តើសហភាពអឺរ៉ុបមាននីតិវិធីដាក់ពិន័យសមាជិកប្រព្រឹត្តខុសយ៉ាងណា ?
ចុះផ្សាយនៅថ្ងៃ៖
ច្បាប់មានចែង តែពុំធ្លាប់មានទេ ការព្រមានដាក់ទណ្ឌកម្មសមាជិកក្នុងសហភាពអឺរ៉ុប។ បន្ទាប់ពីបានទុកពេលមួយសប្តាហ៍ឱ្យប៉ូឡូញពិចារណាមក ប៉ូឡូញបានសម្រេចបញ្ឈប់គម្រោងកំណែទម្រង់ដ៏ចម្រូងចម្រាសរបស់ខ្លួន កាលពីដើមសប្តាហ៍ គួរឱ្យភ្ញាក់ផ្អើល។ ប៉ុន្តែនៅថ្ងៃពុធទី ២៦កក្កដា ២០១៧ នេះ គណៈកម្មការអឺរ៉ុបបានបង្ហើបបង្ហាញផែនការដាក់ទណ្ឌកម្មប៉ូឡូញ ប្រសិនបើសមាជិកមួយនេះនៅរឹងទទឹងល្មើសបម្រាមសហភាព។ តើសហភាពអឺរ៉ុបមាននីតិវិធីព្រមានសមាជិកធ្វើខុសយ៉ាងដូចម្តេចខ្លះ ?
អំណាចប្រតិបត្តិអឺរ៉ុប បានលើកព្រលយឱ្យដឹងតាំងពីតែថ្ងៃទី ១៩កក្កដាមកម្ល៉េះ អំពីលទ្ធភាពដាក់ឱ្យដំណើរការនីតិវិធីដាក់ទណ្ឌកម្មរដ្ឋាភិបាលប៉ូឡូញ ដែលមានចែកក្នុងមាត្រា៧ ពីបទប្រព្រឹត្តខ្លួនប្រឆាំងនឹងច្បាប់របស់សហភាពអឺរ៉ុប ទៅរំលោភបំពានឯករាជ្យភាពប្រព័ន្ធតុលាការក្នុងប្រទេស។
ប៉ូឡូញ ក្រោមការដឹកនាំរបស់រដ្ឋាភិបាលអភិរក្សនិយមជ្រុល បានស្នើ និងអនុម័តច្បាប់ធ្វើកំណែទម្រង់ប្រព័ន្ធតុលាការ ដោយបើកផ្លូវឱ្យមានការដកឬហូតតំណែងចៅក្រមបានផង និងចង់សភាជាអ្នកជ្រើសតាំងសមាជិកក្រុមប្រឹក្សាចៅក្រមផង ហើយថែមធ្វើកំណែទម្រង់ច្បាប់ពង្រឹងនយោបាយឱ្យរដ្ឋាភិបាលមានអំណាចអាចត្រួតពិនិត្យតុលាការកំពូលបានទៀត។
កំណែទម្រង់ច្បាប់របស់ប៉ូឡូញបែបនេះ ជាការរំលោភច្បាប់ រំលោភគោលការណ៍ប្រជាធិបតេយ្យរបស់សហភាព។ តុលាការជាប្រព័ន្ធឯករាជ្យ ! ហេតុដូច្នេះហើយបានជាអឺរ៉ុបមិនអាចឈរនៅស្ងៀមបណ្តោយឱ្យសមាជិកខ្លួនធ្វើអ្វីស្រេចចិត្ត ដោយបានចេញគំរាម និងព្រមានយ៉ាងចំ ដោយដាក់ឱសានវាទឱ្យមួយសប្តាហ៍។ ហើយមុននឹងចាប់ផ្តើមបើកនីតិវិធីដាក់ទណ្ឌកម្មប៉ូឡូញ គណៈកម្មការអឺរ៉ុប បានហៅប៉ូឡូញមកជួបជជែក តែគួរឱ្យសោកស្តាយប៉ូឡូញមិនមក។
តាមការពិត ក្រោយការគំរាមរបស់អឺរ៉ុប មានការវិវឌ្ឍន៍ ដ៏គួរឱ្យភ្ញាក់ផ្អើលច្រើននៅប៉ូឡូញ ! នៅទីបំផុត លោក ប្រធានាធិបតី Andrzej Duda ដែលប្រសូតចេញពីបក្សស្តាំអភិរក្សនិយមបំផុត និងជាបក្សកាន់អំណាច បានប្រើសិទ្ធិវ៉េតូប្រធានាធិបតីមិនចុះហត្ថលេខាផ្តល់សុពលភាពឱ្យប្រើប្រាស់ច្បាប់ធ្វើកំណែទម្រង់ប្រព័ន្ធតុលាការដ៏ចម្រូងចម្រាសដែលព្រឹទ្ធសភាទើបអនុម័តទេ ក្រោមហេតុផលដើម្បីធានាសន្តិភាពជាតិ ប្រឈមនឹងចលនាបាតុកម្មតាំងពីជាច្រើនថ្ងៃ។ តែលោកបានចុះហត្ថលេខាយល់ព្រមឱ្យមានកំណែទម្រង់តែងតាំងប្រធានតុលាការផ្នែកនីតិរួម ដោយរដ្ឋមន្ត្រីក្រសួងយុត្តិធម៌។ គណបក្សអភិរក្សនិយមដែលមានសំឡេងភាគច្រើននៅក្នុងសភាបានសន្យាមិនដកថយឡើយ ព្រោះសំអាងថាប្រព័ន្ធតុលាការនៅប៉ូឡូញ ពុករលួយខ្លាំងណាស់។
ចំណែកសហភាពអឺរ៉ុប ក៏មិនព្រលែងសម្ពាធដែរ។ ក្រៅអំពីសំណុំរឿងធ្វើកំណែទម្រង់ប្រព័ន្ធតុលាការលើកនេះ ប៉ូឡូញក៏បានល្មើសវិធានច្បាប់អឺរ៉ុប តាំងពីឆ្នាំ២០១៦មក តាមរយការធ្វើកំណែទម្រង់តុលាការធម្មនុញ្ញ។ ដំណើរការតម្រង់ប៉ូឡូញកំពុងតែចាប់ផ្តើម។ មិនថាលើកមុន ឬលើកនេះទេ សហភាពអឺរ៉ុបសុទ្ធតែបានបើកឱកាសមានការជជែកពិភាក្សាគ្នាជាមុនសិន ប៉ុន្តែក្នុងករណីបរាជ័យ សហភាពអឺរ៉ុបនឹងប្រើនីតិវិធីចុងក្រោយ ដាក់ទណ្ឌកម្មប៉ូឡូញ។ នីតិវិធីនេះដែលមានចែកក្នុងមាត្រា៧នៃសន្ធិសញ្ញាអឺរ៉ុប ប្រៀបបាននឹងអាវុធនុយក្លេអ៊ែរប្រល័យលោក។
ខុសពីដំណើរដាក់ពិន័យផ្សេងៗទៀត ដែលគេសង្កេតឃើញធ្លាប់មានប្រើញយដង និងដែលមានត្រឹមជាទណ្ឌកម្មហិរញ្ញវត្ថុ នីតិវិធីនៃមាត្រា៧ ជាដំណើរការដ៏ស្មុគស្មាញនិងធ្ងន់ធ្ងរខ្លាំង អាចឈានដល់ការព្យួរសិទ្ធិសមាជិកប្រព្រឹត្តខុស មិនឱ្យបោះឆ្នោតនៅពេលប្រជុំក្រុមប្រឹក្សាសហភាព។
គ្រាន់តែថា នីតិវិធីបែបនេះ ដែលពុំធ្លាប់កើតមានឡើយ តាំងពីសហភាពអឺរ៉ុបប្រសូតមក អាចចេញរួចបាន ដរាបណាតែសមាជិក២៧ប្រទេសផ្សេងទៀត បោះឆ្នោតគាំទ្រជាឯកច្ឆ័ន្ទប៉ុណ្ណោះ។ ហើយហុងគ្រី ដែលអឺរ៉ុបចង់បើកនីតិវិធីដាក់ទោសតាមមាត្រា៧ដែរ បានស្រែកតាំងពីដំបូងភ្លាមថានឹងការពារប៉ូឡូញ នឹងប្រើសិទ្ធិប្រឆាំង ដើម្បីកុំឱ្យសហភាពអឺរ៉ុបមានសម្រេចអ្វីមួយជាឯកច្ឆ័ន្ទបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ