ជំរំជនអន្តោប្រវេសន៍កាឡេ គាស់ហើយ នឹងកើតវិញ មែនឬ ?
ចុះផ្សាយនៅថ្ងៃ៖
ស្តាប់ - ០៤:១២
ប្រតិបត្តិការជម្លៀសអន្តោប្រវេសន៍ នៅតំបន់កាឡេ ភាគខាងជើងប្រទេសបារាំងដើម្បីរង់ចាំលួចឆ្លងព្រំដែនទៅអង់គ្លេស បានចាប់ផ្តើមតាំងពីថ្ងៃចន្ទទី ២៤ តុលា និងគាស់រំលើងជំរំអនាធិបតេយ្យមួយឱ្យអស់ក្នុងរយៈពេលមួយសប្តាហ៍។ ជាទូទៅ ការដឹកជម្លៀសជនអន្តោប្រវេសន៍ចេញ បានប្រព្រឹត្តទៅ ដូចការគ្រោងទុក ប៉ុន្តែសម្រែករិះគន់មានមកពីគ្រប់ទិសទី ជាពិសេសមកពីប្រទេសជិតខាងក្នុងអឺរ៉ុបដូចគ្នា។ ការបោសសំអាតមិនទាន់បានពាក់កណ្តាលផង គំនិតសង្ស័យបានផុសឡើងរួចជាស្រេច ថាជំរំបែបនេះនឹងអាចកើតឡើងជាថ្មី។
ក្រោយពីបានកកើតអស់រយៈពេលជិត២០ឆ្នាំ រដ្ឋាភិបាលបារាំងបានសម្រេចចិត្តគាស់រំលើងជំរំអន្តោប្រវេសន៍ខុសច្បាប់កាឡេ ដែលស្ទើរក្លាយជាភូមិដ៏ធំនិងរខេករខាកបំផុតមួយរបស់បារាំងទៅហើយ។
ជាសរុបអន្តោប្រវេសន៍ប្រមាណជាង ៦៥០០នាក់ (ដែលភាគច្រើនជាអាហ្វហ្កានីស្ថាន សូម៉ាលី អេរីត្រេ ស៊ូដង់ ស៊ីរី ឬអ៊ីរ៉ាក់) នឹងត្រូវបំបែកទៅកាន់មជ្ឈមណ្ឌលទទួលនិងតម្រង់ទិសជនភៀសខ្លួន នៅតាមខេត្តក្រុងផ្សេងៗពេញផ្ទៃប្រទេសបារាំង ទៅតាមអាយុ និងទៅតាមស្ថានភាពជាក់ស្តែងរបស់ជនអន្តោប្រវេសន៍ម្នាក់ៗ។ ចំពោះក្មេងមិនទាន់ពេញវ័យ ប៉ារីសបានស្នើក្រុងឡុងដ៍ឱ្យទទួលពួកគេយកទៅរស់ជុំជាមួយគ្រួសារ។ ឯមនុស្សធំ ត្រូវរិះរកមធ្យោបាយដាក់ពាក្យសុំសិទ្ធិជ្រកកោននយោបាយ ឬសេដ្ឋកិច្ច ... ពីកន្លែងស្នាក់នៅថ្មី !
ប្រជាជនម្ចាស់ស្រុក បានស្គាល់ភាពធូរស្បើយក្នុងចិត្ត នឹងការគាស់រំលើងជំរំនេះ ប៉ុន្តែសម្រាប់ អង្គការមនុស្សធម៌ផ្សេងៗ និងអ្នកវិភាគបរទេសវិញ យល់ខុសៗគ្នា។ ក្នុងរយៈពេលពីរថ្ងៃដំបូង គេរាប់ឃើញមានការបញ្ជូនជនអន្តោប្រវេសន៍ ២ពាន់៨នាក់ ទៅកាន់មជ្ឈមណ្ឌលផ្សេង។
ទន្ទឹមនឹងពេលដែលអាជ្ញាធរបារាំងបានសម្តែងសេចក្តីក្លាហាន បញ្ចេញសកម្មភាពជាក់ស្តែងគាស់រំលើងជំរំកាឡេ ការព្រួយបារម្ភអំពីផលវិបាកនៅថ្ងៃក្រោយក៏បានដុះដាលឡើងស្ទើរពីគ្រប់មជ្ឈដ្ឋាន ចោទសួរថាតើជំរំអន្តោប្រវេសន៍ពិតជាត្រូវរលាយបាត់រូបរហូតមែនឬ ? គ្មាននរណាហ៊ានឆ្លើយថា ប្រាកដទេ ! ព្រោះសូម្បីតែជនអន្តោប្រវេសន៍កាឡេផ្ទាល់ ដែលបើទោះបីជាសុខចិត្តជម្លៀសខ្លួនតាមបញ្ជារបស់អាជ្ញាធរមែន តែត្រៀមខ្លួននឹងរស់នៅតាមចិញ្ចើមថ្នល់ ដើម្បីចាំរត់ឆ្លងទៅអង់គ្លេសឱ្យទាល់តែបាន។
ប្រតិបត្តិការជម្លៀសនេះ ត្រូវមានរយៈពេលមួយសប្តាហ៍ បានចាប់ផ្តើមកាលពីថ្ងៃចន្ទ ក្រោមការត្រួតពិនិត្យការពារសំណាក់កងកម្លាំងប៉ូលិសជាច្រើននាក់ និងបានទទួលចំណាប់អារម្មណ៍ថ្នាក់អន្តរជាតិតែម្តង ជាមួយនឹងវត្តមានអ្នកកាសែត ជិត៧០០នាក់ មកពីគ្រប់ជ្រុងនៃពិភពលោក។ ព្រោះថាវិបត្តិអន្តោប្រវេសន៍នៅកាឡេ នេះមិនមែនជាវិបត្តិរបស់បារាំងម្នាក់ឯងឡើយ។ ប្រវត្តិមានវែងឆ្ងាយអាចសរសេរជាប្រលោមលោកបាន និងជាកញ្ចក់ឆ្លុះបញ្ចាំងអំពីនយោបាយអន្តោប្រវេសន៍របស់អឺរ៉ុបទាំងមូល។
សម្រាប់អង់គ្លេស ប្រទេសដែលមានជាប់ពាក់ព័ន្ធដោយផ្ទាល់នឹងអន្តោប្រវេសន៍កាឡេនេះ ព្រឹត្តិការណ៍ជម្លៀសអន្តោប្រវេសន៍បានក្លាយជាប្រធានបទសំខាន់ ឡើងទំព័រមុខស្ទើរលើគ្រប់កាសែត សម្តែងការព្រួយបារម្ភចំពោះផលវិបាកនៃការបំបែកជំរំ។ ប៉ុន្តែមិនយូរមិនឆាប់ទេ នឹងមានជំរំអន្តោប្រវេសន៍ថ្មីកើតឡើងទៀត ព្រោះបើតាមសារព័ត៌មានអង់គ្លេស ជនអន្តោប្រវេសន៍នៅកាឡេទាំងអស់ មានកម្មវត្ថុតែមួយគឺចង់ទៅជ្រកកោននៅអង់គ្លេស។ ថ្វីបើពេលនេះពួកគេព្រមចាកចេញដោយស្រួលតាមសំណើប៉ូលិសបារាំង ប៉ុន្តែមិនយូរមិនឆាប់ទេ ពួកគេនឹងវិលត្រលប់មកកាឡេដើម្បីលួចរត់ទៅអង់គ្លេសនៅថ្ងៃក្រោយនោះ ជាក់ជាមិនខាន។ សារព័ត៌មានអង់គ្លេសខ្លះទៀតបានបង្ហាញភាពអៀនខ្មាសចំពោះទង្វើរបស់អង់គ្លេស ក្នុងការប្រើលុយសម្រាប់ទិញប្រតិបត្តិការជម្លៀសអន្តោប្រវេសន៍ឱ្យឆ្ងាយពីដៃជើង ពីភ្នែក។ កាឡេ ជាភាពខ្មាសអៀនរបស់មនុស្សជាតិ !
អាល្លឺម៉ង់ដែលកំពុងរងវិបត្តិអន្តោប្រវេសន៍ដែរ ខ្លះធ្វើការរិះគន់ខ្លាំងៗប្រតិបត្តិការគាស់រំលើងជំរំអន្តោប្រវេសន៍នេះ ដោយបន្ទោសនយោបាយខ្ជិលច្រអូសរបស់បារាំងថា បានធ្មេញភ្នែក ធ្វើមិនដឹងមិនឮ មិនរកដំណោះស្រាយពីដំបូងភ្លាម ទុករហូតទាល់តែធំ ធ្ងន់ធ្ងរស្ទើរក្លាយជាជំងឺមហារីកទៅហើយ។ នេះហើយជាលទ្ធផលនៃនយោបាយអន្តោប្រវេសន៍របស់អឺរ៉ុប។ ខ្លះទៀត គ្មានទំនុកចិត្តលើការគាស់រំលើងជំរំកាឡេថាជាដំណោះស្រាយឡើយ។ ជំរំលួចលាក់ និងរស់តាមផ្លូវអាចនឹងកកើតឡើង យ៉ាងអនាធិបតេយ្យ នៅកាឡេ តាមក្រោយ។ តែទោះជាបានរិះគន់ក្តី ក៏អាល្លឺម៉ង់បានត្រៀមលក្ខណៈជាស្រេចនឹងទទួលយកជនអន្តោប្រវេសន៍កាឡេខ្លះ ប្រសិនបើអាជ្ញាធរបារាំងធ្វើការស្នើសុំ និងត្រៀមខ្លួនទទួលពាក្យសុំសិទ្ធិជ្រកកោនពីជនអន្តោប្រវេសន៍កាឡេទាំងនោះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ