ខួប៥ឆ្នាំនៃឧបទ្ទវហេតុយន្តហោះ MH17៖ ក្រុមគ្រួសារជនរងគ្រោះបន្តដង្ហោយរកយុត្តិធម៌
ថ្ងៃទី១៧កក្កដានេះ គឺជាខួបគម្រប់៥ឆ្នាំនៃហេតុការណ៍បាញ់ទម្លាក់យន្តហោះ MH17 នៅលើដែនដីអ៊ុយក្រែន។ ពិធីរំឭកខួប ត្រូវបានគេរៀបចំធ្វើនៅក្បែរព្រលានយន្តហោះ Amsterdam ប្រទេសហូឡង់។ ជាទីដែលយន្តហោះម៉ាឡេស៊ី MH17 ចាប់ផ្ដើមដំណើរតាមផ្លូវអាកាសរបស់ខ្លួនតម្រង់ទៅកាន់ទីក្រុងគូឡាំឡាំពួរ ប្រទេសម៉ាឡេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
នៅក្បែរព្រលានយន្តហោះ Amsterdam ប្រទេសហូឡង់ មនុស្សម្នាជាច្រើនបាននាំគ្នាប្រមូលផ្ដុំនៅថ្ងៃពុធ ទី១៧កក្កដានេះ ដើម្បីរំឭកដល់ជនរងគ្រោះចំនួន២៩៨នាក់ ដែលបានបាត់បង់ជីវិតនៅក្នុងឧបទ្ទវហេតុបាញ់ទម្លាក់យន្តហោះម៉ាឡេស៊ី MH17 កាលពី៥ឆ្នាំមុន។ កន្លែងប្រារព្ធពិធី គឺជាបូជនីយដ្ឋានដែលមានដើមឈើចំនួន២៩៨ដុះព័ទ្ធជុំវិញ៖ ដើមឈើមួយដើម តំណាងឲ្យជនរងគ្រោះម្នាក់។
នៅក្នុងពិធីរំឭកខួបដ៏ក្រៀកក្រំនេះ ក្រុមគ្រួសាររបស់ជនរងគ្រោះ បានបន្តអំពាវនាវស្វែងរកយុត្តិធម៌ជូនដល់អ្នកស្លាប់ បើទោះបីជាជនសង្ស័យចំនួន៤នាក់ ត្រូវបានក្រុមអ្នកស៊ើបអង្កេតអន្ដរជាតិសម្រេចចោទប្រកាន់នៅក្នុងសំណុំរឿងបាញ់ទម្លាក់យន្តហោះ MH17 នេះរួចហើយក្ដី។
គួរជ្រាបថា ជិតមួយខែមុន ពោលគឺនៅថ្ងៃទី១៩ខែមិថុនា ក្រុមអ្នកស៊ើបអង្កេតអន្ដរជាតិ ដែលមានការចូលរួមពីអាជ្ញាធរម៉ាឡេស៊ីផង បានសម្រេចចោទប្រកាន់ជនជាតិរុស្ស៊ី៣នាក់ និងជនជាតិអ៊ុយក្រែនម្នាក់ ថាជាអ្នកទទួលខុសត្រូវលើការបាញ់ទម្លាក់យន្តហោះ MH17 កាលពីឆ្នាំ២០១៤។ បើតាមក្រុមអ្នកស៊ើបអង្កេតអន្ដរជាតិដឹកនាំរដ្ឋអាជ្ញាហូឡង់ ទោះបីជាជនសង្ស័យទាំង៤នាក់ មិនបានចុចប៊ូតុងបាញ់មីស៊ីលដោយផ្ទាល់ ប៉ុន្តែពួកគេបានរួមចំណែករៀបចំឲ្យមានការដឹកជញ្ជូនយកប្រព័ន្ធមីស៊ីលប្រភេទ Bulk ទៅបាញ់ទម្លាក់យន្តហោះដឹកអ្នកដំណើរម៉ាឡេស៊ី MH17 ពីទឹកដីភាគខាងកើតអ៊ុយក្រែន។
បន្ទាប់ពីចេញដីកាចាប់ខ្លួនរួចរាល់មក សវនាការជំនុំជម្រះលើជនសង្ស័យទាំង៤នាក់ គ្រោងរៀបចំធ្វើនៅខែមីនាឆ្នាំក្រោយ នៅក្នុងប្រទេសហូឡង់។ ជាសវនាការកំបាំងមុខ ព្រោះថា ជនសង្ស័យជនជាតិរុស្ស៊ីទាំង៣នាក់ កំពុងរស់នៅក្នុងទឹកដីរុស្ស៊ី ខណៈជនសង្ស័យម្នាក់ទៀតជាជនជាតិអ៊ុយក្រែន កំពុងស្ថិតនៅក្នុងតំបន់គ្រប់គ្រងរបស់ក្រុមទាមទារផ្ដាច់ទឹកដី នៅភាគខាងកើតអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ