ហេតុអ្វីបានជាបេក្ខភាពរបស់ប្រទេសកាតា ជាអ្នករៀបចំកីឡាបាល់ទាត់ពិភពលោកឆ្នំា ២០២២ កំពុងបន្តចោទជាបញ្ហា!
ចុះផ្សាយនៅថ្ងៃ៖
ស្តាប់ - ០៥:០៦
កាលពី ៤ឆ្នំាមុន ពោលក្នុងខែធ្នូ ឆ្នំា ២០១០ ប្រទេសកាតាត្រូវបានសហព័ន្ធកីឡាបាល់ទាត់អន្តរជាតិហ្វីហ្វា (FIFA) បោះឆ្នោតឲ្យធ្វើជាម្ចាស់ផ្ទះរៀបចំកីឡាបាល់ទាត់ពិភពលោកសម្រាប់ឆ្នំា ២០២២។ តែតំាងពីពេលនោះមកដល់ថ្ងៃនេះ រឿងអាស្រូវជុំវិញការផ្តល់បេក្ខភាពឲ្យប្រទេសកាតាកំពុងបន្តមានជាហូរហែ។ នៅថ្ងៃទី១៦ ឧសភាថ្មីៗនេះ លោកយ៉ូសេហ្វ ប្លាធឺ ប្រធានហ្វីហ្វាបានប្រកាសទទួលស្គាល់ជាផ្លូវការថា ការប្រគល់ឲ្យកាតាធ្វើជាម្ចាស់ផ្ទះរៀបចំកីឡាបាល់ទាត់ពិភពលោកសម្រាប់ឆ្នំា ២០២២ គឺជា « កំហុសឆ្គង » មួយ។ តែទន្ទឹមគ្នានេះ លោកយ៉ូសេហ្វបានបញ្ជាក់ថា ហ្វីហ្វានៅតែរក្សាទុកកាតាឲ្យរៀបចំដដែល ដោយមិនធ្វើការបោះឆ្នោតឡើងវិញទេ។ ហេតុអ្វីបានជាបេក្ខភាពរបស់ប្រទេសកាតាកំពុងបន្តបំផុសឲ្យមានរឿងអាស្រូវខ្លំាងម្ល៉េះ?
នៅបំាងតែប៉ុន្មានសប្តាហ៍ទៀតប៉ុណ្ណោះ ពីធីរៀបចំប្រកួតកីឡាបាល់ទាត់ពិភពលោកឆ្នំា ២០១៤ នឹងត្រូវចាប់ផ្តើមជាផ្លូវការនៅក្នុងប្រទេសប្រេស៊ីល។ ដោយឡែក សម្រាប់ការរៀបចំនៅក្នុងប្រទេសកាតាឯណោះវិញ គេត្រូវរង់ចំាចំនួន ៨ឆ្នំាទៀត ពោលគឺនៅឆ្នំា ២០២២។ តែបញ្ហានៅត្រង់ថា ៨ឆ្នំាមុននឹងកាតាចាប់ផ្តើមធ្វើជាម្ចាស់ផ្ទះ រឿងអាស្រូវជុំវិញការផ្តល់បេក្ខភាពឲ្យប្រទេសអារ៉ាប់មួយនេះបាន និងកំពុងបន្តផ្ទុះឡើងយ៉ាងផុសផុល ពិសេសជុំវិញលក្ខខណ្ឌស្រពិចស្រពិលមួយចំនួនដែលសហព័ន្ធកីឡាបាល់ទាត់អន្តរជាតិ (FIFA=ហ្វីហ្វា) បានបោះឆ្នោតឲ្យប្រទេសកាតាកាលពីខែធ្នូ ឆ្នំា ២០១០។ នៅទីបំផុតនាពេលថ្មីៗនេះ គឺរូបលោកប្រធានហ្វីហ្វា យ៉ូសេហ្វ ប្លាធឺ ផ្ទាល់ខ្លួនតែម្តងដែលបានចេញមុខប្រកាសទទួលស្គាល់ជាផ្លូវការថា ការប្រគល់ឲ្យកាតាធ្វើជាម្ចាស់ផ្ទះរៀបចំកីឡាបាល់ទាត់ពិភពលោកសម្រាប់ឆ្នំា ២០២២ គឺជា « កំហុសឆ្គង » មួយ។
តាមពិតទៅ ការផ្តល់ឲ្យប្រទេសអារ៉ាប់មួយនេះធ្វើជាម្ចាស់ផ្ទះ រៀបចំការប្រកួតកីឡាបាល់ទាត់ពិភពលោកមិនបានចោទជាបញ្ហាអ្វីទេ ព្រោះថា កាតាជាប្រទេសអ្នកមានដែលមានលទ្ធភាពគ្រប់គ្រាន់ក្នុងការរៀបចំព្រឹត្តិការណ៍ពិភពលោកដ៏ប្រជាប្រិយមួយ ដូចយ៉ាងកីឡាបាល់ទាត់ពិភពលោករៀងរាល់ ៤ឆ្នំាម្តង។ បើអ៊ីចឹងសួរថា ហេតុអ្វីបានជានៅពេលនេះ គ្រប់គ្នាចេះតែបន្តលើកយករឿងបេក្ខភាពរបស់ប្រទេសកាតាមកនិយាយធ្វើអីទៀត ម៉េចក៏មិនទុកឲ្យកាតាបន្តការងារសាងសង់ពហុកីឡាដ្ឋានរបស់ខ្លួនទៅ?។ កន្លងមកមានការលើកឡើងថា ប្រទេសអារ៉ាប់អ្នកមានមួយនេះជាប្រទេសក្តៅដែលមានសីតុណ្ហភាពចន្លោះពី ៤០ ទៅ ៥០អង្សានៅក្នុងរដូវក្តៅ ពោលគឺចំរដូវដែលកាតាត្រូវរៀបចំពិធីប្រកួតកីឡាបាល់ទាត់ពិភពលោក។
ត្រង់ចំណុចនេះ ហ្វីហ្វាក៏បានដឹងដែរ តែគណៈកម្មាធិការប្រតិបត្តិរបស់សហព័ន្ធមួយនេះនៅតែបានបោះឆ្នោតឲ្យប្រទេសកាតាដដែល និងដែលលោកប្រធានហ្វីហ្វាបានបញ្ជាក់ប្រាប់អ្នកកាសែតជាលក្ខណៈទូទៅថា មនុស្សយើងម្នាក់ៗបានធ្វើខុសច្រើនណាស់នៅក្នុងជីវិត។ តាមរយៈពាក្យសម្តីនេះនំាឲ្យគេយល់បានថា មិនគួរណាហ្វីហ្វាសម្រេចរៀបចំការប្រកួតកីឡាបាល់ទាត់ពិភពលោកនៅក្នុងប្រទេសមួយដែលមានសីតុណ្ហភាពរហូតដល់ទៅ ៥០អង្សានោះទេ។ បើគេពិនិត្យមើលមួយភ្លែតទៅ កំហុសត្រូវបានគេទម្លាក់លើហ្វីហ្វាទំាងស្រុង តែបើគេពិនិត្យឲ្យបានស៊ីជម្រៅបន្តិចទៅឃើញថា រឿងរ៉ាវប្រគល់សិទ្ធិរៀបចំការប្រកួតកីឡាបាល់ទាត់ពិភពលោកនៅឆ្នំា ២០២២ ឲ្យប្រទេសកាតាបានបង្កប់ជ្រៅដោយរឿងនយោបាយទៅវិញ។
លោកប្រធានហ្វីហ្វាបានចង្អល់ចំមុខប្រទេសបារំាង និងអាល្លឺម៉ង់ថា ជាអ្នកដែលបានប្រើឥទ្ធិពលនយោបាយដើរបបួលគេឯងឲ្យបោះឆ្នោតគំាទ្របេក្ខភាពរបស់ប្រទេសកាតាកាលពី ៤ឆ្នំាមុន។ លោកប្រធានហ្វីហ្វាមិនបាននិយាយពីការទិញសន្លឹកឆ្នោតរបស់ប្រទេសបារំាង និងអាល្លឺម៉ង់ទេ តែលោកបានលើកឡើងពីការដែលទីក្រុងប៉ារីស និងប៊ែរឡំាងបានប្រើគ្រប់មធ្យោបាយទំាងអស់ដើម្បីទាញយកផលប្រយោជន៍សេដ្ឋកិច្ច និងពាណិជ្ជកម្មពីប្រទេសកាតា ពិសេសកិច្ចសន្យាទាក់ទងនឹងការសាងសង់ហេដ្ឋារចនាសម្ព័ន្ធរបស់កាតាដើម្បីត្រៀមរៀបចំពិធីប្រកួតកីឡាបាល់ទាត់ពិភពលោកនៅឆ្នំា ២០២២។ ជាចម្លើយតាមវិញដោយមិនបង្អែរបង្អង់ ទីក្រុងប៉ារីស និងប៊ែរឡំាងបានច្រានចោលភ្លាមៗចំពោះការលើកឡើងរបស់ហ្វីហ្វា និងថា អ្វីដែលប្រធានហ្វីហ្វាបាននិយាយនោះ គឺគ្មានភស្តុតាងត្រឹមត្រូវទេ។
ក្រៅពីចំណោទជុំវិញបញ្ហាអាកាសធាតុ និងឥទ្ធិពលនយោបាយរបស់ប្រទេសបារំាង និងអាល្លឺម៉ង់ ក៏គេសង្កេតឃើញមានបញ្ហាមួយចំនួនទៀតដែលកាតាកំពុងប្រឈមនឹងការរិះគន់ ទិតៀន ពិសេសក្នុងបញ្ហាលក្ខខណ្ឌការងាររបស់ពលករបរទេសដែលកំពុងធ្វើការងារសាងសង់ពហុកីឡាដ្ឋាននៅក្នុងប្រទេសកាតា។ សូមជម្រាបជូនថា ដើម្បីសម្រេចឲ្យបាននូវមហិច្ឆតារបស់ខ្លួនក្នុងនាមជាម្ចាស់ផ្ទះរៀបចំការប្រកួតកីឡាបាល់ទាត់ពិភពលោកនៅឆ្នំា ២០២២ ប្រទេសកាតាបាននំាពលករបរទេសយ៉ាងច្រើនសម្បើមចូលក្នុងទឹកដីខ្លួនដើម្បីសាងសង់ពហុកីឡាដ្ឋាន និងរចនាសម្ព័ន្ធផ្សេងៗដូចយ៉ាងសណ្ធាគារ ផ្លូវថ្នល់ ឬផ្លូវដែក។ ប្រទេសកាតាមានប្រជាជនសរុបតែ ២លាននាក់ប៉ុណ្ណោះ តែចំនួនពលករបរទេសដែលកំពុងធ្វើការងារនៅក្នុងប្រទេសកាតាមានរហូតដល់ទៅ ១លាន ៣សែននាក់ និងដែល ៨០% មកពីទ្វីបអាស៊ី ភាគច្រើនជាជនជាតិឥណ្ឌា ស្រីលង្កា នេប៉ាល់ និងបង់ក្លាដែស។
កាតាជាប្រទេសអ្នកមាន តែពលករបរទេសនៅកាតាត្រូវបានគេប្រើដូចទាសករ និងទទួលបានប្រាក់ខែតិចតួចបំផុត ពោលប្រមាណជា ១៥០ដុល្លារប៉ុណ្ណោះក្នុងមួយខែ។ ពលករបរទេសត្រូវបានថៅកែកិបកេង និងត្រូវបានគេបង្ខំឲ្យធ្វើបានការហួសកម្លំាង ក្រោមកម្តៅថ្ងៃ ៥០អង្សា។ មានពលករបរទេសរាប់រយនាក់បានចោលជីវិតនៅកាតាដោយសារតែធ្វើការហួសកម្លំាង។ តែប្រឈមមុខនឹងការរិះគន់ រដ្ឋាភិបាលកាតាបានប្រកាសពីវិធានការមួយចំនួនដើម្បីបង្កើនលក្ខខណ្ឌការងាររបស់ពលករបរទេស និងសន្យាថា បំពាក់ម៉ាស៊ីនត្រជាក់នៅក្នុងពហុកីឡាដ្ឋាននីមួយៗដោយធ្វើយ៉ាងណា ឲ្យមានសីតុណ្ហភាពស្ថិតចន្លោះពី ២៦ ទៅ ២៨អង្សានៅក្នុងថ្ងៃប្រកួតកីឡាបាល់ទាត់ពិភពលោកនៅឆ្នំា ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ