សមភាពស្ត្រីបុរស និងការប្រែប្រួលអាកាសធាតុ
ចុះផ្សាយនៅថ្ងៃ៖
ស្តាប់ - ០៤:២២
សល់តែមិនដល់ពីរថ្ងៃទៀតតែប៉ុណ្ណោះដែល សន្និសីទអន្តរជាតិស្តីអំពីអាកាសធាតុនៅក្រុងប៉ារីស ត្រូវរកឱ្យឃើញកិច្ចព្រមព្រៀងប្រកបដោយមហិច្ឆតាទប់ស្កាត់ការឡើងកម្តៅនៃភពផែនដី។ នៅក្នុងថ្ងៃទី៨ នៃអង្គសន្និសីទ ការតស៊ូមតិបានផ្តោតជាសំខាន់ទៅលើស្ត្រី ទៅលើសមភាពរវាងបុរសនិងស្ត្រី។ ហេតុអ្វីស្ត្រី ? ព្រោះស្ត្រីជាអ្នករងគ្រោះខ្លាំងជាងគេ នឹងការប្រែប្រួលអាកាសធាតុ តែគឺមនុស្សភេទស្ត្រីនេះឯងជាអ្នកមានគំនិតអាចផ្តល់ដំណោះស្រាយបានច្រើន។
សកម្មជនបរិស្ថានភេទស្ត្រី មួយក្រុមតូច មកពីគ្រប់ជ្រុងនៃភពផែនដី បាននាំគ្នាធ្វើបាតុកម្មតូចមួយ នៅBourget ស្រែកទាមទាររកយុត្តិធម៌ឱ្យអាកាសធាតុ និងមិនរើសភេទ ពោលគឺស្ត្រីចង់ឃើញសន្និសីទអន្តរជាតិគិតគូរអំពី សមភាពស្ត្រីនិងបុរស មានចែងក្នុងកិច្ចព្រមព្រៀងប្រយុទ្ធប្រឆាំងនឹងការឡើងកម្តៅនៃភពផែនដី។
ពិភពលោកបានទទួលស្គាល់ថា ជាញឹកញយ ស្ត្រីជាជនរងគ្រោះដំបូងគេពីការប្រែប្រួលអាកាសធាតុ ជាពិសេសស្ត្រីនៅតំបន់អាហ្វ្រិក អាមេរិកឡាទីន និងអាស៊ី។ តែស្ត្រីក៏អ្នកមានគំនិតល្អ និងជំនួយមិនអាចខ្វះបាន ក្នុងយុទ្ធនាការប្រយុទ្ធប្រឆាំងនឹងការឡើងកម្តៅនៃភពផែនដីដែរ។ ហេតុដូច្នេះហើយបានជានៅថ្ងៃទី ៨ ធ្នូ សន្និសីទអន្តរជាតិស្តីអំពីអាកាសធាតុ បានផ្តល់ឱកាសឱ្យស្ត្រី បញ្ចេញមតិនិងយោបល់ ចំពោះផលិវិបាកទាំងឡាយដែលបង្កឡើងដោយបម្រែបម្រួលអាកាសធាតុ។
“សមភាពស្ត្រី និងបុរស ជាលក្ខខណ្ឌចាំបាច់នៃការជ័យជំនះលើសមរភូមិប្រយុទ្ធប្រឆាំងនឹងការប្រែប្រួលអាកាសធាតុ” ! នេះជាប្រសាសន៍ដាស់តឿនរបស់លោកស្រីរដ្ឋមន្ត្រីក្រសួងបរិស្ថាន សេហ្គោឡែន រ៉ូយ៉ាល់ ដែលជាប្រធានប្រតិភូបារាំង។
សំណើសុំឱ្យគិតគូរអំពីសមភាពស្ត្រីបុរស ក៏ត្រូវបានធ្វើឡើងដោយតំណាងអង្គការក្រៅរដ្ឋាភិបាលនិងអង្គការសហប្រជាជាតិដែល យល់ច្បាស់អំពីចំណងទំនាក់ទំនងរវាងស្ត្រីនិងការប្រែប្រួលអាកាសធាតុ។
លោកស្រីអតីតប្រធានាធិបតីអៀរឡង់ មិនអាចទប់សម្តីបានប្រកាសថា ទើបមកដល់មណ្ឌលសន្និសីទបានមួយថ្ងៃ តែប្រៀបដូចជាមួយខែ ព្រោះការចរចាហាក់ដូចជាមានដំណើរការទៅមុខឱ្យសមចិត្តលោកស្រីសោះ។ ប្រសិនបើអ្នកដឹកនាំនយោបាយជាស្ត្រីភេទ នោះពិតជាមិនស្ថិតក្នុងស្ថានភាពនេះទេ ! នេះបើតាមប្រសាសន៍បញ្ជាក់បន្ថែមរបស់លោកស្រី រ៉ូបិនសិន ដែលជាតំណាងពិសេសរបស់អង្គការសហប្រជាជាតិទទួលបន្ទុកកិច្ចការអាកាសធាតុ នៅឆ្នាំ២០១៤ និងដែលបានបង្កើតមូលនិធិមួយសម្រាប់រកយុត្តិធម៌អាកាសធាតុ។ ហេតុអ្វីត្រូវនិយាយអំពីការទប់ស្កាត់ការឡើងកម្តៅអាកាសធាតុជាមួយស្ត្រី ?!
សម្រាប់លោកស្រីអតីតប្រធានាធិបតី ក៏ដូចជាស្ត្រីក្នុងប្រទេសរងគ្រោះផ្សេងទៀត ស្ត្រីត្រូវចូលរួមចំណែកទប់ទល់នឹងអាកាសធាតុ ព្រោះស្ត្រី ជាអ្នកមើលកូន មើលថៃគ្រួសារ ជាអ្នកដែលត្រូវផ្តល់ការអប់រំ ផ្តល់សារ ថាអ្វីជាភាពខ្ជះខ្ជាយ អ្វីដែលយើងត្រូវការជ្រុល។
តំណាងស្ត្រីអេក្វាទ័រ រំភើបចិត្តយ៉ាងខ្លាំងនៅពេលបានឮសំដីអតីតប្រធានាធិបតីអៀរឡង់ អំពាវនាវឱ្យស្ត្រីបញ្ចេញសកម្មភាពដើម្បីអាកាសធាតុ ដាំដុះដើមឈើឡើងវិញដើម្បីឱ្យ ដែនដីកំណើតម្តាយមានខ្យល់ដក។
COP២១ មិនអាចផ្តល់គ្រប់ដំណោះស្រាយទេ ! ការប្រែប្រួលអាកាសធាតុ ជះឥទ្ធិពលអាក្រក់លើស្រ្តីច្រើនជាងបុរស ! តំណាងអង្គការ Wecan ចង់ឃើញស្ត្រីចូលប្រលូកខ្លាំងនឹងយុទ្ធនាការប្រឆាំងនឹងការកាប់ព្រៃឈើ។ ស្ត្រីនៅលើពិភពលោក សុទ្ធតែមានពាក្យ មានបណ្តាំសម្រាប់កូនៗជំនាន់ក្រោយ ព្រមទាំងព្រួយបារម្ភយ៉ាងខ្លាំងចំពោះអនាគតកូន។
ក្តីព្រួយបារម្ភនិងការគិតគូរអំពីបញ្ហាអាកាសធាតុ មិនមែនត្រឹមជាភារៈរបស់ស្ត្រីក្នុងប្រទេសរងគ្រោះខ្លាំងទេ តំណាងស្ត្រីក្នុងប្រទេសអភិវឌ្ឍន៍ ក៏ត្រូវបានជំរុញឱ្យចូលរួមចំណែកដែរ។ តំណាងស្រ្តីអូស្ត្រាលីបានបើកយុទ្ធនាការ បញ្ចុះបញ្ចូលស្ត្រី ជាមេផ្ទះខិតខំសន្សំសំចៃ រិតត្បិតការចាយវាយឥតប្រយោជន៍ ដោយផ្តើមជាដំបូង ពីការសន្សំសំចៃថាមពលភ្លើង ដើម្បីកាត់បន្ថយការបញ្ចេញឧស្ម័នកាបូនិកបំពុលបរិស្ថាន។
សកម្មភាពរបស់ស្ត្រី ដើម្បីអាកាសធាតុច្រើនតែភ្ជាប់សកម្មភាពការពារបរិស្ថានទៅនឹងការគោរពព្រលឹងបុព្វបុរស។ ប្តូរគំនិត ចេះនឹងគិតដល់ដូនតា នោះនឹងអាចប្តូរអាកាសធាតុបានហើយ។
ប៉ុន្តែក្រុមស្ត្រីនៅតែសោកស្តាយ ! ស្តាយនិងខ្លាចក្រែងទិវាដែលបង្ហាញពីភាពសំខាន់របស់ស្ត្រីក្នុងការប្រយុទ្ធប្រឆាំងនឹងការឡើងកម្តៅនៃអាកាសធាតុ ជាចំណុចបន្ទាប់បន្សំនៃការចរចារកកិច្ចព្រមព្រៀងអាកាសធាតុរួមតែប៉ុណ្ណោះ។ ព្រោះក្រៅអំពីវិសមភាពរបស់ស្ត្រីក្នុងសង្គម ក្នុងនយោបាយ ការទូត និងក្នុងការទទួលជំនួយមនុស្សធម៌ផ្សេងៗ ពេលរងគ្រោះ នៅក្នុងកិច្ចចរចាស្តីអំពីអាកាសធាតុនេះ គេសង្កេតឃើញមានគម្លាតយ៉ាងខ្លាំងរវាងស្ត្រីនិងបុរស ដោយមានតំណាងភេទស្ត្រីក្នុងជួរប្រតិភូចូលរួមចរចាយ៉ាងតិចតួចបំផុត ក្នុងCOP ២១ នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ