ទស្សនកិច្ចរយៈពេល ៣ថ្ងៃនៃលោកប្រមុខរដ្ឋអំណាចប៉ាឡេស្ទីននៅរុស្ស៊ី
ទស្សនកិច្ចនេះចាប់ផ្តើមពីជំនួបរបស់លោក Mahmoud Abbas ជាមួយលោកប្រធានាធិបតីរុស្ស៊ីពូទីន។ ថ្ងៃនេះដដែល លោកប្រមុខរដ្ឋអំណាចប៉ាឡេស្ទីនក៏ជួបចរចាជាមួយលោកនាយករដ្ឋមន្ត្រីរុស្ស៊ីមេដវេដេវ។ ជាលទ្ធផល ទស្សនកិច្ចតាមដែលស្ថានទូតប៉ាឡេស្ទីននៅម៉ូស្គូប្រកាសឲ្យដឹង នឹងមានចុះឯកសារទ្វេភាគីមួយចំនួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
អង្គភាពពត៌មានវិមានក្រេមឡាំងបានផ្សាយដំណឹងថា ក្នុងជំនួបថ្នាក់ប្រមុខរដ្ឋ លោក Mahmoud Abbas និងលោកពូទីនពិភាក្សាទៅលើទិដ្ឋភាពគន្លឹះៗនៃទំនាក់ទំនងប៉ាឡេស្ទីន រុស្ស៊ីធ្វើការផ្លាស់ប្តូរមតិយ៉ាងល្អិតល្អន់ជុំវិញទស្សនវិស័យនៃដំណោះស្រាយជម្លោះរវាងប៉ាឡេស្ទីន និងអ៊ីស្រាអែល ព្រមទាំងជុំវិញចង្កោមបញ្ហាប្រកបដោយបច្ចុប្បន្នភាពនៃស្ថានការណ៍នៅតំបន់។ នៅតាមមុខព្រួញនេះ គូភាគីដូចសព្វមួយដងអញ្ចឹង ផ្តោតការយកចិត្តទុកដាក់ទៅលើស្ថានការណ៍នៅដើមបូព៌ា និងភូមិភាគខាងជើងទ្វីបអាហ្វ្រិក។
ថ្ងៃ១៣ មេសានេះដែរ លោកប្រមុខរដ្ឋអំណាចប៉ាឡេស្ទីនធ្វើកិច្ចចរចាជាមួយលោកនាយករដ្ឋមន្ត្រីរុស្ស៊ីឌ្មីទ្រី មេដវេដេវ។ ទាក់ទងនឹងជំនួបនេះ អង្គភាពពត៌មានរដ្ឋាភិបាលរុស្ស៊ីផ្សាយដំណឹងថា លោកនាយករដ្ឋមន្ត្រីមេដវេដេវ និងលោកប្រមុខរដ្ឋអំណាចប៉ាឡេស្ទីនលើកយកទៅពិនិត្យមើល បញ្ហាជាគ្រឹះមូលដ្ឋាននៃសហប្រតិបត្តិការទ្វេភាគីក្នុងវិស័យវិនិយោគ វប្បធម៌ មនុស្សធម៌ ព្រមទាំងពិភាក្សាទៅលើបញ្ហាផ្សេងទៀតដែលមានប្រយោជន៍សម្រាប់ប្រទេសទាំងពីរ។
មិនតែប៉ុណ្ណោះ តាមដែលឯកអគ្គរដ្ឋទូតប៉ាឡេស្ទីនប្រចាំនៅក្រុងម៉ូស្គូ លោក Fayed Moustafa បានថ្លែងទៅទីភ្នាក់ងារពត៌មានរុស្ស៊ី Interfax លោកប្រធានរដ្ឋអំណាចឡេស្ទីននឹងត្រូវទទួលជួបសន្ទនាដោយប្រមុខគ្រិស្តសាសនាអ័រថូដុក្សរុស្ស៊ី សម្តេចសង្ឃ Kirill និងប្រមុខសាសនាអ៊ីស្លាមនៅរុស្ស៊ី សម្តេចសង្ឃ Gainutdin។ តាមសម្តីអ្នកការទូតប៉ាឡេស្ទីន ជាលទ្ធផលទស្សនកិច្ចនឹងមានចុះឯកសារទ្វេភាគីមួយចំនួនបែបយ៉ាង កិច្ចព្រមព្រៀងប៉ុន្មានច្បាប់រវាងរដ្ឋាភិបាលទាំងពីរ។ ជាអាទិ៍ គឺកិច្ចព្រមព្រៀងស្តីអំពីសហប្រតិបត្តិការរវាងក្រសួងអភិវឌ្ឍន៍សេដ្ឋកិច្ច ក្រសួងទូរគមនាគមន៍ និងក្រសួងហិរញ្ញវត្ថុ។
ក្នុងក្របខ័ណ្ឌទស្សនកិច្ចរយៈពេល ៣ថ្ងៃ លោកប្រមុខរដ្ឋអំណាចប៉ាឡេស្ទីនក៏នឹងអញ្ជើញទៅទស្សនាបុរីSochi នៅឯមាត់សមុទ្រខ្មៅ ជាទីដែលក្នុងឆ្នាំមុន មានប្រព្រឹត្តទៅការប្រកួតកីឡាអូឡាំពិករដូវធ្លាក់ទឹកកក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ