នាយករដ្ឋមន្រ្តីជប៉ុនសន្យាដោះស្រាយជម្លោះព្រំដែនជាមួយរុស្ស៊ី
លោកស្ហ៊ីនហ្សូ អាបេ នាយករដ្ឋមន្រ្តីជប៉ុន បានលើកឡើងនៅថ្ងៃព្រហស្បតិ៍នេះថា លោកមានបំណងចង់បញ្ចប់ជម្លោះព្រំដែនជាមួយរុស្ស៊ី តាមរយៈដំណោះស្រាយសមស្របមួយ ដែលភាគីទាំងពីរអាចទទួលយកបាន ហើយឈានទៅចុះសន្ធិសញ្ញាសន្តិភាពជាមួយគ្នា។ ការចុះសន្ធិសញ្ញាសន្តិភាពដែលអូសបន្លាយពេលតាំងពីក្រោយសង្រ្គាមលោកលើកទី២មក។
ចុះផ្សាយនៅថ្ងៃ៖
ស្តាប់ - ០១:៥៣
គិតរហូតមកទល់នឹងពេលបច្ចុប្បន្ននេះ ជប៉ុន និងរុស្ស៊ី ដែលជាអតីតគូសត្រូវ នៅក្នុងសង្រ្គាមលោកលើកទី២ នៅមិនទាន់បានចុះសន្ធិសញ្ញាសន្តិភាពជាមួយគ្នានៅឡើយទេ។ ប្រទេសទាំងពីរនេះ នៅជាប់មានជម្លោះព្រំដែននឹងគ្នា ទាក់ទងនឹងប្រជុំកោះគួរីល។
ប្រជុំកោះគួរីលនេះ ធ្លាប់ស្ថិតក្រោមការកាន់កាប់របស់ជប៉ុន។ ក៏ប៉ុន្តែ នៅពេលសង្រ្គាមលោកលើកទី២ជិតបញ្ចប់ ជប៉ុនចាញ់សង្រ្គាម ហើយកងទ័ពរុស្ស៊ី (អតីតសហភាពសូវៀត) ក៏បានវាយលុកដណ្តើមកាន់កាប់ប្រជុំកោះគួរីលនេះ។ មកទល់នឹងសព្វថ្ងៃនេះ ប្រជុំកោះគួរីលទាំងមូលស្ថិតក្រោមការគ្រប់គ្រងរបស់រុស្ស៊ី ប៉ុន្តែ ជប៉ុនទាមទារយកកោះពីរ នៅចុងខាងត្បូងនៃប្រជុំកោះគួរីលនេះពីរុស្ស៊ីមកវិញ។ ជម្លោះដណ្តើមកោះនេះគឺជាឧបសគ្គដ៏ធំ ដែលធ្វើឲ្យជប៉ុន និងរុស្ស៊ី មិនទាន់អាចចុះសន្ធិសញ្ញាសន្តិភាពនឹងគ្នា តាំងពីបញ្ចប់សង្រ្គាមលោកលើកទី២មកទល់នឹងពេលបច្ចុប្បន្ននេះ។
នៅថ្ងៃព្រហស្បតិ៍នេះ លោកស្ហ៊ីនហ្សូ អាបេ បានអះអាងថា នៅក្នុងជំនួបតាមទូរស័ព្ទ លោកបានប្រាប់លោកប្រធានាធិបតីរុស្ស៊ី វ៉្លាឌីមៀរ ពូទីន អំពីឆន្ទៈរបស់លោក ក្នុងការស្វែងរកដំណោះស្រាយបញ្ចប់ជម្លោះព្រំដែនជាមួយគ្នា។ គឺជាដំណោះស្រាយសមស្របមួយ ដែលអាចទទួលយកបានទាំងអស់គ្នា ហើយបើកផ្លូវទៅចរចាចុះសន្ធិសញ្ញាសន្តិភាពជាមួយគ្នា ដើម្បីបញ្ចប់ជាផ្លូវការនូវអារិភាពនៃសង្រ្គាមលោកលើកទី២។
យើងឃើញថា ជំហររបស់លោកស្ហ៊ីនហ្សូ អាបេ ទាក់ទងនឹងជម្លោះព្រំដែនជាមួយរុស្ស៊ីនេះ មើលទៅ មានលក្ខណៈទន់ភ្លន់ ខុសស្រឡះពីជំហរចំពោះជម្លោះព្រំដែនជាមួយចិន។
ចាប់តាំងពីអំឡុងយុទ្ធនាការឃោសនាបោះឆ្នោត រហូតបានជាប់ឆ្នោតជានាយករដ្ឋមន្រ្តី លោកស្ហ៊ីនហ្សូ អាបេ តែងតែបានប្រកាន់ជំហរតឹងរ៉ឹងជាប់រហូតថា ប្រជុំកោះសេនកាគូ ដែលចិនហៅថា ទៀវយូ គឺស្ថិតក្នុងដែនអធិបតេយ្យរបស់ជប៉ុន ដែលមិនអាចចរចាជាមួយចិនបានជាដាច់ខាត។ ជំហរតឹងរ៉ឹងរៀងៗខ្លួននេះ ធ្វើឲ្យនាវា និងយន្តហោះរបស់ចិន និងជប៉ុន ជួបប្រឈមមុខគ្នាជារឿយៗ។
កាលពីថ្ងៃអង្គារ អាជ្ញាធរជប៉ុនបានអះអាងថា នាវាចម្បាំងរបស់ចិនមួយគ្រឿងបានប្រើរ៉ាដា សម្រាប់កំណត់គោលដៅបាញ់ ចាប់ទៅលើនាវារបស់ជប៉ុន។ ជាសកម្មភាព ដែលលោកស្ហ៊ីនហ្សូ អាបេ ចាត់ទុកថាជាទង្វើបង្កហេតុប្រកបដោយគ្រោះថ្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ