RSF៖ចំនួនអ្នកកាសែតស្លាប់ក្នុងលោកមានចំនួន ៥៧នាក់ក្នុងឆ្នាំ ២០១៦
នៅថ្ងៃចន្ទ ទី១៩ ធ្នូនេះ អង្គការអ្នកយកការណ៍គ្មានព្រំដែន (Reporters sans frontières) ហៅកាត់ RSF បានផ្សព្វផ្សាយរបាយការណ៍ប្រចាំឆ្នាំ ២០១៦ ស្តីពីចំនួនអ្នកកាសែតស្លាប់ក្នុងលោក។ របាយការណ៍បានប្រាប់ឲ្យដឹងថា ចំនួនអ្នកកាសែតស្លាប់ក្នុងឆ្នាំ ២០១៦ មានចំនួន ៥៧នាក់ ក្នុងនោះមានស្រ្តី៥នាក់ ពោលតិចជាងឆ្នាំ ២០១៥ ដែលមានស្លាប់ ៦៧នាក់។ តាម RSF ដដែល ស៊ីរីជាប្រទេសដែលមានអ្នកកាសែតស្លាប់ច្រើនជាងគេក្នុងឆ្នាំ ២០១៦។
ចុះផ្សាយនៅថ្ងៃ៖
ស្តាប់ - ០២:០៧
ជាមួយនឹងអ្នកកាសែតស្លាប់ចំនួន ១៩នាក់ក្នុងឆ្នាំ ២០១៦ ស៊ីរីត្រូវបានអង្គការអ្នកយកការណ៍គ្មានព្រំដែនចាត់ទុកជាប្រទេសឋាននរកសម្រាប់អ្នកកាសែត។ បន្ទាប់មក មានប្រទេសអាហ្វហ្កានីស្ថានដែលមានអ្នកកាសែតស្លាប់ចំនួន ១០នាក់ ម៉ិកស៊ិកស្លាប់ចំនួន ៩នាក់ អ៊ីរ៉ាក់ចំនួន ៧នាក់ និងប្រទេសយេម៉ែនស្លាប់ចំនួន ៥នាក់។ តាមអង្គការអ្នកយកការណ៍គ្មានព្រំដែន ចំនួនអ្នកកាសែតស្លាប់តិចក្នុងឆ្នាំ ២០១៦ ក៏ដោយសារថា មានអ្នកកាសែតកាន់តែច្រើនឡើងៗបានភៀសខ្លួនចេញពីប្រទេសដែលគ្រោះថ្នាក់ខ្លាំងសម្រាប់អ្នកកាសែត ដូចជាស៊ីរី អ៊ីរ៉ាក់ ឬមួយលីប៊ីជាដើម។
អង្គការអ្នកយកការណ៍គ្មានព្រំដែនបានបញ្ជាក់ថា នៅក្នុងចំណោមអ្នកកាសែតស្លាប់ទាំង ៥៧នាក់ក្នុងឆ្នាំ ២០១៦ មាន៣ភាគ៤ ជាផ្ទាំងស៊ីបនៃការវាយប្រហារក្នុងនាមជាអ្នកកាសែត ហើយមាន២ភាគ៣ត្រូវបានបាត់បង់ជីវិតនៅក្នុងតំបន់ជម្លោះ។ តួលេខនេះជាសក្ខីកម្មដែលបញ្ជាក់ពីអំពើហិង្សាប្រឆាំងអ្នកកាសែតដោយចេតនា និងបរាជ័យរបស់អង្គការសហប្រជាជាតិក្នុងការបង្កើតឲ្យមានស្ថានប័នអន្តរជាតិមួយដើម្បីគាំពារអ្នកកាសែត។ បើគិតក្នុងរយៈពេល ១០ឆ្នាំចុងក្រោយនេះ មានអ្នកកាសែតស្លាប់យ៉ាងតិច ៧៥០នាក់។
ចំនួនអ្នកកាសែតស្លាប់ក្នុងឆ្នាំ ២០១៦ មានការធ្លាក់ចុះ បើធៀបនឹងឆ្នាំ ២០១៥ តែចំនួនអ្នកកាសែតជាប់ឃុំឃាំងក្នុងឆ្នាំ ២០១៦ បានកើន ២២% បើធៀបនឹងឆ្នាំ ២០១៥។ ក្រៅពីចំនួនអ្នកកាសែតស្លាប់ និងជាប់ឃុំឃាំង អង្គការអ្នកយកការណ៍គ្មានព្រំដែនក៏បានប្រាប់ឲ្យដឹងពីការធ្លាក់ចុះនៃចំនួនអ្នកកាសែតជាប់ជាចំណាប់ខ្មាំងក្នុងឆ្នាំ ២០១៦ ធៀបនឹងឆ្នាំ ២០១៥ ពោលធ្លាក់ពី ៦១នាក់មកនៅត្រឹម ៥២នាក់។ ម្យ៉ាងទៀត ចំនួនអ្នកកាសែតជាប់ជាចំណាប់ខ្មាំងក្នុងឆ្នាំ ២០១៦ មានច្រើននៅក្នុងតំបន់មជ្ឈិមបូព៌ា ពិសេសនៅស៊ីរី យេម៉ែន និងនៅអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ