ហេតុអ្វីអារ៉ាប៊ីសាអូឌីតចង់ក្លាយជាសមាជិកក្រុមប្រទេសនិយាយភាសាបារាំង ?
ចុះផ្សាយនៅថ្ងៃ៖
ជំនួបកំពូលក្រុមប្រទេសនិយាយភាសាបារាំង La Francophonie លើកទី១៧ បានបិទបញ្ចប់នៅថ្ងៃទី ២៧ វិច្ឆិកា ដោយបានចេញសេចក្តីថ្លែងការណ៍រួម អំពាវនាវឱ្យប្រទេសជាសមាជិកទាំងអស់មានកិច្ចសហប្រតិបត្តិការល្អ ជាពិសេសក្នុងវិស័យប្រយុទ្ធប្រឆាំងនឹងអំពើភេរវនិយម ព្រមទាំងបានព្រមព្រៀងគ្នាលើកបេក្ខភាពរបស់ប្រទេសអារ៉ាប៊ីសាអូឌីត ទៅពិភាក្សានៅក្នុងជំនួបលើកក្រោយ នៅរវាងពីរឆ្នាំទៀត។ ហេតុអ្វីប្រទេសអារ៉ាបដូចយ៉ាងអារ៉ាប៊ីសាអូឌីត ចង់ចូលក្នុងក្រុមប្រទេសនិយាយភាសាបារាំង ? ហេតុអ្វីបេក្ខភាពនេះ ត្រូវពន្យារពេលពិចារណា ?
ប្រមុខរដ្ឋ-រដ្ឋាភិបាល ប្រទេសជាសមាជិកអង្គការក្រុមប្រទេសនិយាយភាសាបារាំង ឬហៅដោយខ្លីថា ហ្វ្រង់កូហ្វូនី តែងជួបប្រជុំគ្នាជារៀងរាល់ពីរឆ្នាំម្តង។ ជំនួបកំពូលបែបពហុភាគី ដល់ទៅជាង៨០ប្រទេសយ៉ាងនេះ តែងតែប្រព្រឹត្តទៅដោយមានបង្កប់ ប្រយោជន៍នយោបាយ និងសេដ្ឋកិច្ច មិនលែងឡើយ។ យ៉ាងណាមិញ នៅក្នុងជំនួបលើកទី១៦ អង្គការក៏ត្រូវពិនិត្យពិចារណាលើបេក្ខភាពសុំចូលជាសមាជិកថ្មី ! បេក្ខភាពថ្មីដែលខ្លះសុំចូលជាសមាជិក ខ្លះត្រឹមប្រទេសសង្កេតការណ៍ តែប្រទេសអារ៉ាប៊ីសាអូឌីត បានទទួលចំណាប់អារម្មណ៍ប្លែកពីគេ។
អង្គការអន្តរជាតិហ្វ្រង់កូហ្វូនី ជាស្ថាប័នដែលប្រមូលផ្តុំប្រទេសមានប្រវត្តិ -មានប្រើភាសាបារាំង និងចេះគោរពតម្លៃវប្បធម៌ សន្តិភាព ប្រជាធិបតេយ្យ ... បើស្តាប់ទៅលើនិយមន័យដើម អារ៉ាប៊ីសាអូឌីត គ្មានចំណងវប្បធម៌ ប្រវត្តិសាស្ត្រអ្វីទាក់ទងនឹងអង្គការនិយាយភាសាបារាំងសោះ ប៉ុន្តែការដាក់បេក្ខភាពសុំចូលជាសមាជិកអង្គការ មិនមែនជាភ្ញាក់ផ្អើល ចម្លែកខ្លាំងឡើយនៅពេលនេះ។
អង្គការប្រទេសនិយាយភាសាបារាំង បានពង្រីកខ្លួនកាន់តែធំៗឡើង។ នៅរយៈពេល២០ឆ្នាំចុងក្រោយនេះ អង្គការបានពង្រីកខ្លួន និងបញ្ចូលសមាជិកថ្មីៗជាច្រើន ក្នុងថានៈជាសមាជិករង ឬជាសមាជិកសង្កេតការណ៍។ ជាឧទាហរណ៍ជាក់ស្តែង សូម្បីតែប្រទេសដែលមានប្រើ/និយាយភាសាបារាំងយ៉ាងតិចតួចបំផុត ដូចជាម៉ិចស៊ិក ហ្កាណា អេស្តូនី ឬថៃ ក៏បានក្លាយជាសមាជិករងរបស់អង្គការរួចទៅហើយ។ នៅឆ្នាំនេះ អង្គការបានត្រៀមទទួលសមាជិកថ្មីពីរទៀត ក្នុងថានៈជាសមាជិកសង្កេតការណ៍ គឺ អាហ្សង់ទីន និងកូរ៉េខាងត្បូង។
តាំងពីឆ្នាំ១៩៩០មក ពោលគឺក្រោយការដួលរំលំជញ្ជាំងប៊ែរឡាំង អង្គការហ្វ្រង់កូហ្វូនី បានស្គាល់ការរីកលូតលាស់ខ្លាំង ព្រោះក្រុមប្រទេសនៅអឺរ៉ុបខាងកើត អឺរ៉ុបកណ្តាល និងតំបន់បាល់កង់ ត្រូវការបង្ហាញឯករាជភាពរបស់ខ្លួននៅលើឆាកអន្តរជាតិ បានមកសុំមួយម្តងៗ បន្តបន្ទាប់គ្នា ដើម្បីបានក្លាយជាសមាជិកអង្គការហ្វង់កូហ្វូនី ដ៏មានឥទ្ធិពល សម្រាប់បង្ខិតខ្លួនឱ្យបានចូលកៀកប្រទេសបារាំង និងសហភាពអឺរ៉ុប។ ប្រទេសអេមៀរ៉ាអារ៉ាប់រួម ក៏បានក្លាយជាសមាជិកសង្កេតការណ៍ អង្គការរួចទៅហើយដែរ នៅឆ្នាំ២០១០ និងនៅឆ្នាំ២០១២ សម្រាប់កាតា ក្នុងនាមសមាជិករង។ បើដូច្នេះ រឿងអ្វីអារ៉ាប៊ីសាអូឌីត ត្រូវនៅក្រៅសង្វៀងម្នាក់ឯង ?
អារ៉ាប៊ីសាអូឌីត បានដាក់ពាក្យដាក់បេក្ខភាពចូលជាសមាជិកអង្គការ បានយ៉ាងត្រឹមត្រូវតាមលក្ខខណ្ឌហើយ។ អារ៉ាប៊ីសាអូឌីត បានថែមទាំងអួតអាងអំពីឆន្ទៈ អនុគ្រោះដល់ការអភិវឌ្ឍន៍បម្រើបម្រាស់ភាសាបារាំង។ កំរិតនិងបរិមាណនៃការប្រើប្រាស់ភាសាបារាំង មិនសំខាន់ទេ នៅពេលចុះឈ្មោះដាក់បេក្ខភាព តែសំខាន់ត្រូវបង្ហាញអំពីការគោរពផលប្រយោជន៍ និងតម្លៃពិតរបស់អង្គការ។ ត្រង់ចំណុចនេះ អារ៉ាប៊ីសាអូឌីតបានលម្អិត ដោយមានផ្តល់តួលេខយ៉ាងច្បាស់លាស់អំពីចំនួនសាលារៀន មហាវិទ្យាល័យ និងចំនួនសិស្សរៀនភាសាបារាំងនៅក្នុងរាជាណាចក្រទៀត។
ប៉ុន្តែការនិយាយនិងប្រើភាសាបារាំងមួយមិនទាន់គ្រប់គ្រាន់ឡើយ ! ថ្វីបើលក្ខខណ្ឌរបស់អង្គការក្នុងការគោរពតម្លៃមនុស្សមានលក្ខណៈទូលំទូលាយខ្លាំង- សមាជិកខ្លះប្រកាន់របបផ្តាច់ការមែន តែអង្គការប្រឹងធ្វើសកម្មភាពគ្រប់យ៉ាងដើម្បី "សមភាព” រវាងស្ត្រីនិងបុរស។ សមភាពបុរសនិងស្ត្រី ដែលជារនាំងមួយខ្ទាស់អារ៉ាប៊ីសាអូឌីត មិនឆ្លងចូលក្នុងរង្វង់អង្គការបានឡើយ។
នៅអារ៉ាប៊ីសាអូឌីត ស្ត្រីគ្មានសិទ្ធិ ជាមនុស្សពេញវ័យម្នាក់ឡើយ ! ស្ត្រីត្រូវស្ថិតនៅក្រោមអាណាព្យាបាលរបស់បុរស មិនថាប្រុសនេះ ជាស្វាមី ជាបងឬប្អូន ឬជាកូនឡើយ។ នៅក្នុងសំណុំបែបបទចុះឈ្មោះ អារ៉ាប៊ីសាអូឌីត បានត្រឹមសរសេរពីរបីឃ្លាថា “នឹងប្រុងប្រយ័ត្នចំពោះលក្ខខណ្ឌជីវិតរបស់ស្ត្រី” ! តែពាក្យនេះពិតជាមិនគ្រប់គ្រាន់សម្រាប់គណៈកម្មការទទួលយកសមាជិកភាពអារ៉ាប៊ីសាអូឌីតបានឡើយ។ ម្យ៉ាងវិញទៀត អគ្គលេខាអង្គការហ្វ្រង់កូហ្វីនី គឺជាស្ត្រីភេទ និងជាអ្នកការពារស្ត្រីផង គាត់ពិតជាពិបាកទទួលស្វាគមន៍អារ៉ាប៊ីសាអូឌីត ខ្លាំងណាស់ ក្នុងកាលៈទេសៈបែបនេះ។ សម្រេចសម្រួច អង្គការបានរកឃើញច្រកចេញមួយ ដែលព្រមព្រៀងរួមគ្នា គឺលើកសេចក្តីសម្រេចចិត្តអំពីបេក្ខភាពអារ៉ាប៊ីសាអូឌីតទៅពេលក្រោយ ដោយមូលហេតុសំណុំបែបបទ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ