អង្គការសិទ្ធិមនុស្សអំពាវនាវឲ្យបារាំងពិនិត្យមើលឡើងនយោបាយលក់អាវុធឲ្យអេហ្ស៊ីប
Amnesty International និងFIDH អង្គការការពារសិទ្ធិមនុស្សទាំងពីរបានអំពាវនាវ ទទូចសុំឲ្យរដ្ឋាភិបាលបារាំង ពិនិត្យមើលឡើងវិញ នយោបាយលក់អាវុធឲ្យរដ្ឋាភិបាលអេហ្ស៊ីប។ តាមអង្គការ សមាគមការពារសិទ្ធិមនុស្ស ដោយលក់អាវុធទៅឲ្យអេហ្ស៊ីប បារាំងកំពុងចូលរួមចំណែក ក្នុងយុទ្ធនាការបង្រ្កាប បំបិទសិទ្ធិសេរីភាពនៅប្រទេសអេហ្ស៊ីប។ សេចក្តី អំពាវនាវរបស់អង្គការការពារសិទ្ធិមនុស្សធ្វើឡើងនៅប៉ុន្មានថ្ងៃមុនដែលប្រធានាធិបតីបារាំង លោកអេម៉ានុយអែល ម៉ាក្រុងត្រូវធ្វើដំណើរទស្សនកិច្ច ទៅកាន់ទីក្រុងគែរ ប្រទេសអេហ្ស៊ីប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
នៅក្នុងជំនួបជាមួយអ្នកកាសែត កាលពីថ្ងៃព្រហស្បតិ៍ អ្នកតំណាងរបស់អង្គការការពារសិទ្ធិមនុស្ស ដូចជា FIDH ហើយនិងAmnesty International បានអំពាវនាវឲ្យរដ្ឋាភិបាលបារាំង ពិនិត្យមើលឡើងនយោបាយលក់អាវុធទៅឲ្យអាជ្ញាធរអេហ្ស៊ីប បន្ទាប់ពី អាវុធរបស់បារាំង ត្រូវបានគេប្រើប្រាស់សម្រាប់វិធានការបង្រ្កាបរបស់រដ្ឋាភិបាលអេហ្ស៊ីប។ សម្រាប់ប្រធានអង្គការ Amnesty International គេរង់ចាំមើលចំណាត់ការ និងសាររបស់ប្រធានាធិបតី បារាំង នៅពេលលោកធ្វើដំណើរទៅជួបលោកស៊ីស៊ី ប្រធានាធិបតីអេហ្ស៊ីប។
តាមការចុះផ្សាយរបស់កាសែតបារាំង La Tribune នៅក្នុងដំណើរទស្សនកិច្ចរបស់លោកប្រធានាធិបតីបារាំង អេម៉ានុយអែល ម៉ាក្រុង ទៅប្រទេសអេហ្ស៊ីប នៅសប្តាហ៍ក្រោយ បារាំង គ្រោងនឹងចរចាបិទបញ្ចប់កិច្ចសន្យាលក់យន្តហោះចម្បាំងបារាំង ចំនួន១២គ្រឿង ទៅឲ្យអេហ្ស៊ីប។ តាមរបាយការណ៍របស់អង្គការការពារសិទ្ធិមនុស្ស ដែលចុះផ្សាយ កាលពីខែមិថុនាឆ្នាំមុន នៅក្នុងរយៈពេលតែ៦ឆ្នាំ កិច្ចសន្យាលក់អាវុធរបស់បារាំងទៅឲ្យអេហ្ស៊ីបបានកើនឡើងពីជិត ៤០លានអឺរ៉ូ នៅឆ្នាំ ២០១០ ទៅដល់ ១ពាន់៣រយលានអឺរ៉ូ នៅឆ្នាំ ២០១៦។
ចំណងពាណិជ្ជកម្មរវាងបារាំង និងអេហ្ស៊ីបបានផ្តល់ផលផ្លែផ្កាច្រើន ប៉ុន្តែ ជាមួយគ្នានោះ វាក៏ជំរុញឲ្យបារាំងបិទភ្នែក មិនគោរពកាតព្វកិច្ចអន្តរជាតិដែរ។ តាមកិច្ចព្រមព្រៀងអន្តរជាតិ បារាំងបានសន្យាគោរពច្បាប់ ដែលហាមមិនឲ្យលក់អាវុធ ឬសម្ភារៈតាមដាន ដែលគេយកទៅប្រើសម្រាប់រំលោភសិទ្ធិមនុស្ស។ នេះជាលើកឡើងរបស់លោកAntoine Madelin ប្រធានអង្គការការពារសិទ្ធិមនុស្សអន្តរជាតិFIDH។
នៅក្នុងអំឡុងទស្សនកិច្ចរបស់ប្រធានាធិបតីអេហ្ស៊ីបនៅទីក្រុងប៉ារីស កាលពីឆ្នាំ ២០១៧ ប្រធានាធិបតី បារាំង លោកអេម៉ានុយអែល ម៉ាក្រុងធ្លាប់បានរងការរិះគន់ខ្លាំង នៅពេលលោកបដិសេធមិនផ្តល់មេរៀន អ្វីដល់មេដឹកនាំអេហ្ស៊ីប នៅក្នុងរឿងរំលោភសិទ្ធិមនុស្ស។
នៅថ្ងៃព្រហស្បតិ៍ ក្រុមអង្គការការពារសិទ្ធិមនុស្សដូចជា FIDH Amnesty International និងHuman Rights Watch រួមទាំងវិទ្យាស្ថានCaire ដើម្បី សិក្សាបញ្ហាសិទ្ធិមនុស្ស ជាដើម បានរួមគ្នា បរិហាររិះគន់រដ្ឋាភិបាលអេហ្ស៊ីបរបស់លោកស៊ីស៊ី ដែលបានប្រើច្បាប់ប្រឆាំងភេរវនិយម ដើម្បី ចាប់ឃុំសកម្មជនការពារសិទ្ធិមនុស្ស ឬក្រុមអ្នកប្រឆាំងរដ្ឋាភិបាល។
នៅក្នុងការគ្រប់គ្រងរបស់លោក ស៊ីស៊ី ដែលបានចូលកាន់អំណាច តាមរយៈ ការធ្វើរដ្ឋប្រហារយោធា កាលពីឆ្នាំ ២០១៣ នៅអេហ្ស៊ីប គេស្រង់រកឃើញមនុស្ស ៦ម៉ឺននាក់ ត្រូវបានចាប់ដាក់ឃុំ ក្នុងពន្ធនាគារ។ ពួកគេទាំងនោះអាចជាអ្នកបញ្ចេញមតិ ជាសកម្មជនការពារសិទ្ធិមនុស្ស សិទ្ធិស្រ្តី ជាដើម។ ជាក់ស្តែង ស្រ្តីតារាភាពយន្ត និងជាអ្នកដើរបង្ហាញម៉ូដ អេហ្ស៊ីបម្នាក់ Amal Fathi ដែលបានបង្ហោះសារវីដេអូរិះគន់ចំណាត់ការយឺតយ៉ាវរបស់រដ្ឋាភិបាល ក្នុងប្រយុទ្ធប្រឆាំងនឹងការបំពារបំពានផ្លូវភេទ នៅអេហ្ស៊ីប ត្រូវបានតុលាការអេហ្ស៊ីប សម្រេចផ្តន្ទាទោសឲ្យជាប់ពន្ធនាគារ២ឆ្នាំ ពីបទផ្សព្វផ្សាយព័ត៌មានមិនពិត ហើយនិងញុះញង់ឲ្យមានការផ្តួលរំលំរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ