បារាំងធ្វើមាតុភូមិនិវត្តកុមារកំព្រាដែលមានឪពុកម្តាយជាទាហានជីហាតនៅស៊ីរី
ប្រទេសបារាំង នៅថ្ងៃចន្ទម្សិលមិញ បានធ្វើមាតុភូមិនិវត្ត កុមារ១២នាក់ ដែលជាកូនកំព្រា របស់ឪពុកម្តាយពួកជីហាត។ ជាមួយកុមារកំព្រាបារាំង ដែលមកដល់ទីក្រុង ប៉ារីស កាលពីថ្ងៃចន្ទ មានផងដែរ កុមារកំព្រាហូឡង់ពីរនាក់ទៀត ដែលយន្តហោះបារាំងបានជួយដឹកយកមកប្រគល់ឲ្យស្ថានទូតហូឡង់ ប្រចាំក្រុងប៉ារីស។ មាតុភូមិនិវត្តរបស់កុមារ ដែលមានឪពុកម្តាយចេញទៅប្រយុទ្ធឲ្យក្រុមជីហាតអង្គការរដ្ឋអ៊ីស្លាមនៅស៊ីរី និងនៅអ៊ីរ៉ាក់ ធ្វើឡើង នៅក្រោយសង្គមស៊ីវិល ការពារសិទ្ធិកុមារ ទាមទារ ដាក់សម្ពាធកាន់តែខ្លាំង ទៅលើរដ្ឋាភិបាលបារាំង។
ចុះផ្សាយនៅថ្ងៃ៖ កែប្រែថ្ងៃទី៖
យន្តហោះដឹកកុមារកំព្រាបារាំង ទាំង១២នាក់ ហើយនិងកុមារហូឡង់ ២នាក់ បានមកដល់ទីក្រុងប៉ារីស នៅព្រឹកថ្ងៃចន្ទ។ នេះជាលើកទី២ ដែលអាជ្ញាធរបារាំង ធ្វើមាតុភូមិកុមារដែលមានឪពុកម្តាយបារាំង ចេញទៅប្រយុទ្ធឲ្យក្រុមជីហាតអង្គការរដ្ឋអ៊ីស្លាមនៅ ប្រទេសស៊ីរី និងអ៊ីរ៉ាក់។ កុមារបារាំង ១២នាក់ ដែលមានអាយុច្រើនបំផុត ១០ឆ្នាំ ជាកុមារកំព្រា រស់នៅឯកោរ និងវេទនា ដែលមួយចំនួន មានជម្ងឺ ហើយនិងខ្វះអារូបត្ថម្ភ នៅក្នុងជំរំបណ្តោះអាសន្ន គ្រប់គ្រងដោយពួកទាហានគួកឌីស្ថាន ស៊ីរី។ នេះបើតាមសេចក្តីថ្លែងការណ៍របស់ក្រសួងការបរទេសបារាំង។
ទៅតាមនីតិវិធីច្បាប់ កុមារកំព្រា ដែលមានឪពុកម្តាយជាទាហានប្រយុទ្ធឲ្យពួកជីហាតអង្គការរដ្ឋអ៊ីស្លាម ត្រូវបញ្ជូនទៅឲ្យទីភ្នាក់ងារការពារកុមារ ដែលស្ថិតនៅក្រោមការគ្រប់គ្រងរបស់រដ្ឋអាជ្ញាបារាំង។ តាមក្រសួងការបរទេសបារាំង កុមារកំព្រាដែលធ្វើមាតុភូមិនិវត្តពីទឹកដីស៊ីរី ត្រូវទទួលការពិនិត្យសុខភាព ស៊ីជម្រៅ ជាមុនសិន មុននឹងប្រគល់ទៅឲ្យទីភ្នាក់ងារសង្គមដែលជាអ្នកទទួលខុសត្រូវមើលថែ។
ចាប់តាំងពីការដួលរំលំរដ្ឋធានី ទីតាំងចុងក្រោយរបស់ពួកជីហាតអង្គការរដ្ឋអ៊ីស្លាម សហគមន៍អន្តរជាតិ ជាពិសេសបណ្តាប្រទេសដែលមានជនជាតិរបស់ខ្លួនចេញទៅប្រយុទ្ធ ធ្វើសង្រ្គាមនៅស៊ីរី ត្រូវឈឺក្បាល នឹងរឿងមាតុភូមិនិវត្តគ្រួសាររបស់ពួកជីហាត បរទេស។ គេវាយតម្លៃថា នៅក្នុងចំណោមជនជាតិបរទេស ប្រមាណ ១២ ០០០ មកពីប្រទេសយ៉ាងតិច ៤០ ដែលកំពុង ជាប់ក្នុងជំរំឃុំខ្លួនរបស់ពួកទាហានគួកឌីស្ថាន ស៊ីរី មានក្រុមគ្រួសារជីហាតដើមកំណើតបារាំង ជិត៥០០នាក់ ដែលភាគច្រើនជាកុមារ។ កងកម្លាំងគួកឌីស្ថាន ដែលទើបវាយយកឈ្នះទាំងស្រុងលើពួកជីហាតអង្គការរដ្ឋអ៊ីស្លាម កាលពីខែមីនាកន្លងទៅបានអំពាវនាវឲ្យប្រទេសដើមកំណើតរបស់ទាហានជីហាតទទួលយកជនជាតិរបស់ខ្លួនវិញ ដោយសារកង្វះមធ្យោបាយ។
នៅប្រទេសបារាំង នៅក្រោយ ស្ទាក់ស្ទើរ មិនចង់ទទួលគ្រួសាររបស់ពួកជីហាត ដើមកំណើតបារាំង និងដោយសារសម្ពាធនិងមតិរិះគន់របស់សង្គមស៊ីវិល រដ្ឋាភិបាលក្រុងប៉ារីស កាលពីខែមីនាកន្លងទៅ បានសុខចិត្តធ្វើមាតុភូមិនិវត្តលើកទី១ កុមារកំព្រា៥នាក់ កាលពីខែមីនា។
រហូតមកដល់ពេលនេះ បារាំងបដិសេធមិនទទួលយក ជនជាតិរបស់ខ្លួន ដែលចេញទៅប្រយុទ្ធក្នុងជួរក្រុមជីហាតអង្គការរដ្ឋអ៊ីស្លាមនោះទេ។ អ្នកនាំពាក្យរបស់រដ្ឋាភិបាលបារាំង បានលើកឡើងពីការធ្វើមាតុភូមិនិវត្តរបស់កុមារដើមកំណើតបារាំង មួយករណីម្តងៗ គឺមិនទាំងអស់ក្នុងពេលតែមួយនោះទេ។ នៅថ្ងៃចន្ទ ក្រសួងការបរទេសបារាំងលើកឡើងពីលទ្ធភាពនៃការធ្វើមាតុភូមិលើកទី៣ របស់កុមារដែលមានឪពុកម្តាយ បារាំង ធ្វើជាជីហាត នៅប្រទេសស៊ីរី។ មេធាវីរបស់ក្រុមគ្រួសារបារាំង ដែលទាមទាររដ្ឋាភិបាលឲ្យធ្វើមាតុភូមិនិវត្ត កូនចៅពីស៊ីរី បានស្វាគមចំណាត់ការរបស់រដ្ឋាភិបាល បារាំង ប៉ុន្តែ នៅតែសោកស្តាយ ចំពោះជំហរយឺតយ៉ាវ របស់រដ្ឋាភិបាល នៅពេលកុមារបារាំងប្រមាណ ២០០នាក់ផ្សេងទៀត ដែល កំពុង ប្រឈមនឹងជម្ងឺបាក់ស្បាត ហើយនិងគ្រោះថ្នាក់ដល់ជីវិត ជារៀងរាល់ថ្ងៃ នៅក្នុងជំរំ ក្នុងទឹកដីស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ