រុស្ស៊ីស្នើឲ្យមានកិច្ចចរចារវាងពួកគួដឌីស្ថានស៊ីរី និងរបបស៊ីរីរបស់លោកប្រធានាធិបតីអាសាដ
នៅថ្ងៃអាទិត្យ ទី១៧ កុម្ភៈ អនុរដ្ឋមន្រ្តីក្រសួងការបរទេសរុស្ស៊ីលោក Sergueï Verchinine បានយល់ឃើញថា ពួកគួដឌីស្ថានស៊ីរីគួរតែមានកិច្ចចរចាជាមួយរបបស៊ីរីរបស់លោកប្រធានាធិបតីស៊ីរីអាសាដ។ ចំណាប់អារម្មណ៍របស់លោក Verchinine បានធ្វើឡើងពីទីក្រុងមុយនិច ប្រទេសអាល្លឺម៉ង់ដែលលោកបានអញ្ជើញទៅចូលរួមនៅក្នុងសន្និសីទស្តីពីសន្តិសុខ។ តាមលោក Verchinine ដំណោះស្រាយដ៏ល្អបំផុតត្រូវផ្តើមចេញពីការជជែកគ្នារវាងក្រុមអ្នកតំណាងគួដឌីស្ថានស៊ីរី និងរបបក្រុងដាម៉ាស់ ព្រោះប្រជាជនគួដឌីស្ថានស៊ីរីក៏ជាប្រជាជនស៊ីរីដែរ។
ចុះផ្សាយនៅថ្ងៃ៖
ស្តាប់ - ០២:២៤
សំណើឲ្យមានការជជែកគ្នារវាងក្រុមអ្នកតំណាងគួដឌីស្ថានស៊ីរី និងរបបស៊ីរីរបស់ប្រធានាធិបតីអាសាដពីភាគីរុស្ស៊ីបានធ្លាក់មក ចំពេលដែលសហរដ្ឋអាមេរិកត្រៀមខ្លួនដកកម្លាំងទ័ពចេញពីទឹកដីស៊ីរី។ អ្វីដែលគ្រប់គ្នាបារម្ភខ្លាំង គឺវាសនារបស់ពួកគួដឌីស្ថានស៊ីរីដែលជាសម្ព័ន្ធមិត្តរបស់អាមេរិកនៅក្នុងយុទ្ធនាការប្រយុទ្ធប្រឆាំងនឹងពួកជីហាតអង្គការរដ្ឋអ៊ីស្លាមក្នុងទឹកដីស៊ីរី។ តែក្រោមភ្នែកច្រមុះរបស់ប្រទេសតួកគីក្បែរខាងស៊ីរី ពួកគួដឌីស្ថានស៊ីរីបានស្ថិតក្នុងកន្ត្រកតែមួយជាមួយពួកគួដឌីស្ថាននៃចលនាឧទ្ទាម PKK ក្នុងទឹកដីតួកគី។ ចំណែកនៅក្នុងទឹកដីស៊ីរី ពួកគួដឌីស្ថានស៊ីរីក៏ត្រូវបានរបបទីក្រុងដាម៉ាស់ចាត់ទុកជាសត្រូវដែរ។
អនុរដ្ឋមន្រ្តីការបរទេសរុស្ស៊ីលោក Sergueï Verchinine បានយល់ឃើញថា ដំណោះស្រាយដ៏ប្រសើរសម្រាប់អនាគតពួកគួដឌីស្ថានស៊ីរី គឺការផ្តើមកិច្ចចរចារវាងពួកនេះ និងរបបក្រុងដាម៉ាស់។ សម្រាប់លោក Verchinine ប្រជាជនគួដឌីស្ថានស៊ីរីក៏ជាប្រជាជនស៊ីរីដែរ។ តែសំណើរបស់អ្នកទទួលខុសត្រូវជាន់ខ្ពស់រុស្ស៊ីរូបនេះធ្លាប់ត្រូវបានអាមេរិក បារាំង រួមទាំងអាល្លឺម៉ង់ច្រានចោលក្នុងថ្ងៃសុក្រ ទី១៥ កុម្ភៈ។ ចំណែកភាគីតួកគីតាមរយៈប្រមុខការពារជាតិលោក Hulusi Akar បានរម្លឹកជាថ្មីនាថ្ងៃអាទិត្យ ទី១៧ កុម្ភៈពីទីក្រុងមុយនិច ទឹកដីអាល្លឺម៉ង់ថា ក្តីបារម្ភរបស់តួកគីនៅមុន និងនៅក្រោយការដកទ័ពអាមេរិកចេញពីទឹកដីស៊ីរីគ្មានផ្លាស់ប្តូរទេ គឺសន្តិសុខនៅតាមព្រំដែន រួចបញ្ជាក់ត្រង់ៗថា ពួកគួដឌីស្ថានស៊ីរីស្ថិតក្នុងចង្កោមភេរវនិយមដែលត្រូវកំចាត់។
អាមេរិកតាមរយៈប្រេសិតពិសេសសម្រាប់ស៊ីរីលោក James Jeffrey បានឆ្លើយនឹងលោក Akar វិញថា លោកយល់ពីក្តីបារម្ភរបស់សម្ព័ន្ធមិត្តតួកគី តែអាមេរិកក៏មិនចង់ឃើញកម្លាំងប្រជាធិបតេយ្យស៊ីរី និងកម្លាំងគួដឌីស្ថានស៊ីរីដែលបានរួមកម្លាំងជាមួយអាមេរិកប្រឆាំងនឹងពួកជីហាតអង្គការរដ្ឋអ៊ីស្លាមទទួលរងគ្រោះថ្នាក់ដែរ។ លោក James Jeffrey បានបន្ថែមថា ការដកទ័ពអាមេរិកចេញពីស៊ីរីនឹងត្រូវធ្វើឡើងជាដំណាក់ការ ហើយអាមេរិកនឹងបន្តរក្សាឥទ្ធិពលរបស់ខ្លួននៅក្នុងតំបន់ដដែល។ ចំណែកបារាំងតាមរយៈប្រមុខការពារជាតិលោកស្រី Florence Parly បានសង្កត់ធ្ងន់ថា ពួកគួដឌីស្ថានស៊ីរីមិនត្រូវក្លាយជាជនរងគ្រោះថ្មីនៅក្នុងជម្លោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ