អង់គ្លេស៖តើលោកស្រីនាយករដ្ឋមន្រ្តីថ្មីតេរ៉េហ្សា ម៉េមានប្រវត្តិរូបសង្ខេបអ្វីខ្លះ?
ចុះផ្សាយនៅថ្ងៃ៖
ស្តាប់ - ០៤:៥៧
តាំងពីថ្ងៃពុធ ទី១៣ កក្កដាមក ប្រទេសអង់គ្លេសមាននាយករដ្ឋមន្រ្តីថ្មីជាស្រ្តីភេទដែលមានឈ្មោះថា តេរ៉េហ្សា ម៉េ (Theresa May)។ លោកស្រីតេរ៉េហ្សាបានចូលជំនួសកន្លែងលោកដាវីដ កាមេរ៉ូនដែលបានលាចុះពីតំណែង ក្រោយពីប្រជាជនអង់គ្លេសបានបោះឆ្នោតផ្តាច់ខ្លួនចេញពីសហភាពអឺរ៉ុប។ លោកស្រីតេរ៉េហ្សា ម៉េជាស្រ្តីអង់គ្លេសទី២ ដែលបានឡើងកាន់តំណែងកំពូលនៅក្នុងប្រទេសអង់គ្លេស បន្ទាប់ពីលោកស្រីម៉ាហ្ការីត ថាច់ឆឺពីខែឧសភា ឆ្នាំ ១៩៧៩ ដល់ខែវិច្ឆិកា ឆ្នាំ ១៩៩០។ តើលោកស្រីនាយករដ្ឋមន្រ្តីថ្មីតេរ៉េហ្សា ម៉េជានរណាដែរ?
ចាប់កំណើតក្នុងថ្ងៃទី១ តុលា ឆ្នាំ ១៩៥៦ និងមានឱពុកជាគ្រូគង្វាល ស្ថានភាពគ្រួសាររបស់លោកស្រីតេរ៉េហ្សា ម៉េក៏មិនខុសគ្នានឹងស្ថានភាពគ្រួសាររបស់ពលរដ្ឋអង់គ្លេសភាគច្រើនដែរ គឺមានស្ថានភាពមធ្យម និងសាមញ្ញ។ លោកស្រីតេរ៉េហ្សា ម៉េត្រូវបានគេចាត់ទុកជាឥស្សរជននយោបាយម្នាក់ដែលមិនសូវមានអំណោយទាន តែទទួលស្គាល់ជាមនុស្សដែលមានអំណាច មានសមត្ថភាព និងមានបុគ្គលិកលក្ខណៈម៉ឹងម៉ាត់ មធ្យ័ត និងរឹងប៉ឹង។
គឺបុគ្គលិកលក្ខណៈម៉ឹងម៉ាត់ មធ្យ័ត និងរឹងប៉ឹងរបស់លោកស្រីតេរ៉េហ្សា ម៉េនេះហើយដែលត្រូវបានគេប្រដូចលោកស្រីទៅនឹងលោកស្រីអតីតនាយករដ្ឋមន្រ្តីអង់គ្លេសម៉ាហ្ការីត ថាច់ឆឺ។ លោកស្រីថាច់ឆឺដែលបានកាន់តំណែងពីខែឧសភា ឆ្នាំ ១៩៧៩ ដល់ខែវិច្ឆិកា ឆ្នាំ ១៩៩០ និងដែលគ្រប់គ្នាដាក់ងារលោកស្រីជាស្រ្តីកណ្តាប់ដៃដែក។ ក៏ប៉ុន្តែ លោកស្រីតេរ៉េហ្សា ម៉េមិនបានយល់ឃើញដូចនេះ និងបានប្រដូចខ្លួនឯងទៅនឹងលោកស្រីនាយករដ្ឋមន្រ្តីអាល្លឺម៉ង់អង់ហ្គឺឡា មែរកិលទៅវិញ។ លោកស្រីតេរ៉េហ្សាគិតថា លោកស្រីមានចំណុចរួមដូចលោកស្រីមែរកិលច្រើនជាងលោកស្រីថាច់ឆឺ។ ចំណុចរួមទាំងនោះមាន ជាកូនស្រីគ្រូគង្វាលដូចគ្នា រៀងសូត្រជំនាន់ដូចគ្នា និងមានស្វាមីតែអត់កូនដូចគ្នា។
លោកស្រីតេរ៉េហ្សា ម៉េបានរៀបការក្នុងឆ្នាំ ១៩៨០ ជាមួយលោកហ្វីលីប ចន ម៉េដែលជាបុគ្គលិកបម្រើការងារក្នុងធនាគារ។ តែលោកស្រីចូលចិត្តលាក់លៀម ឬក៏ថាមិនសូវបានបង្ហាញជាសាធារណៈនូវជីវិតឯកជន និងជីវិតគ្រួសាររបស់លោកស្រីទេ។ លោកស្រីតេរ៉េហ្សាបានផ្តើមអាជីពនយោបាយក្នុងឆ្នាំ ១៩៨៦ បន្ទាប់ពីបានបញ្ចប់ការសិក្សាផ្នែកភូមិវិទ្យានៅសកលវិទ្យាល័យ Oxford។ ក្នុងឆ្នាំ ១៩៨៦ ដដែល លោកស្រីតេរ៉េហ្សាបានជាប់ឆ្នោតជាទីប្រឹក្សាក្នុងសង្កាត់មួយក្នុងទីក្រុងឡុងដ៏។ ក្នុងឆ្នាំ ១៩៩៤ លោកស្រីក៏បានលាឈប់ពីតំណែងទីប្រឹក្សានេះដើម្បីឈរឈ្មោះបោះឆ្នោតសភា តែបានទទួលបរាជ័យចំនួន ២ដង។
លោកស្រីតេរ៉េហ្សាត្រូវរង់ចាំដល់ឆ្នាំ ១៩៩៧ ទើបជាប់ឆ្នោតជាតំណាងរាស្រ្តសម្រាប់គណបក្សអភិរក្សនិយម។ ពីឆ្នាំ ២០០២ ដល់ឆ្នាំ ២០០៣ លោកស្រីតេរ៉េហ្សាបានក្លាយជាស្រ្តីទី១ ដែលកាន់តំណែងជាអគ្គលេខាធិការបក្សអអភិរក្សនិយម។ តែនៅចន្លោះឆ្នាំ ១៩៩៩ និង ២០១០ លោកស្រីបានទទួលតួនាទីជាច្រើននៅផ្ទៃក្នុងបក្សក្នុងពេលដែលបក្សអភិរក្សនិយមស្ថិតជាបក្សប្រឆាំងនៅក្នុងសភា។ ក្នុងឆ្នាំ ២០០៥ លោកស្រីតេរ៉េហ្សាបានចេញមុខគាំទ្រ និងជួយលោកដាវីដ កាមេរ៉ូនរហូតទទួលបានតំណែងជាប្រធានគណបក្សអភិរក្សនិយម។ នៅពេលដែលលោកដាវីដ កាមេរ៉ូនជាប់ឆ្នោតជានាយករដ្ឋមន្រ្តីក្នុងឆ្នាំ ២០១០ ជោគវាសនារបស់លោកស្រីតេរ៉េហ្សាក៏បានវិវត្តន៍ទៅមុខយ៉ាងរហ័សដែរ។
ដើម្បីជាការសងគុណ លោកកាមេរ៉ូនក៏បានតែងតាំងលោកស្រីតេរ៉េហ្សាជារដ្ឋមន្រ្តីក្រសួងមហាផ្ទៃ និងដែលលោកស្រីបានកាន់តំណែងមួយនេះរហូតដល់ការជាប់ឆ្នោតអាណត្តិថ្មីរបស់លោកកាមេរ៉ូនក្នុងឆ្នាំ ២០១៥។ ក្នុងរយៈពេលកាន់តំណែងរដ្ឋមន្រ្តីក្រសួងមហាផ្ទៃចំនួន ៦ឆ្នាំ លោកស្រីតេរ៉េហ្សាបានប្រកាន់យកនយោបាយតឹងរឹងចំពោះក្រុមជនពាល និងក្រុមជនអន្តោប្រវេសន៍ខុសច្បាប់។ ថ្មីៗកន្លងទៅនេះ ពោលក្នុងពេលដែលអឺរ៉ុបជួបវិបត្តិជនអន្តោប្រវេសន៍ លោកស្រីតេរ៉េហ្សាចេញមុខប្រឆាំងនឹងអឺរ៉ុបដែលកំណត់ឲ្យសមាជិកខ្លួនទទួលយកកូដតាជនភៀសខ្លួន។ ក្នុងនាមជារដ្ឋមន្រ្តីមហាផ្ទៃ លោកស្រីតេរ៉េហ្សាបានបង្កើតច្បាប់ស្តីពីសន្តិសុខ និងប្រឆាំងភេរវនិយម។
តែអ្វីដែលបានធ្វើឲ្យគ្រប់គ្នាភ្ញាក់ខ្លាំងនោះ គឺការផ្លាស់ប្តូរជំហររបស់លោកស្រីពីការគាំទ្រ Brexit ឲ្យអង់គ្លេសចេញពីសហភាពអឺរ៉ុបទៅជាជំហរគាំទ្រឲ្យអង់គ្លេសបន្តស្ថិតក្នុងសហភាពអឺរ៉ុបដូចលោកកាមេរ៉ូនទៅវិញ។ តែទន្ទឹមគ្នានេះ លោកស្រីតេរ៉េហ្សាក៏បានព្យាយាមស្ថិតឆ្ងាយពីសង្រ្គាមបាក់កាជុំវិញ Brexit នេះ។ បន្តិចម្តងៗ និងដោយឃើញប្រជារាស្រ្តអង់គ្លេសជ្រើសរើសផ្លូវចេញជាជាងផ្លូវបន្តរស់នៅ លោកស្រីតេរ៉េហ្សាបានដើរនយោបាយសម្របសម្រួលដោយផ្តើមបំភ្លេចជំហរដើមរបស់លោកស្រីដែលចង់ឲ្យអង់គ្លេសបន្តរួមរស់ជាមួយអឺរ៉ុប។
អ្វីៗកាន់តែច្បាស់តាមរយៈការប្រកាសរបស់លោកស្រីតេរ៉េហ្សាជាសាធារណៈថា គ្មានផ្លូវដែលអង់គ្លេសវិលចូលអឺរ៉ុបវិញទេ ហើយថាមុននឹងចេញជាស្ថាពរគ្មានថ្ងៃត្រឡប់វិញនោះ លោកស្រីនឹងព្យាយាមចរចាដើម្បីទទួលបានកិច្ចព្រមពៀងល្អៗពីអឺរ៉ុប និងប្តេជ្ញាកសាងប្រទេសអង់គ្លេសឆ្ពោះទៅកាន់អនាគតដ៏រុងរឿង។ Good Bye លោកដាវីដ កាមេរ៉ូន Welcome លោកស្រីតេរ៉េហ្សា ម៉េសម្រាប់តំណែងនាយករដ្ឋមន្រ្តី នេះជាសារចេញមកពីបបូរមាត់ប្រជារាស្រ្តអង់គ្លេសគ្រប់រូបនៅក្នុងពិធីផ្ទេរតំណែងនៅថ្ងៃពុធ ទី១៣ កក្កដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ