនកំពុងចោទឡើង ក្រោយហេតុការណ៍ភេរវកម្មមិនបានសម្រេច កាលពីចុងសប្តាហ៍កន្លងទៅ នៅក្នុងរថភ្លើងដឹកអ្នកដំណើរThalys អាំស្តែដាំ-ប៉ារីស។ ផលវិបាកទីមួយ និងដោយផ្ទាល់ គឺ វិធានការរក្សាសន្តិសុខ។ គោលការណ៍ធ្វើដំណើរដោយសេរីក្នុងរង្វង់ប្រទេសអឺរ៉ុបជាសមាជិកតំបន់Schengen ក៏ត្រូវបានអ្នកនយោបាយជាច្រើនយកមកចោទសួរឡើងវិញដែរ។ នាយករដ្ឋមន្ត្រីប៊ែលហ្សិក បានស្នើរៀបចំជំនួបប្រជុំបន្ទាន់ចតុភាគី បារាំង អាល្លឺម៉ង់ ហូឡង់ និងប៊ែលហ្សិក។ តើនឹងមានការបិទព្រំដែនក្នុងរវាងក្រុមប្រទេសជាសមាជិកអឺរ៉ុបវិញឬយ៉ាងណា ? តើភ្នាក់ងារសន្តិសុខអឺរ៉ុបធ្វើការយ៉ាងដូចម្តេច ? អឺរ៉ុបធូររលុងខ្លាំងឬបានជាភេរវជនអាចធ្វើសកម្មភាពបាន ?!
អាយុ២៥ឆ្នាំ មានកាំភ្លើងខ្លី កាំភ្លើងវែង គ្រាប់ទាំងចង្កោម ដល់ទៅ២៧០គ្រាប់ បញ្ចូលរួចជាស្រេច និងដបសាំងមួយលីត្រទៀត ក្នុងវ៉ាលី... មានឈ្មោះក្នុងបញ្ជីរបស់ភ្នាក់ងារសំងាត់បារាំង អេស្ប៉ាញទៀត ភេរវជន អាយូប អែលខាហ្សានី មានបំណងធ្វើសកម្មភាពប្រហារជីវិតមនុស្សឱ្យច្រើន តែសំណាងល្អមានអ្នកដំណើរ៦នាក់អាចបង្ក្រាបសកម្មភាពភេរវជន បញ្ចៀសគ្រោះសោកនាដកម្មបានទាន់ពេលវេលា !
ក្រោយហេតុការណ៍ភេរវកម្មរថភ្លើងឆ្លងប្រទេសមិនបានសម្រេចភ្លាម រដ្ឋមន្ត្រីក្រសួងមហាផ្ទៃបារាំង បានអំពាវនាវឱ្យមានការប្រុងប្រយ័ត្នខ្លាំងការពារសន្តិសុខបណ្តាញផ្លូវដែក បន្ថែមពីលើវិធានការដែលមានស្រាប់ ក្នុងក្របខ័ណ្ឌប្រយុទ្ធប្រឆាំងនឹងការគំរាមកំហែងភេរវកម្ម។ សំណើជាច្រើនផ្សេងទៀតក៏ត្រូវបានលើកឡើង ដូចជាត្រូវដាក់ការត្រួតពិនិត្យឆែកឆេរដូចជិះយន្តហោះជាដើម ប៉ុន្តែសំណើចុងក្រោយនេះ ត្រូវបានក្រុមហ៊ុនអយស្ម័យយានបារាំងច្រានចោល ដោយខ្លាចប៉ះពាល់ដល់សេដ្ឋកិច្ចជាតិ និងបើយោលទៅលើចំនួនអ្នកដំណើរវាល់លានក្នុងមួយថ្ងៃៗ។
នាយករដ្ឋមន្ត្រីប៊ែលហ្សិក បានធ្លោប្រលយពាក្យចង់ធ្វើវិសោធនកម្មសន្ធិសញ្ញាឆេនហ្កេនSchengen បង្រួមការបើកព្រំដែនក្នុងរង្វង់ប្រទេសជាសមាជិក ដោយត្រូវបង្កើនការត្រួតពិនិត្យតាមច្រកចូល ចាប់ដៃសហការជាមួយប៉ូលិស និងភ្នាក់ងារស៊ើបការណ៍ឱ្យបានកាន់តែខ្លាំង។
សេរីភាពនៃការដើរហើយឆ្លងប្រទេសដែលជាគោលការណ៍គ្រឹះមួយរបស់អឺរ៉ុប កំពុងរងសម្ពាធជាងពេលណាៗទាំងអស់។ សម្រាប់លោកនាយករដ្ឋមន្ត្រីប៊ែលហ្សិក ទន្ទឹមនឹងសេរីភាពនិងការអភិវឌ្ឍន៍ សិទ្ធិនេះក៏កំពុងត្រូវជនអាក្រក់យកមកធ្វើជាឈ្នាន់បំផ្លាញវិញ។
ប៉ុន្តែនៅមានចំណោទដ៏ធំមួយទៀត គឺវិធានការសន្តិសុខ ! ភេរវជន អាយូប អែលខាហ្សានី ជនជាតិម៉ារ៉ុក មានបណ្ណរស់នៅក្នុងប្រទេសអេស្ប៉ាញ អាចធ្វើដំណើរបានដោយសេរីក្នុងអឺរ៉ុប ធ្លាប់រស់នៅបារាំង ប៊ែលហ្សិក អាល្លឺម៉ង់ ជាប់ឈ្មោះក្នុងបញ្ជីខ្មៅគំរាមកំហែងសន្តិសុខជាតិ ឬហៅថាភាសាបារាំង Fichier S របស់អេស្ប៉ាញ និងបារាំង ជនអ៊ីស្លាមជ្រុលនិយម ដែលបានបង្កភេរវកម្មនៅភាគខាងត្បូងប្រទេសបារាំង មេរ៉ា ឬភេរវជន ពីរនាក់បងប្អួនបាញ់សម្លាប់ក្រុមអ្នកកាសែតCharlie Hebdo ឬកូលីបាលី បាញ់ផ្សារជីហ្វ កណ្តាលក្រុងប៉ារីស កាលពីខែមករាដើមឆ្នាំ នៅក្រុងប៉ារីស សុទ្ធតែមានឈ្មោះក្នុងបញ្ជី S ទាំងអស់។ ភេរវជន កូលីបាលី ត្រូវបានប៉ូលិសឆែកឆេរ១០ថ្ងៃមុនធ្វើសកម្មភាពសោះ។ តើមានប្រយោជន៍អ្វីដែលបង្កើតបញ្ជីខ្មៅហើយ តែបណ្តោយឱ្យពួកនេះធ្វើសកម្មភាពបានទៀត ?
បញ្ជីS ជាអ្វី ?
នៅប្រទេសបារាំង មានមនុស្សប្រមាណជាង៥ពាន់នាក់ ជាជនអ៊ីស្លាមជ្រុលនិយមជីហាត ឬជាសកម្មជនជ្រុលនិយម ជាចារកិច្ចបរទេស ជាពួកពាល... ជាប់ក្នុងបញ្ជីSដែលមានកំរិតគ្រោះថ្នាក់ដល់ទៅ១៦។ បញ្ជីនេះត្រូវបានភ្នាក់ងារបញ្ចូលព័ត៌មានជារៀងរាល់ថ្ងៃ ដោយភ្នាក់ងារសន្តិសុខផ្ទៃក្នុង បញ្ជាក់អំពីសកម្មភាពរបស់បុគ្គលជាប់ឈ្មោះ និងសម្រាប់ពញ្ញាក់ភាពអាសន្នភ្លាម ពេលឃើញមានសញ្ញាសង្ស័យអ្វីតូចមួយ។
តាំងពីពិភពលោកត្រូវប្រឈមមុខនឹងការគំរាមកំហែងជីហាតមក បញ្ជីនេះត្រូវចម្លងចូលក្នុងប្រព័ន្ធព័ត៌មានវិទ្យាSchengen។ ប៉ុន្តែផ្ទុយពីការគិតជាទូទៅ ជាប់ឈ្មោះក្នុងបញ្ជីS មិនមែនមានន័យថាមានការតាមដានជាប់ជាប្រចាំឡើយ ឬតាមដានម្តងម្កាលឡើយ។ គឺគ្រាន់តែ ជាឧបករណ៍តាមដានចលនារបស់បុគ្គលអាចមានគ្រោះថ្នាក់ ជាចំណុចសម្គាល់មួយ ដែលតម្រូវឱ្យមានការប្រុងប្រយ័ត្នជាប់រហូត និងបន្ថែមព័ត៌មាន ដើម្បីបង្កើនប្រសិទ្ធិភាព។ ប៉ុន្តែបញ្ជីនេះនឹងរលុបចោលឯង ក្នុងរយៈពេលពីរឆ្នាំ ប្រសិនបើគ្មាននរណាប៉ះពាល់។
ចំណែកប៉ូលិស នរគបាល ឬភ្នាក់ងារមានសមត្ថកិច្ចឆេកឆេរតាមផ្លូវ តាមអាកាសយានដ្ឋាន តាមរថភ្លើង ឬតាមប៉ុស្តិត្រួតពិនិត្យផ្សេងៗ មិនអាចដឹងថាបុគ្គលណាជាប់ឈ្មោះអេសទេ រួចផ្តលព័ត៌មានទៅថ្នាក់លើទេ បើមិនទៅបើកមើលសំណុំឯកសារបុគ្គលដែលតាមស្វែងរកទេនោះ និងគ្មានសិទ្ធិចាប់ខ្លួនបុគ្គលជាប់អេសណាទាំងអស់។ អញ្ចឹងហើយបានជាគ្មានការចាប់ខ្លួនភេរវជនអាយូប អែលខាហ្សានី ដែលជាប់ចំណាត់ថ្នាក់S 3 មានសញ្ញាលោតរោឡើងកាលពីថ្ងៃទី ១០ ឧសភា នៅអាកាសយានដ្ឋានប៊ែរឡាំង ពេលធ្វើដំណើរត្រលប់មកពីតួកគី។
យ៉ាងណាក៏ដោយ ក៏បញ្ជីនេះជាឯកសារស៊ើបការណ៍ដ៏មានប្រសិទ្ធិភាពមួយ ដោតបានជនជ្រុលនិយមមួយចំនួនធំជាដំណោតបញ្ជីS ប៉ុន្តែប្រព័ន្ធនេះនៅមានកំរិត ព្រោះត្រូវរំពឹងខ្លាំងពេកលើញាណមនុស្ស ទៅលើការគិត ភាពវាងវៃ និងរហ័សរហួនរបស់បុគ្គលអ្នកទទួលបន្ទុកត្រួតពិនិត្យការណ៍។ ម្យ៉ាងទៀត គេត្រូវឆ្លងកាត់ច្បាប់ ដំណើរការតុលាការដ៏ស្មុគស្មាញទម្រាំអាចតាមដានចាប់ខ្លួនបាន បុគ្គលសង្ស័យណាម្នាក់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ