អឺរ៉ុបរកឃើញកិច្ចព្រមព្រៀងទប់អង់គ្លេសកុំឱ្យដើរចេញពីសហភាព
ចុះផ្សាយនៅថ្ងៃ៖
ស្តាប់ - ០៣:៣៦
តើត្រូវធ្វើដូចម្តេចដើម្បីកុំឱ្យអង់គ្លេសដើរចេញពីសហភាពអឺរ៉ុប ? គឺអឺរ៉ុបត្រូវធ្វើកំណែទម្រង់ ! សំណើកំណែទម្រង់មួយខ្សែធំ ត្រូវបានលោក Donald Tusk ប្រធានក្រុមប្រឹក្សាអឺរ៉ុប បង្ហើបបង្ហាញ នៅថ្ងៃអង្គារទី ២កុម្ភៈ២០១៦ ដែលអឺរ៉ុបនិងអង់គ្លេសបានសម្របសម្រួលគ្នាទទួលយកទាំងសងខាង។ អឺរ៉ុបនិងអង់គ្លេសកំពុងឈានការចុះកិច្ចព្រមព្រៀង បញ្ចៀសបាននូវការដើរចេញរបស់អង់គ្លេសពីសហភាពអឺរ៉ុបហើយឬ ? តើកំណែទម្រង់ដែលត្រូវរ៉ូវគ្នានេះមានខ្លឹមសារយ៉ាងណាខ្លះ ?
សំណើកំណែទម្រង់ដែលបានទទួលការព្រមព្រៀងបឋម នៅថ្ងៃអង្គារកន្លងមកនេះ មាន១៦ទំព័រ ត្រូវបានប្រគល់ទៅដល់ដៃរដ្ឋាភិបាលប្រទេសជាសមាជិកសហភាពអឺរ៉ុបទាំង២៨ហើយ ដើម្បីអនុម័តសម្រេចនៅថ្ងៃទី ១៨កុម្ភៈ។ ជាសំណើកំណែទម្រង់អឺរ៉ុបនេះ ប៉ុន្តែក៏ជាការសម្របសម្រួលមួយ ក្នុងកម្មវត្ថុបញ្ចៀសឱ្យបានដំណើរចង់ដើរចេញពីសហភាពអឺរ៉ុបរបស់អង់គ្លេស។ ហេតុដូច្នេះហើយបានជាគេអាចនិយាយបានថា កិច្ចព្រមព្រៀងបឋមនេះ ជាជោគជ័យមួយដំណាក់សម្រាប់លោកនាយករដ្ឋមន្ត្រីអង់គ្លេស ព្រោះបន្ទាប់ពីការតស៊ូបញ្ចុះបញ្ចូលអស់រយៈពេលបីខែ សហភាពអឺរ៉ុបបានព្រមធ្វើសម្បទានច្រើន តាមសំណូមពរសំខាន់ៗរបស់លោក ដេវីត កាមឺរោន សឹងចាត់ទុកបានថាជាការសម្រិតសម្រាំង ដើម្បីតម្រូវចិត្តអង់គ្លេសផង។
មានតែចំណុចមួយប៉ុណ្ណោះ ដែលអឺរ៉ុបមិនបណ្តោយតាម គឺការគ្រប់គ្រងតំបន់អឺរ៉ូ ដែលអង់គ្លេស ចង់លូកដៃចូលដែរ។ ក្នុងករណីនេះ អឺរ៉ុបបានឆ្លើយព្រមទាំងចុងមាត់ចុងក ធានារ៉ាប់រងថា នឹងគ្មានការរើសអើងពាណិជ្ជកម្មរវាងសមាជិកសហភាពអឺរ៉ុប ដែលមិនស្ថិតក្នុងតំបន់ចាយប្រាក់អឺរូទេ។ នៅក្នុងយន្តការនៃកិច្ចព្រមព្រៀងថ្មីនេះ អង់គ្លេស ក្នុងនាមក្រុមប្រទេសមិនចាយប្រាក់អឺរ៉ូ (ត្រូវកំណត់សមាជិកក្រុមតាមក្រោយ) អាចមានសិទ្ធិចូលជជែកពិភាក្សាជាក្រុមប្រទេសតំបន់អឺរ៉ូ ក្នុងការសម្រេចចិត្តផ្សេងៗ ដើម្បីកុំឱ្យប៉ះពាល់ប្រយោជន៍ជាតិនីមួយៗខ្លាំងពេក។
ផ្ទុយទៅវិញ ស្តីពីបញ្ហាអធិបតេយ្យភាព ដែលអង់គ្លេសការពារបំផុតនោះ សហភាពអឺរ៉ុបបានសម្រេចជូនតាមសំណូមពរ។ អំណើះតទៅ សភាជាតិនីមួយៗ មានសិទ្ធិទាមទារឱ្យបិទខ្ទប់គម្រោងច្បាប់អឺរ៉ុបបាន ប៉ុន្តែសភាត្រូវស្វែងរកសំឡេងប្រឆាំងឱ្យបានយ៉ាងហោចណាស់៥៥%។
ចំពោះប្រធានបទដ៏ក្តៅគគុក និងលំបាកបំផុតទាក់ទងនឹងការបែងចែកជំនួយសង្គមដល់អន្តោប្រវេសន៍មកពីសហគមន៍អឺរ៉ុបដូចគ្នាក្នុងរយៈពេលបួនឆ្នាំដំបូង ដែលអង់គ្លេសចង់លុបចោលវិញ គណៈកម្មាការអឺរ៉ុបបានព្រមព្រៀងឱ្យអង់គ្លេសព្យួរមួយរយៈ ប្រសិនបើមើលឃើញមានហានិភ័យប៉ះពាល់ដល់ស្ថិរភាពទីផ្សារការងារនិងប្រព័ន្ធធានារ៉ាប់រងសង្គម ដោយស្នើដាក់ជំនួសមកវិញ “យន្តការការពារ” ដែលបើតាមអឺរ៉ុបនឹងផ្តល់លទ្ធផលដូចគ្នា។
យន្តការនេះ ត្រូវបានប្រើជាហ្វ្រាំងទប់ ក្នុងស្ថានការណ៍មានលំហូរអន្តោប្រវេសន៍ខ្លាំងប្លែក។ នៅក្នុងសេចក្តីថ្លែងការណ៍ កាលពីថ្ងៃអង្គារ គណៈកម្មការអឺរ៉ុបបានពន្យល់អំពីស្ថានភាពពិសេសនៅអង់គ្លេស ទើបព្រមព្រៀងជាមួយអង់គ្លេសយ៉ាងដូច្នេះ។ រដ្ឋផ្សេងទៀត ដែល ខុសពីឡុងដ៍ មានប្រព័ន្ធសង្គមបែបពន្ធជំនួយ (រំពឹងការបង់វិភាគទាន មិនមែនឈរលើការប្រមូលពន្ធ) មិនអាចទាមទារសុំប្រើយន្តការការពារនេះបានឡើយ។
បើដូច្នេះ សមាជិកអឺរ៉ុប២៧ប្រទេសផ្សេងទៀត អាចប៉ះបោរច្រណែននឹងអង់គ្លេស ? ឬក៏ទាមទារ ដូចអង់គ្លេសដែរហើយ ?! នេះជាសំណួរដែលប្រធានក្រុមប្រឹក្សាអឺរ៉ុប និងគណៈកម្មការអឺរ៉ុបមិនចង់ឮ និងខ្លាចរអាបំផុត។ បើធ្វើតាមសំណូមពរគ្រប់គ្នា នោះអឺរ៉ុបប្រែពីសហភាពទៅជាសហភាគហើយ។
ប៉ុន្តែពេលនេះ ក្រុមប្រឹក្សានិងគណៈកម្មការអឺរ៉ុបមានទំនុកចិត្តខ្លាំង ព្រោះកិច្ចព្រមព្រៀងជាមួយឡុងដ៍ ជាកិច្ចព្រមព្រៀងដ៏ត្រឹមត្រូវស្មើភាគ និងអាចទទួលយកបានពីគ្រប់សមាជិកទាំង២៨។ គ្មានការប្តូរផ្លាស់សន្ធិសញ្ញា ដែលគ្មាននរណាចង់បាន គឺមានតែដំណោះស្រាយ។ គោលការណ៍គ្រឹះទាំងពីររបស់សហភាពអឺរ៉ុប ៖ ចរាចរណ៍ដោយសេរី គ្មានការរើសអើង ត្រូវគោរពបានទាំងស្រុង។
ការរារាំងកិច្ចព្រមព្រៀងជាមួយអង់គ្លេស គឺជាការរុញ ប្រទេសនេះឱ្យចេញពីអឺរ៉ុប ហើយបើមានអង់គ្លេសចេញ នោះអឺរ៉ុបនឹងរង្គើ។ ថ្ងៃនេះអាចចាត់ទុកជាជោគជ័យមួយដំណាក់ដំបូងរបស់អង់គ្លេស ប៉ុន្តែសម្រាប់លោកដេវីត កាមឺរោន គ្រាន់តែជាការចាប់ផ្តើមប៉ុណ្ណោះ។ ប្រសិនបើកិច្ចព្រមព្រៀងបឋមត្រូវបានអនុម័តដោយសមាជិកអឺរ៉ុបតាំង២៨ នៅសប្តាហ៍ក្រោយ នោះអង់គ្លេសត្រូវធ្វើប្រជាមតិនៅខែមិថុនា។ លោកដេវីតកាមឺរោន ត្រូវចេញស្វែងរកគ្រប់ហេតុផលបញ្ចុះបញ្ចូលពលរដ្ឋឱ្យបោះឆ្នោតគាំទ្រអង់គ្លេសក្នុងសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ