សហភាពថ្មីក្រោមឈ្មោះថា "សហរដ្ឋរុស្ស៊ី-បេឡារុស” អាយុបាន១៥ឆ្នាំ
ចុះផ្សាយនៅថ្ងៃ៖
ស្តាប់ - ០៤:៥២
១៥ឆ្នាំមុន ថ្ងៃ៨ធ្នូឆ្នាំ ១៩៩៩ រដ្ឋឯករាជ្យថ្មីពីរនៃអតីតសហភាពសូវៀត ពោលគឺសហព័ន្ធរុស្ស៊ី និង សាធារណរដ្ឋបេឡារុស បានចុះនឹងគ្នា សន្ធិសញ្ញាស្តីអំពីការបង្កើតឡើង ជារដ្ឋសហភាពថ្មី ដែលមានឈ្មោះថា “សហរដ្ឋរុស្ស៊ី-បេឡារុស”។ សន្ធិសញ្ញានេះ បានចូលជាធរមាន ចាប់ពីថ្ងៃ២៦មករាឆ្នាំ២០០០មក ក្រោយពីវាបានទទួលការឲ្យសច្ចាប័នដោយរដ្ឋសភា ប្រទេសទាំងពីរ។ តើសហរដ្ឋថ្មីនេះ ចេះសម្រេចបាននូវគោលដៅភូមិសាស្ត្រ-នយោបាយ ត្រឹមកម្រិតណាដែរ?
សន្ធិសញ្ញា ថ្ងៃ៨ធ្នូឆ្នាំ ១៩៩៩ នោះ ត្រូវបានចុះហត្ថលេខា ដោយ ៖ ម្ខាង គឺ ប្រធានាធិបតីទី១ នៃប្រទេសរុស្ស៊ីសម័យថ្មី លោក Boris Yeltsin ដែល៣សប្តាហ៍ក្រោយមក នៅថ្ងៃ ៣១ធ្នូឆ្នាំនោះឯង បានលាចេញពីអំណាច ហើយផ្ទេរតំណែងនេះមក លោកពូទីន កាលណោះ ក្នុងឋានៈជាប្រធានាធិបតីស្តីទី។ និងម្ខាងទៀត គឺ លោក Alexandre Loukachenko ប្រធានាធិបតីទី១របស់បេឡារុស ចាប់ពី ឆ្នាំ១៩៩៤ មក ដ្បិតមុនគាត់ នៅបេឡារុស គឺប្រធានរដ្ឋសភាដែលបានបំពេញតួនាទីកំពូល។
សន្ធិសញ្ញាចែងថា អង្គការដឹកនាំរដ្ឋសហភាពគឺ ឧត្តមក្រុមប្រឹក្សារដ្ឋ និង ក្រុមប្រឹក្សារដ្ឋមន្ត្រី៖
-ឧត្តមក្រុមប្រឹក្សារដ្ឋ ផ្សំឡើងពីប្រមុខរដ្ឋ រដ្ឋសភា និងរដ្ឋាភិបាលប្រទេសទាំងពីរ។ ចាប់ពីឆ្នាំ ២០០០មក ក្រុមប្រឹក្សានេះ ដឹកនាំដោយលោកប្រធានាធិបតីបេឡារុស Loukachenko។ សរុបទៅ ក្រុមប្រឹក្សាបានរួមប្រជុំ ១៧លើកហើយ។
-ចំណែកក្រុមប្រឹក្សារដ្ឋមន្ត្រី ផ្សំឡើងពីប្រមុខរដ្ឋាភិបាល និងសមាជិកមួយចំនួននៃរដ្ឋាភិបាល ប្រទេសទាំងពីរ។ ចាប់ពីឆ្នាំ២០១២មក ក្រុមប្រឹក្សានេះ ដឹកនាំដោយនាយករដ្ឋមន្ត្រីរុស្ស៊ី លោកឌ្មីទ្រី មេដវេដេវ។ សរុបទៅ មានរួមប្រជុំចំនួន ៤១លើកហើយ។
គោលដៅចោទដោយ សហរដ្ឋថ្មី គឺធានាសន្តិសុខរួម និងការអភិវឌ្ឋន៍រដ្ឋទាំងពីរ។ ក្នុងន័យនេះ បេឡារុស ដែលជាទឹកដីខាងលិចបង្អស់របស់សហភាពសូវៀតបច្ចុប្បន្ន ក្រោយពី បក្សសម្ព័ន្ធអូតង់ ចេះតែវាតទីមកទិសខាងកើតព្រំដែនបេឡារុស ស្រាប់តែស្ថិតនៅជាប់នឹងព្រំដែនខាងកើតរបស់អង្គការយោធាបស្ចិមលោកនេះ នៅត្រង់ប្រទេសប៉ូឡូញ និង ៣ប្រទេសតំបន់បាល់ទិក គឺ លីទុយអានី ឡេតូនី អេស្តូនី។ ដូច្នេះ សម្រាប់រុស្ស៊ី បេឡារុស ក្លាយជារណសិរ្ស ជួរមុខ នៃសហរដ្ឋថ្មី ប្រឈមផ្ទាល់ នឹងអូតង់ ហើយសម្រាប់បេឡារុសវិញ រុស្ស៊ីជារណសិរ្ស ជួរក្រោយយ៉ាងកក់ក្តៅ។ ម៉្លោះហើយ បានជាតាមរយៈសហរដ្ឋថ្មី រុស្ស៊ី និង បេឡារុស មាន ប្រព័ន្ធការពារដែនអាកាសរួម នៅជាប់នឹងដែនអាកាសអូតង់តែម្តង។ តាមមុខព្រួញនេះ រុស្ស៊ីមានមូលដ្ឋានកងអាកាសខ្លួន ប្រចាំនៅលើដែនដីបេឡារុស រួចនាពេលចុងក្រោយ ទៅតាមសំណូមលោកប្រធានាធិបតីបេឡារុស Loukachenko រុស្ស៊ីបានបញ្ជូនយន្តហោះយោធាបន្ថែមទៀតទៅទីនោះ ដើម្បីបង្ការជាមុន ទល់នឹងលំហាត់សឹកកាន់តែញឹកញយ របស់អូតង់ នៅតំបន់នោះ លំហាត់ក្រោមលេសថាការពារទល់នឹងការគំរាម ពីខាងរុស្ស៊ី ដែលបង្ហាញឲ្យឃើញ ពី “ធាតុពិតឈ្លានពាន” ចំពោះអ៊ុយក្រែន។
រីឯក្នុងន័យជួយជំរុញដល់ការអភិវឌ្ឍន៍សេដ្ឋកិច្ចបេឡារុស រុស្ស៊ីលក់ឧស្ម័នធម្មជាតិ ទៅឲ្យដៃគូនេះរបស់ខ្លួនក្នុងឋានៈជា “គ្នាឯង” គឺតាមថ្លៃដូចតម្លៃក្នុងស្រុករុស្ស៊ីអញ្ចឹង តែ ១៦៨ដុល្លារ ក្នុង១.០០០ម៣ ហើយ ចាប់ពីថ្ងៃ១មករាខាងមុខទៅ គឺចុះដល់១៥៥ដុល្លារ យោងទៅតាមតម្លៃប្រេងដែលបន្តចុះថ្លៃលើទីផ្សារពិភពលោក។ ជាការប្រៀបធៀប សម្រាប់អ៊ុយក្រែន ដែលសន្មត់ថាជា “គ្នាគេ” តម្លៃឧស្ម័នរុស្ស៊ី ឥឡូវ ទោះចុះទាបក្តី គឺ ៣៧៨ដុល្លារឯណោះក្នុង១.០០០ម៣។
គួរនិយាយថា ទំនាក់ទំនងរវាងប្រមុខរដ្ឋរុស្ស៊ី និងបេឡារុស មិនមែនចេះតែរលូនឡើយ ទោះបីរដ្ឋទាំងពីរ ស្ថិតក្នុងរដ្ឋសហភាពក្តី ហើយទោះបីរុស្ស៊ីរមែង “យកចិត្ត” តាមផ្លូវផ្តល់ហិរញ្ញប្បទាន ក្រាស់ក្រែលក្រៃ ដល់បេឡារុសក្តី ដោយសារស្ថានភាពប្រទេសនេះ អនុគ្រោះសម្រាប់រុស្ស៊ី។ យ៉ាងណាមិញ លោក Loukachenko ដែលកាន់តំណែងជាប្រធានាធិបតីបេឡារុស ២០ឆ្នាំជាប់មកហើយ ឈរលើគោលជំហរ មិនមែនតាមលំនាំរុស្ស៊ីឡើយ ឧទាហរណ៍មិនព្រមទទួលស្គាល់ដែនដីអបគមរបស់ហ្ស៊កហ្ស៊ី អាប់ខាហ្ស៊ី និង អូសេទីខាងត្បូង ជារដ្ឋឯករាជ្យ ដូចក្តីប្រាថ្នាចង់បានរបស់រុស្ស៊ីឡើយ។ មិនតែប៉ុណ្ណោះ លោកLoukachenko ថែមទាំងថ្កោលទោសពួកឧទ្ទាមផ្តាច់ទឹកដីនៅប៉ែកខាងកើតអ៊ុយក្រែន ទាំងថ្លែងចំអកតាមសម្តីគាត់ អំពី សាធារណរដ្ឋស្វ័យប្រកាស ដូណេត និង លូហ្កាន់ ស្អីណា។
ប៉ុន្មានថ្ងៃមុន លោក Loukachenko ថែមទាំងបញ្ជា ឲ្យប៉ុស្តិ៍ត្រួតពិនិត្យគយ នៅជាប់នឹងព្រំដែនរុស្ស៊ី ដំណើរការឡើងវិញ ប៉ុស្តិ៍បែបនេះ ត្រូវបានរុះរើចេញតាំងពីឆ្នាំ២០១១ ក្រោយពីមានបង្កើតឡើង ជាសហភាពឥតពន្ធគយ ដែលមានរុស្ស៊ី បេឡារុស និង កាហ្សាក់ស្ថាន ជា សមាជិក ព្រោះគាត់ក្តៅក្រហាយនឹងរុស្ស៊ីដែលចោទបេឡារុសថា លង់ខ្លួនដើរតួ ជាស្ពានចម្លងចូលក្នុងប្រទេសរុស្ស៊ី នូវគ្រឿងបរិភោគណារបស់ពួកប្រទេសសហភាពអឺរ៉ុប ដែលជាប់ក្នុងបម្រាម ហាមប្រាមរបស់ម៉ូស្គូ ជាចម្លើយបកទៅវិញពីខាងម៉ូស្គូទល់នឹងទណ្ឌកម្មពួកគេប្រឆាំងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ