អ្វីជាមេរៀន ក្រោយខួបមួយឆ្នាំនៃភេរវកម្មប្រឆាំងទស្សនាវដ្តីCharlie Hebdo ?
ចុះផ្សាយនៅថ្ងៃ៖
ស្តាប់ - ០៤:២៨
៧មករា ២០១៥-៧មករា២០១៦ ថ្ងៃនេះជាខួបមួយឆ្នាំគត់នៃភេរវកម្មបាញ់ប្រហារប្រឆាំងនឹងទស្សនាវដ្តីត្លុកកំប្លែង Charlie Hebdo ផ្តាច់ជីវិតអ្នកកាសែត អ្នកគូររូបត្លុកដ៏ល្បីល្បាញរបស់ទស្សនាវដ្តី។ ការឧទ្ទិសដល់វិញ្ញាណក្ខន្ធជនរងគ្រោះនិងទស្សនាវដ្តី ត្រូវប្រព្រឹត្តទៅនៅសប្តាហ៍នេះ។ ភេរវកម្មដែលបន្សល់ទុកនូវផលវិបាកដ៏ធ្ងន់ធ្ងរដល់ថ្ងៃនេះ និងដែលបានអង្រួញចិត្តពិភពលោកទាំងមូល កាលពីមួយឆ្នាំមុន ផ្តល់មេរៀនអ្វីខ្លះ ?
ថ្ងៃ៧មករា ២០១៥ ម៉ោងប្រមាណ ១១និង៣០នាទី ព្រឹក បុរសពីរនាក់ស្លៀកពាក់ខ្មៅ បិទមុខ ប្រដាប់ដោយអាវុធស្វ័យប្រវត្តិ បានសំរុកចូលក្នុងទីស្នាក់ការទស្សនាវដ្តី Charlie Hebdo -មានទីតាំងស្ថិតនៅកណ្តាលទីក្រុងប៉ារីស (ក្នុងសង្កាត់ទី ១១) បាញ់សម្លាប់អ្នកយាមទ្វារម្នាក់ មុននឹងចូលទៅក្នុងបន្ទប់ប្រជុំរបស់ទស្សនាវដ្តី បាញ់រះលើក្រុមការិយាល័យនិពន្ធដែលកំពុងជួបប្រជុំគ្នា ដោយស្រែកថា “អាឡា កាបារ”។
បន្ទាប់មក ភេរវជនឈាមត្រជាក់ ទាំងពីរ បានរត់ឡើងឡានដោយសម្រួល ចេញពីកន្លែងកើតហេតុ និងបាញ់សម្លាប់ប៉ូលិសដើរល្បាតតាមផ្លូវ ដែលមិននឹកស្មានដល់ថាជាការវាយប្រហារភេរវកម្មទេ។ ក្នុងពេលដែលប៉ូលិសកំពុងតាមស្វែងរកចាប់ភេរវជនពីរនាក់បងប្អូនគូសហ្ស៊ី និងក្តុកក្តួល ចំពោះការបាត់បង់ក្រុមបញ្ញាវន្តនៃទស្សនាវដ្តីត្លុកគំនូរ មានការបាញ់រះសម្លាប់ប៉ូលិសម្នាក់ទៀតបានកើតឡើងនៅភាគខាងប៉ារីសម្តង។ មួយថ្ងៃឡើងទៀត គឺនៅថ្ងៃទី ៩ មករា ក្នុងពេលដែលប៉ូលិសរកឃើញដានភេរវជនពីរនាក់បងប្អូន ចូលក្នុងរោងចក្រមួយនៅភាគខាងឦសានក្រុងប៉ារីស ស្រាប់តែមានការចាប់ចំណាប់ខ្មាំងនៅក្នុងក្រុងប៉ារីសមួយកន្លែងផ្សេងទៀត ក្នុងផ្សារ។ ភេរវជនទាំងបី បានរៀបផែនការចង់ធ្វើសកម្មភាពក្នុងពេលតែមួយ ក្នុងនាមចលនាភេរវនិយមអាល់កៃដានៅយេមែន។
មិនធ្លាប់មានទេក្នុងប្រវត្តិសាស្ត្របារាំង ដែលមានសមរភូមិចំណាប់ខ្មាំងពីរ ក្នុងពេលតែមួយ កណ្តាលរដ្ឋធានីយ៉ាងដូច្នេះ។ វិបត្តិចំណាប់ខ្មាំងបានបិទបញ្ចប់ ដោយប្រតិបត្តិការប៉ូលិសប្រយុទ្ធប្រឆាំងនឹងភេរវកម្ម បាញ់សម្លាប់ខ្មាញ់កាំភ្លើងកុម្មង់ដូទាំងបី និងជនរងគ្រោះដល់ជីវិត១៧នាក់។ ភាពតក់ស្លុត រន្ធត់ បានជំរុញឱ្យពិភពលោកទាំងមូល ដែលមិនចុះញ៉មនឹងការគំរាមកំហែងភេរវកម្ម ចាប់ដៃគ្នា បង្ហាញសាមគ្គីភាពជាមួយបារាំង។ ប្រមុខរដ្ឋ រដ្ឋាភិបាលស្ទើរគ្រប់ប្រទេសនៃភពផែនដីបាននាំគ្នាធ្វើដំណើរមកប៉ារីស ដើម្បីដើរដង្ហែក្បួនសន្តិភាព ប្រឆាំងនឹងអំពើភេរវកម្ម។
កាសែតCharlie Hebdo ដែលបាត់បង់សហការីដ៏ចំណានៗ គ្មានប្រៀប ប្រឹងត្រដររស់ នឹងចេញផ្សាយតាមទម្លាប់នូវលេខពិសេសក្រោយភេរវកម្មភ្លាម ដោយគូររូបត្លុកមហាម៉េត ជាមួយនឹងចំណងជើង “លើកលែងទោស”។ លេខក្រោយពីស្លាប់នោះលក់ដាច់អស់ជាង៧លាន៨សែនច្បាប់ ច្រើនជាងធម្មតាដល់ទៅជិត១០ដង។
មួយឆ្នាំក្រោយការវាយប្រហារភេរវកម្ម ដែលផ្តាច់ជីវិតអ្នកកាសែតអ្នកគូររូបត្លុកស្ទើរអស់ពីការិយាល័យនិពន្ធ Charlie Hebdo បានចេញផ្សាយលេខពិសេស ដើម្បីឧទ្ទិសដល់ព្រលឹងអ្នកស្លាប់ នៅថ្ងៃទី ៦មករា ២០១៦ ចំនួន១លានច្បាប់ ដោយមានភ្ជាប់កូនសៀវភៅគំនូរ ជាស្នាដៃអ្នកគូរល្បីៗស្លាប់ក្នុងភេរវកម្ម៧មករា២០១៥ និងការចូលរួមពីសំណាក់រដ្ឋមន្ត្រីក្រសួងវប្បធម៌បារាំង ព្រមទាំងបញ្ញាវន្តបង់ក្លាដែស អាមេរិក សិល្បករសិល្បការិនី ឬអ្នកភ្លេងផង។ នៅទំព័រមុខ គេឃើញមានរូបគំនូរត្លុក ព្រះដុះពុកមាត់ស្រមូម ស្ពាយកាំភ្លើងអាកា kalachnikov អាវវែងប្រឡាក់ឈាម គូរដោយនាយកទស្សនាវដ្តីផ្ទាល់ ក្រោមចំណងជើងថា “មួយឆ្នាំក្រោយ ឃាតករនៅគេចខ្លួន”។
ទស្សនាវដ្តីមិនទាន់ចេញដាក់លក់តាមតូបផង ពាក្យរិះគន់ និងគាំទ្របានផ្ទុះសុសសាយពេញប្រព័ន្ធសង្គម។ អ្នកប្រឆាំងយល់ថា កាសែតលេងសើចនឹងសាសនាទៀតហើយ ឯអ្នកការពារវិញយល់ថា នេះជាគំនិតដើមនៃទស្សនាវដ្តីត្លុក គឺរិះគន់ ចំអក សើចកំប្លែង ពីគេ ពីសាសនា ពីខ្លួនឯងផ្ទាល់។ ទំព័រមុខរបស់ទស្សនាវដ្តីលេខពិសេសនេះ គ្មានលក្ខណៈវាយប្រហារ និងម៉ៅលើសាសនាអ៊ីស្លាមទេ ! សុខចិត្តនិយាយបែបសរុបសំដៅលើព្រះជារួម។ នាយកទស្សនាវដ្តី បានពន្យល់ថា លេខពិសេសខួបមួយឆ្នាំ សូមឧទ្ទិសដល់ភាពគ្មានសាសនា និងបរិហារការងប់ងល់នឹងគម្ពីរកូរ៉ង់ យកពរសាសនាមកសម្លាប់កាសែតដែលហ៊ានលេងសើចនឹងសាសនា។
ភេរវកម្មប្រឆាំងនឹងទស្សនាវដ្តី Charlie Hebdo បានធ្វើឱ្យប្រទេសបារាំង បានឡើងចំណាត់ថ្នាក់ខ្ពស់នៅឆ្នាំ ២០១៥ លំដាប់ទីបីបន្ទាប់ពីប្រទេសអ៊ីរ៉ាក់ និងស៊ីរី ដែលមានចំនួនអ្នកកាសែត ស្លាប់ច្រើនជាងគេ ពេលកំពុងបំពេញការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ