ប្រយុទ្ធប្រឆាំងនឹងអំពើភេរវនិយម តើអូតង់អាចធ្វើអ្វីបានខ្លះ?
ចុះផ្សាយនៅថ្ងៃ៖
ស្តាប់ - ០៣:៥៣
នៅថ្ងៃទី ២៥ ឧសភានេះ ប្រមុខរដ្ឋ រដ្ឋាភិបាលនៃប្រទេសជាសមាជិកអង្គការអូតង់ ទាំង២៨ ត្រូវជួបជុំគ្នាបើកជំនួបកំពូលប្រចាំឆ្នាំ នៅទីក្រុងព្រុចសែល ប្រទេសបែលហ្ស៊ិក ដោយមានលោក ដូណាល់ ត្រាំ ប្រធានាធិបតីអាមេរិកចូលរួមជាលើកទីមួយ។ ជំនួបប្រជុំឆ្នាំនេះប្រព្រឹត្តទៅតែបីថ្ងៃក្រោយភេរវកម្មនៅអង់គ្លេស និងក្នុងបរិបទនៃការប្តូរផ្លាស់មេដឹកនាំធំៗជាច្រើនរូប។ ហេតុដូច្នេះហើយបានជាសំណួរជាកំពុងចោទឡើង ថាតើអូតង់អាចធ្វើខ្លះប្រឆាំងនឹងភេរវកម្ម ? ប្រទេសជាសមាជិកអាចរួបរួមគ្នាបានប៉ុណ្ណា ?
ជំនួបប្រជុំឆ្នាំនេះខុសពីឆ្នាំមុន ! ព្រោះបរិបទអន្តរជាតិប្តូរផ្លាស់ច្រើនណាស់ ! អាមេរិកមានប្រធានាធិបតីថ្មី ជាលោក ដូណាល់ ត្រាំ អង់គ្លេសមាននាយករដ្ឋមន្ត្រីថ្មី ជាអ្នកដឹកនាំប្រទេសដើរចេញពីអឺរ៉ុប លោកស្រី តេរ៉េសហ្សា ម៉េ ឯបារាំងក៏មានប្រធានាធិបតីថ្មីវ័យក្មេង ដែលស្រលាញ់គាំទ្របំផុតអឺរ៉ុប ... មេដឹកនាំប្រទេសមហាអំណាច ជាបិតាប្រជាធិបតេយ្យធំៗ ទំនងជាត្រូវការពេលបន្តិច ក្នុងការបង្ហាញមានជំហររបស់ខ្លួន ប៉ុន្តែសំណុំរឿងខ្លះ មិនអាចរង់ចាំបានទេ ឧទាហរណ៍ការប្រយុទ្ធប្រឆាំងនឹងភេរវកម្ម។
ពីរថ្ងៃក្រោយភេរវកម្មនៅ Manchester ប្រទេសអង់គ្លេស សំណួរស្តីអំពីការចូលរួមចំណែករបស់អូតង់ក្នុងយុទ្ធនាការប្រយុទ្ធប្រឆាំងនឹងភេរវនិយម បានចោទឡើងជាងពេលណាទាំងអស់។ អង់គ្លេសនិងសហរដ្ឋអាមេរិក ចង់ឱ្យអង្គការមួយនេះចូលរួមចំណែកយ៉ាងពេញលេញ មានចំណែកមួយភាគតែម្តងក្នុងប្រតិបត្តិការប្រយុទ្ធប្រឆាំងនឹងពួកអង្គការរដ្ឋអ៊ីស្លាម។
ប៉ុន្តែតើអូតង់ត្រៀមខ្លួនបានប៉ុណ្ណា ? អូតង់ ឬណាតូ សម្ព័ន្ធអាត្លង់ទិក ដែលបង្កើតឡើងនៅឆ្នាំ១៩៤៩ ដើម្បីប្រឈមនឹងការវាតទីរបស់សហភាពសូវៀត កំពុងតែស្វែងរកការសម្របខ្លួនទៅនឹងបរិបទអន្តរជាតិប្រកបដោយអស្ថិរភាព បង្កឡើងដោយជម្លោះថ្មីៗ។ អូតង់ខ្លួនឯងក៏កំពុងរង់ចាំពាក្យច្បាស់លាស់គ្រលាស់ចេញពីមាត់លោក ដូណាល់ ត្រាំ ថាតើអាមេរិកមានសាមគ្គីភាពជាមួយសមាជិកប៉ុណ្ណា ?
តាំងពីឡើងកាន់តំណែងមក លោកប្រធានាធិបតីអាមេរិកមិនដែលបានបញ្ជាក់ជំហរនយោបាយរបស់រដ្ឋាភិបាលចំពោះអូតង់ទេ។ ឯកអគ្គរដ្ឋទូតអាមេរិកប្រចាំនៅអូតង់ក៏មិនទាន់ត្រូវបានតែងតាំងផង ! លោកត្រាំ ទំនងជានឹងនិយាយតិចតួចបំផុត នៅក្នុងជំនួបប្រជុំនេះ ដើម្បីបញ្ចៀសកំហុស។ លោកត្រាំមានតែពាក្យមួយមាត់គត់ គឺ ចាត់ទុកអូតង់ជាអង្គការប្រើការមិនកើត ចង់ដកខ្លួនចេញប្រសិនបើសមាជិកផ្សេងទៀត មិនព្រមបង្កើនថវិកាយោធាជួយអង្គការទេ។ សម្រាប់លោកត្រាំ បើគេចង់ឱ្យអូតង់មានមធ្យោបាយច្រើនក្នុងការប្រយុទ្ធប្រឆាំងនឹងភេរវនិយម អឺរ៉ុបត្រូវតែចាក់លុយថែមក្នុងវិស័យយោធា។
បង្កើនថវិកាយ៉ាងហោចណាស់ ឱ្យបាន២%នៃទ្រព្យធនជាតិ ដូចដែលអូតង់ធ្លាប់បានសម្រេចកាលពីឆ្នាំ២០១៤ បានធ្វើឱ្យអូតង់ប្រមូលប្រាក់បានប្រមាណ១០ពាន់លានអឺរ៉ូបន្ថែម គិតមកទល់ឆ្នាំ២០១៦។ ហើយនៅឆ្នាំ២០១៧នេះ ៧ទៅ១០ប្រទេសជាសមាជិកអូតង់ផ្សេងទៀត ក៏នឹងត្រូវសម្រេចបាននូវកម្មវត្ថុថវិកានេះបានដែរ។ ការនេះជាសញ្ញាវិជ្ជមានលួងចិត្តអាមេរិកបានបន្តិចដែរ។ តែអាល្លឺម៉ង់បដិសេធមិនគោរពពាក្យសន្យាបង្កើនថវិកាយោធាឱ្យដល់២%ទេ ព្រោះខ្លាចប៉ះពាល់ដល់ការអភិវឌ្ឍន៍ប្រទេស។ ចំណែកបារាំងវិញ ក៏មិនព្រមដែរ ព្រោះមិនដឹងថាអូតង់ចាត់ចែងចំណូលបន្ថែមនោះយ៉ាងណា។ ម្យ៉ាងទៀត បារាំងមានបន្ទុកធ្ងន់ស្រាប់មានប្រតិបត្តិការយោធាប្រយុទ្ធប្រឆាំងនឹងពួកភេរវនិយមនៅបរទេសស្រាប់ទៅហើយ។ បារាំងជាមួយសមាជិកផ្សេងទៀត មើលមិនឃើញអំពីប្រយោជន៍អ្វី ដែលអូតង់ត្រូវបន្ថែមតួនាទីចេញប្រយុទ្ធប្រឆាំងនឹងភេរវកម្មទៀតនោះទេ។
នៅទីបំផុត ការណាត់ជួបគ្នា របស់សមាជិកទាំង២៨របស់អង្គការអូតង់ត្រូវជួបជុំគ្នានៅព្រុចសែល នៅថ្ងៃព្រហស្បតិ៍នេះ មិនត្រូវបានចាត់ទុកជាជំនួបកំពូលប្រចាំឆ្នាំ ហើយក៏មិនមែនជាជំនួបពិសេសអ្វីដែរ គឺមានទម្រង់ត្រឹមតែជាកិច្ចប្រជុំដ៏សាមញ្ញមួយ ដែលនឹងគ្មានសេចក្តីសម្រេចអ្វីជាដុំកំភួនឡើយ។ ខុសពីទម្លាប់រាល់ឆ្នាំ នឹងគ្មានទេការចេញសេចក្តីថ្លែងការណ៍រួម ការប្រជុំត្រៀមតាំងពីពីរបីថ្ងៃមុនមិនអាចជំនះភាពចម្រូងចម្រាសគ្នាបានឡើយ។ ហើយក៏គ្មានសោះដែរវិធានការច្បាស់លាស់ ត្រៀមសម្រាប់បើកប្រជុំធំនៅថ្ងៃព្រហស្បតិ៍នេះ ព្រោះគ្មានការព្រមព្រៀងគ្នា។ ការជួបប្រជុំគ្នា អាចត្រឹមបើកឱកាសឱ្យមេដឹកនាំទើបជាប់ឆ្នោតថ្មីៗ បានស្គាល់គ្នា បានផ្តោះប្តូរកិច្ចសន្ទនាទ្វេភាគីរវាងប្រមុខដឹកនាំថ្មី ដូចគ្នា ឬមេដឹកនាំថ្មីជាមួយថ្នាក់ដឹកនាំចាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ