ទស្សនកិច្ចប្រមុខរដ្ឋាភិបាលរុស្ស៊ីនៅកោះគួរីលខាងត្បូង ញ៉ាំងក្រុងតូក្យូឲ្យឆេះដុំ
តាមកាសែតរុស្ស៊ី Vedomosti លេខថ្ងៃ២៤សីហានេះ ទស្សនកិច្ចលោកនាយក រដ្ឋមន្ត្រីរុស្ស៊ី មេដវេដេវ កាលពីថ្ងៃសៅរ៍កន្លងទៅ នៅឯកោះមួយ នៃជួរកោះគួរីលខាងត្បូងទាំង៤ ដែលក្រុងតូក្យូ ចាត់ទុកថានៅជាប់ក្នុងវិវាទជាមួយរុស្ស៊ីនៅឡើយ ប៉ុន្តែដែលត្រូវម៉ូស្គូ ចាត់ទុក ជា របស់ខ្លួនទៅហើយ គឺអាចបណ្តាលឲ្យលុបទៅវិញ ទស្សនកិច្ចដែលលោកប្រធានាធិបតីរុស្ស៊ី ពូទីន គ្រោង បំពេញនៅប្រទេសជប៉ុន ក្នុងឆ្នាំនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
ទោះយ៉ាងណាក្តី ក៏ក្នុងកំណត់ទូតតវ៉ា របស់ក្រសួងការបរទេសជប៉ុន ប្រគល់ជូន ភាគី រុស្ស៊ី មាននិយាយថា ទស្សនកិច្ចនេះ របស់លោកនាយករដ្ឋមន្ត្រីរុស្ស៊ី មេដវេដេវនៅកោះគួរីល គឺនាំឲ្យរបួសដល់មនោសញ្ចេតនា ប្រជាជនជប៉ុន ម៉្លោះហើយបានជា លោកប្រមុខការទូត ជប៉ុន Fumio Kishida បង្ខំចិត្តលើកទៅពេលក្រោយវិញ ទស្សនកិច្ច ដែលគាត់បានគ្រោងបំពេញ នៅម៉ូស្គូ នៅចុងខែសីហានេះ ឬ នៅដើមខែកញ្ញាខាងមុខ។
ជាចម្លើយតបវិញ ក្រសួងការបរទេសរុស្ស៊ី ក្នុងសេចក្តីថ្លែងការណ៍ខ្លួន ចោទក្រុងតូក្យូ ថាប៉ុនប៉ង សើរើឡើងវិញ តុល្យការនៃសង្គ្រាមលោកលើកទី២។ ជាការរំលឹក ស្របនឹងតុល្យការនៃ សង្គ្រាមនេះ ដែលបានចប់ទៅនៅអាស៊ី ដោយការចុះហត្ថលេខាសុំចុះចាញ់របស់ជប៉ុន កាលពី ថ្ងៃទី២កញ្ញា ឆ្នាំ១៩៤៥ កោះបួននៃជួរកោះគួរីលខាងត្បូង របស់ជប៉ុន បានឆ្លងមកនៅ ក្រោម អធិបតេយ្យរបស់សហភាពសូវៀត ហើយក្រោយពីសហភាពនេះរលាយបាត់ទៅ គឺឆ្លង មកជា កម្មសិទ្ធិសហព័ន្ធរុស្ស៊ី ដែលបន្តកេរ្តិ៍ពីសហភាពសូវៀត។
ក្រសួងការបរទេសរុស្ស៊ី សង្កត់ធ្ងន់ថា ទឹកចិត្តក្តៅក្រហាយសំដែងដោយក្រុងតូក្យូ ចំពោះទស្សនកិច្ចលោកនាយករដ្ឋមន្ត្រីរុស្ស៊ី នៅ កោះគួរីលខាងត្បូង គឺញ៉ាំងឲ្យក្រុងម៉ូស្គូ មិនអាចជឿឡើយ ការអះអាងរបស់រដ្ឋាភិបាលជប៉ុន ស្តីអំពីការគោរពសច្ចៈធម៌ប្រវត្តិសាស្ត្រ។ តាមកាសែតដ៏ធំនៅរុស្ស៊ីឈ្មោះ Vedomosti លេខថ្ងៃ២៤សីហានេះ ដោយមកពីទស្សនកិច្ច លោកនាយករដ្ឋមន្ត្រីរុស្ស៊ី មេដវេដេវ នៅកោះគួរីលនោះ ដែលលើកនេះជា លើកទី៣ទៅហើយ បើគិតក្នុង៥ឆ្នាំចុងក្រោយ ទំនាក់ទំនងជប៉ុន-រុស្ស៊ី ឥឡូវធ្លាក់ចុះដល់បាតតែម្តង ម៉្លោះហើយ បានជាពួកអ្នកនយោបាយវិទូនាំគ្នាព្យាករណ៍ថា គូភាគីមុខជានឹងលុបទៅវិញពុំខាន ទស្សនកិច្ច ដែលលោកប្រធានាធិបតីរុស្ស៊ី ពូទីន គ្រោងបំពេញនៅប្រទេសជប៉ុន ក្នុងឆ្នាំនេះ។
ចំពោះរឿងនេះ ក្រុងម៉ូស្គូថ្លែងថា គ្មានអ្វីនឹងលុបទៅវិញទេ ពីព្រោះគូភាគីមិនទាន់បាន សម្រប យោបល់គ្នាឯណា ទៅលើកាលបរិច្ឆេទនៃទស្សនកិច្ចនោះ។ ថ្ងៃសៅរ៍២២សីហា ក្នុងក្របខ័ណ្ឌនៃកម្មវិធីរដ្ឋខាងអភិវឌ្ឍន៍កោះគួរីលរហូតដល់ឆ្នាំ២០២៥ លោកមេដវេដេវ បានធ្វើទស្សនកិច្ចនៅកោះឈ្មោះ Itourup រស់នៅដោយបណ្តាជន ៨.០០០ នាក់ មានផ្ទៃក្រឡា ៦.៧២៥ គ.ម.ក្រឡាជាកោះធំជាងគេ ក្នុងចំណោមកោះ៤នៃជួរកោះគួរីល ខាងត្បូង ដែលរុស្ស៊ីចាត់ទុកជារបស់ខ្លួនពេញទី ប៉ុន្តែដែល រហូតមកទល់សព្វថ្ងៃ ត្រូវក្រុងតូក្យូហៅថា ជា ដែនដីប៉ែកខាងជើងរបស់ជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ