ក្រោយភេរវកម្មនៅព្រុចសែល អឺរ៉ុបសំឡឹងចង់មើលគំរូសន្តិសុខអ៊ីស្រាអែល
ចុះផ្សាយនៅថ្ងៃ៖
ស្តាប់ - ០៤:២៣
១០ថ្ងៃក្រោយភេរវកម្ម ព្រលានយន្តហោះអន្តរជាតិក្រុងព្រុចសែល នៅតែបន្តបិទទ្វារទៀត។ ការធ្វើតេស្តសាកល្បង កាលពីថ្ងៃអង្គារ នៅតែមិនទាន់អនុញ្ញាតឱ្យអាកាសយានដ្ឋានអាចបើកទ្វារទទួលអ្នកដំណើរបាន។ នេះជាផលវិបាកដែលបន្សល់ទុកដោយការវាយប្រហារភេរវកម្មថ្ងៃទី ២២មីនា និងដែលបានជំរុញឱ្យគ្រប់អាកាសយានដ្ឋានអឺរ៉ុបទាំងមូល ប្រឹងប្រែងពង្រឹងសន្តិសុខ បង្កើនកម្លាំង និងកំពុងសំឡឹងរកមើលគំរូសន្តិសុខដែលមានប្រសិទ្ធិភាព។
បីថ្ងៃក្រោយភេរវកម្មនៅព្រុចសែល ការតស៊ូមតិស្តីពីការពង្រឹងវិធានការប្រឆាំងភេរវកម្ម នៅតាមអាកាសយានដ្ឋាន និងស្ថានីយ៍ចំណតសាធារណៈ បានផុសផុលឡើងយ៉ាងពេញទំហឹង។ ការវាយប្រហារនៅបែលហ្ស៊ិក ដូចជាបានដាស់សតិ ឱ្យភ្ញាក់ខ្លួនដឹងថាហេដ្ឋារចនាសម្ព័ន្ធដឹកជញ្ជូនសាធារណៈអឺរ៉ុបងាយរងគ្រោះណាស់។
អ្នកឯកទេសបានដាក់កម្មវិធីរៀបចំសន្និសីទស្តីអំពីប្រធានបទនេះ រួចហើយ ! សន្និសីទថ្នាក់អឺរ៉ុប ត្រូវប្រព្រឹត្តទៅនៅថ្ងៃព្រហស្បតិ៍ទី ៣១ មីនា នៅទីក្រុងព្រុចសែល និងថ្នាក់អន្តរជាតិ នៅថ្ងៃទី ២៧កញ្ញា ក្នុងក្របខ័ណ្ឌអង្គការអាកាសចរណ៍ស៊ីវិលអន្តរជាតិ។ ប៉ុន្តែអាកាសយានដ្ឋានអន្តរជាតិនៅអឺរ៉ុបជាច្រើន មិនបានរង់ចាំសន្និសីទដើម្បីពង្រឹងសន្តិសុខ និងសុវត្ថិភាពទេ។ ការពិចារណាស្វែងរកគំរូសន្តិសុខ ពិតប្រាកដ ក៏បានចាប់ផ្តើមដែរ។
តើគំរូសន្តិសុខណា ដែលអឺរ៉ុបចាប់អារម្មណ៍ជាងគេ ? ថ្វីបើបារាំង ដែលបានបង្កើន និងពង្រឹងសន្តិសុខតាមអាកាសយានដ្ឋាន តាមស្ថានីយ៍រថភ្លើង រថយន្តក្រុង បន្ថែមដោយមិនបង្អង់មែន និងបានឱ្យដឹងមុនគេ ថានឹងមិនយកគំរូធ្វើតាមរុស្ស៊ី និងអ៊ីស្រាអែលមែន តែក្រុមអ្នកជំនាញអ៊ីស្រាអែលបានឱ្យដឹងថា អ្នកទទួលខុសត្រូវផ្នែកអាកាសយានដ្ឋានអឺរ៉ុប ជាច្រើនបានទាក់ទងទៅអ៊ីស្រាអែល កាន់តែញឹកញាប់ឡើង ព្រោះចាប់អារម្មណ៍ខ្លាំងនឹងគំរូសន្តិសុខក្នុងប្រទេសនេះ។
អ៊ីស្រាអែលមានបទពិសោធន៍ច្រើន និងយូរយារណាស់ ក្នុងវិស័យប្រយុទ្ធប្រឆាំងនឹងភេរវនិយម។ តាំងពីបានកើតជាប្រទេសមួយមក អ៊ីស្រាអែលបានរងការវាយប្រហារ និងការប៉ុនប៉ងវាយប្រហារភេរវកម្ម មិនតិចជាង៨០ដងទេ។ ប៉ុន្តែតាំងពីឆ្នាំ១៩៧៤មក (ក្រោយភេរវកម្មបង្កឡើងដោយភេរវជនជប៉ុនអ្នកគាំទ្រប៉ាឡេស្ទីន បាញ់រះសម្លាប់មនុស្សអស់២៦នាក់និងរបួស៨០នាក់ នៅពេលយន្តហោះចុះដល់ដីអ៊ីស្រាអែលភ្លាម) អ៊ីស្រាអែលបានប្រើមធ្យោបាយធំ និងក្តៅ រហូតអាចនិយាយបាន គ្មាននរណាអាចធ្វើការវាយប្រហារភេរវកម្មប្រឆាំងអាកាសយានដ្ឋានអ៊ីស្រាអែលបានឡើយនៅពេលនេះ។ អាកាសយានដ្ឋាន ក្រុងទែលអាវីវ ជាប់ឈ្មោះល្បីខាងមានសុវត្ថិភាពជាងគេបំផុតនៅលើពិភពលោក !
មុននឹងចូលដល់អាកាសយានដ្ឋាន គេត្រូវឆ្លងកាត់រនាំងត្រួតពិនិត្យរថយន្ត បន្ទាប់មកឆ្មាំសន្តិសុខឯកជននឹងត្រូវតាមដានគ្រប់សកម្មភាពចូលព្រលាន ហើយពួកគេមិនញញើតនឹងហៅអ្នកដំណើរមកសួរចម្លើយទេ។ ម៉ាស៊ីនថតមានដាក់នៅគ្រប់ជ្រុង គ្រប់ផ្លូវដើរ។ ភ្នាក់ងារស៊ើបការណ៍សម្ងាត់ ស្លៀកពាក់ជាស៊ីវិល ដើរល្បាតពេញព្រលាន។ បន្ថែមពីលើនេះទៀត អ៊ីស្រាអែលបានអភិវឌ្ឍន៍ដល់កំរិតអតិបរិមាណបច្ចេកវិទ្យាយកការណ៍គ្រប់ទម្រង់ គ្រាន់បានស្តាប់ឮការជជែកពិភាក្សាគ្នា គឺអាចដឹងស្គាល់បុគ្គលក្រុមនោះហើយ។ បច្ចេកវិទ្យាខ្លះមានលក្ខណៈរើសអើង តែមានប្រសិទ្ធិភាព ទើបអាជ្ញាធរអ៊ីស្រាអែលត្រូវតែប្រកាន់យក។ ដើម្បីកាត់បន្ថយហានិភ័យមានរនុកក្នុង អ៊ីស្រាអែលមិនខ្លាចនឹងបញ្ជូនភ្នាក់ងារទៅត្រួតពិនិត្យអ្នកដំណើរដល់អាកាសយានដ្ឋានដែលក្រុមហ៊ុនអាកាសចរណ៍អ៊ីស្រាអែលភ្ជាប់ជើងហោះហើរជាមួយឡើយ។
ក្នុងនាមប្រទេសមានពិសោធន៍ច្រើន ធ្លាប់ឆ្លងកាត់ និងរស់ប្រឈមមុខខ្លាំងនឹងភេរវកម្ម អ៊ីស្រាអែល សម្គាល់ឃើញវិធានការសន្តិសុខ នៅអឺរ៉ុបធូររលុង ចំណាយខ្លាំងអស់រាប់ពាន់លានទៅលើបច្ចេកវិទ្យា តែភ្លេចអំពីគិតគូរពីកត្តាមនុស្ស និងរិះគន់ភាពស្ពឹកស្រពន់របស់អាជ្ញាធរបែលហ្ស៊ិក ក្នុងវិស័យសន្តិសុខ។ ការដាក់ទាហាន និងយោធាឱ្យពីរបីនាក់ឱ្យដើរត្បាត ពិតជាមិនអាចការពារអាកាសយានដ្ឋាន និងតាមស្ថានីយ៍ដឹកជញ្ជូន ឱ្យមានសុវត្ថិភាពពិតប្រាកដបានឡើយ។
ប៉ូលិសអាកាសយានដ្ឋានព្រុចសែលផ្ទាល់ ក៏បានអះអាងអំពីកង្វះខាតផ្នែកសន្តិសុខនេះដែរ និងបានដាក់ពាក្យ នៅថ្ងៃទី ១៨មីនា ពោលគឺមុនការផ្ទុះភេរវកម្មបួនថ្ងៃ សុំធ្វើបាតុកម្ម។ ដូច្នេះការព្រួយបារម្ភរបស់ពួកគេពិតជាសមហេតុផល ហើយភេរវកម្មថ្ងៃទី២២មីនា ពិតជាមេរៀនដែលបែលហ្ស៊ិកត្រូវចងចាំ និងគិតគូរពង្រឹងឬប្តូរយុទ្ធសាស្ត្រការពារសន្តិសុខ។ ចង់ឬមិនចង់ អឺរ៉ុបមួយរយៈនេះត្រូវតែរឹតបន្តឹង ឆែកឆេរ ដូចអ៊ីស្រាអែលតាំងពីច្រកចូលអាកាសយានដ្ឋាន រហូតដល់ច្រកចេញឡើងយន្តហោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ