តើបារាំង ប្រឈមនឹងហានិភ័យជួបគ្រោះថ្នាក់នុយក្លេអ៊ែរយ៉ាងណា ?!
ចុះផ្សាយនៅថ្ងៃ៖
ស្តាប់ - ០៤:៣២
ក្រោយមហន្តរាយនុយក្លេអ៊ែរនៅហ្វូគូស្ហ៊ីម៉ា កាលពីខែមីនា ២០១១មក បទដ្ឋានសុវត្ថិភាពនុយក្លេអ៊ែរបានរឹតបន្តឹងជាច្រើនកំរិត ដើម្បីកាត់បន្ថយគ្រោះហានិភ័យឬគ្រោះថ្នាក់នុយក្លេអ៊ែរជាយថាហេតុណាមួយ។ ប៉ុន្តែហានិភ័យនៅមានខ្ពស់ អាជ្ញាធរបារាំងមិនហ៊ានច្រានចោលទាំងស្រុងគ្រោះហានិភ័យនុយក្លេអ៊ែរទេ ព្រោះបើមើលទៅអាយុកាលរបស់មជ្ឈមណ្ឌលនុយក្លេអ៊ែរបារាំង សុទ្ធតែមានវ័យចំណាស់ ក្រុមហ៊ុនគ្រប់គ្រងមជ្ឈមណ្ឌលនុយក្លេអ៊ែរក៏មានបញ្ហាហិរញ្ញវត្ថុទៀត។
តើគ្រោះថ្នាក់នុយក្លេអ៊ែរ ដូចនៅឈែរណូប៊ីល ឬ នៅហ្វូគូស្ហ៊ីម៉ា អាចកើតមានបានដែរ នៅប្រទេសបារាំងមែនឬ ? ៣០ឆ្នាំក្រោយមហន្តរាយឈែរណូប៊ីល ក្រុមអ្នកប្រឆាំងនឹងនុយក្លេអ៊ែរ សង្ស័យលើសុវត្ថិភាពនុយក្លេអ៊ែរបារាំងកាន់តែខ្លាំងឡើង ៗ។ ប្រធានអាជ្ញាធរសុវត្ថិភាពនុយក្លេអ៊ែរបារាំងផ្ទាល់ក៏បានទទួលស្គាល់ដែរថា សុវត្ថិភាពប្រាកដ១០០%ពិតជាគ្មានឡើយ ! គេត្រូវតែគិតពីអ្វីដែលមិនអាចគិតដល់ ព្រោះគេមិនអាចច្រានចោលទាំងស្រុងថាគ្មានសោះគ្រោះថ្នាក់នុយក្លេអ៊ែរទេ មិនថានៅជប៉ុនឬនៅអឺរ៉ុប និងបារាំងឡើយ។
បារាំងប្រឈមខ្លាំងនឹងហានិភ័យនុយក្លេអ៊ែរ
ប្រសិនបើមានគ្រោះថ្នាក់នុយក្លេអ៊ែរផ្ទុះឡើងនៅលើទឹកដីបារាំងមែននោះពិតជាមហន្តរាយធ្ងន់ធ្ងរខ្លាំងក្រៃជាមិនខាន។ មជ្ឈមណ្ឌលនុយក្លេអ៊ែរឈែរណូប៊ីល ស្ថិតនៅក្នុងតំបន់ ស្ទើរដាច់ស្រយ៉ាលមួយ មានប្រជាជនរស់នៅតិចតួចណាស់។ ប៉ុន្តែនៅបារាំង មជ្ឈមណ្ឌលនុយក្លេអ៊ែរទាំង៥៨កន្លែង ភាគច្រើនសុទ្ធតែមានទីតាំងនៅជិតទីប្រជុំជន មានមនុស្សរស់នៅច្រើនកុះករ។ តាមការពិតអាជ្ញាធរបារាំងមានត្រៀមសំណុំបែបបទដំណើរជម្លៀស និងចែកចាយថ្នាំអ៊ីយ៉ូតជូនប្រជាជនក្នុងករណីមានគ្រោះថ្នាក់នុយក្លេអ៊ែរមែន តែបន្ទាប់មកតើត្រូវធ្វើដូចម្តេច? ការជម្លៀសពលរដ្ឋជាទ្រង់ទ្រាយធំយកទៅណា ? បើដីឆ្លងជាតិវិទ្យុសកម្មហើយត្រូវរង់ចាំដល់ទៅមួយសតវត្សរ៍ ទម្រាំបន្សាបអស់យ៉ាងដូច្នោះ ?! យោលទៅតាមទំហំ និងប្រភេទនៃគ្រោះថ្នាក់នុយក្លេអ៊ែរ ព្រមទាំងទីតាំងរបស់មជ្ឈមណ្ឌល ប្រទេសលុចសំបួរ បែលហ្សិក ឬស្វីស អាចនឹងលុបបាត់ពីផែនទីពិភពលោកតែម្តង !
ប៉ុន្តែថ្វីបើបទដ្ឋានសុវត្ថិភាពនុយក្លេអ៊ែរ ត្រូវបានពង្រឹង តាំងពីក្រោយមហន្តរាយនៅឈែរណូប៊ីល និងហ្វូគូស្ហ៊ីម៉ាក្តី ក៏ស្ថានភាពនៅប្រទេសនៅតែមានលក្ខណៈផុយស្រួយដដែល។ ហេតុអ្វី ?
មជ្ឈមណ្ឌលនុយក្លេអ៊ែរ កាន់តែចាស់ កាន់តែងាយបង្កគ្រោះថ្នាក់
ជាបឋម មជ្ឈមណ្ឌលនុយក្លេអ៊ែរបារាំង សុទ្ធតែចាស់ៗ (ម៉ាស៊ីនប្រតិករពីរភាគបីមានអាយុជាង៣០ឆ្នាំ)។ ភាពចាស់ជរានៃរោងចក្រនិង ការសឹករិចរិល គឺជាមូលហេតុចំបងនាំឱ្យងាយខូច ងាយមានគ្រោះថ្នាក់ណាស់។ ហើយនៅក្នុងក្របខ័ណ្ឌអន្តរកាលថាមពល មុននឹងអាចឈានដល់ការកាត់បន្ថយឬការលុបចោលថាមពលនុយក្លេអ៊ែរ ដោយងាកទៅប្រើថាមពលមិនចេះរីងស្ងួតវិញ គេត្រូវប្រើមជ្ឈមណ្ឌលចាស់ៗនេះសិន។ ដូច្នេះអាយុកាលនៃម៉ាស៊ីនប្រតិករបារាំងទាំងឡាយនេះ អាចនឹងត្រូវពន្យារពេលឱ្យប្រើប្រាស់ផលិតអគ្គីសនីបន្ត ២០ឬ៣០ឆ្នាំទៀត។
សម្ពាធហិរញ្ញវត្ថុ
បន្ទាប់មក ក្រុមហ៊ុនអគ្គិសនីបារាំងដែលជាអ្នកគ្រប់គ្រងមជ្ឈមណ្ឌលនុយក្លេអ៊ែរ សុំគ្រលំជាមួយរដ្ឋ និងងុបងុលចង់តែពន្យារប្រើម៉ាស៊ីនប្រតិករនុយក្លេអ៊ែរ ច្រើនជាងចំណាយពេលរៀបចំផែនការដើរចេញពីនុយក្លេអ៊ែរ។ បូកផ្សំនឹងមានបញ្ហាហិរញ្ញវត្ថុដែលបណ្តាលមកពីសម្រូបទីផ្សារអន្តរជាតិផ្នែកនុយក្លេអ៊ែរផង តម្លៃអគ្គីសនីទាបផង ក្រុមហ៊ុនត្រូវបង្ខំចិត្តរឹតត្បិតថវិកា ជម្រុះបុគ្គលិកជិតបីពាន់នាក់។ សម្ពាធលើបុគ្គលិក លើកត្តាមនុស្សប៉ះពាល់ខ្លាំងណាស់ដល់វប្បធម៌សុវត្ថិភាពក្នុងវិស័យនុយក្លេអ៊ែរ។ នេះមិនរាប់បញ្ជូលអំពីការគំរាមកំហែងភេរវកម្មលើមជ្ឈមណ្ឌលនុយក្លេអ៊ែរ ពីសំណាក់ពួកជីហាតរដ្ឋអ៊ីស្លាម ដែលអឺរ៉ុប ជាពិសេសបារាំង បែលហ្សិក កំពុងប្រឈមនាពេលនេះផង។
ជាចុងក្រោយ បើយើងសំឡឹងមើលផលវិបាកបន្សល់ទុកដោយហ្វូគូស្ហ៊ីម៉ា។ ក្រោយគ្រោះថ្នាក់នុយក្លេអ៊ែរ សារធាតុវិទ្យុសកម្មសាយភាយក្នុងរង្វង់អង្កត់ផ្ចឹត ១០០គីឡូម៉ែត្រ។ ប្រសិនបើគេយករង្វាស់នេះ មកអនុវត្តគ្រប់គ្នាជាបទដ្ឋានសុវត្ថិភាព នោះពិតជាអាចត្រូវប៉ះពាល់ដល់មជ្ឈមណ្ឌលនុយក្លេអ៊ែរ ច្រើនណាស់ មិនថានៅអឺរ៉ុប ឬនៅប្រទេសផ្សេងទេ។ នៅប្រទេសបារាំង បារាំងកំណត់រង្វង់សុវត្ថិភាពតែត្រឹម១០គ.ម. និងដំឡើងដល់២០គ.ម. ក្រោយហ្វូគូស្ហ៊ីម៉ា។ ពោលគឺពុំទាន់មានការអនុម័តច្បាប់វិធាន ឬបទដ្ឋានសុវត្ថិភាពការពារពលរដ្ឋពីហានិភ័យនុយក្លេអ៊ែរទេ។
អ្វីដែលសាមញ្ញ និងប្រាកដបំផុត ថាគ្មានអ្វីអាចបង្កគ្រោះថ្នាក់ធ្ងន់ធ្ងរបាន គឺមានតែការដើរចេញទាំងស្រុង និងឱ្យបានឆាប់រហ័សបំផុត ឈប់រំពឹងលើថាមពលអាតូមិក ដែលថ្នាំពុលរបស់មនុស្សជាតិ បរិស្ថាន និងភពផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ