គេហទំព័រ TripAdvisor៖ អង្គរវត្តជាប្រាសាទដ៏លេចធ្លោជាងគេនៅលើពិភពលោក
ប្រាសាទអង្គរវត្តរបស់កម្ពុជា ទើបតែបានទទួលពានរង្វាន់ថ្មីមួយទៀត ពីគេហទំព័រ TripAdvisor ដ៏ល្បីល្បាញ។ នោះគឺពានរង្វាន់លេខមួយ ជាប្រាសាទដ៏លេចធ្លោជាងគេ នៅលើពិភពលោក World’s Number 1 Landmark នាំមុខប្រាសាទ Machu Picchu របស់ប្រទេសប៉េរូ និងប្រាសាទ Taj Mahal របស់ឥណ្ឌាថែមទៀត។ អ្នកជំនាញផ្នែកទេសចរណ៍បានសម្ដែងក្ដីរំភើបរីករាយ និងបានចាត់ទុកពានរង្វាន់នេះថា ជាសមិទ្ធិផលថ្មីស្រឡាងមួយទៀត ដើម្បីសម្ដែងពីភាពអច្ឆរិយៈពិតប្រាកដនៃប្រាសាទខ្មែរ។
ចុះផ្សាយនៅថ្ងៃ៖
ស្តាប់ - ០១:៥៤
នេះមិនមែនជាលើកទី១ទេ ដែលគេហទំព័រ TripAdvisor ផ្ដល់ពានរង្វាន់ដល់កម្ពុជា។ កាលពីដើមឆ្នាំ២០១៥នេះ គេហទំព័រ TripAdvisor បានផ្ដល់ចំណាត់ថ្នាក់ដល់ខេត្តសៀមរាប ថាជាគោលដៅទេសចរណ៍លេខ១នៅអាស៊ី និងលេខ២នៅលើពិភពលោក។ ការផ្ដល់ចំណាត់ថ្នាក់ ក៏ដូចជាពានរង្វាន់របស់គេហទំព័រ TripAdvisor ដែលជាគេហទំព័រដ៏ល្បីល្បាញខាងផ្នែកទេសចរណ៍នេះ ធ្វើឡើងតាមរយៈការត្រួតពិនិត្យ និងវាយតម្លៃ ព្រមទាំងការបោះឆ្នោតពីសំណាក់អ្នកទេសចររាប់លាននាក់ នៅទូទាំងសកលលោក។
លោក ហូ វណ្ឌី សហប្រធានក្រុមការងារវិស័យទេសចរណ៍ផ្នែកឯកជន បានសម្ដែងក្ដីរំភើបរីករាយយ៉ាងខ្លាំងពេលបានទទួលដំណឹងនេះ។ បើតាមលោក ហូ វណ្ឌី ពានរង្វាន់ថ្មីពីសំណាក់គេហទំព័រ TripAdvisor មកដល់ប្រាសាទអង្គរវត្តរបស់កម្ពុជានេះ គឺជាសមិទ្ធិផលថ្មីស្រឡាងមួយទៀត ដើម្បីសម្ដែងពីភាពអច្ឆរិយៈពិតប្រាកដនៃប្រាសាទខ្មែរ។ និងថា ពានរង្វាន់ថ្មីនេះ នឹងជួយផ្សព្វផ្សាយពីប្រាសាទអង្គរវត្ត និងប្រទេសកម្ពុជា ទៅដល់ពិភពលោក ដោយឥតគិតថ្លៃ។ នេះបើតាមលោក ហូ វណ្ឌី។
សហប្រធានក្រុមការងារវិស័យទេសចរណ៍ផ្នែកឯកជន បានគូសបញ្ជាក់បន្ថែមថា ហេតុផលដែលធ្វើឲ្យប្រាសាទអង្គរវត្ត និងខេត្តសៀមរាប ទទួលបានពានរង្វាន់ និងចំណាត់ថ្នាក់ល្អកម្រិតអន្ដរជាតិជាបន្តបន្ទាប់យ៉ាងដូច្នេះ គឺដោយសារតែស្ថេរភាពនយោបាយនៅកម្ពុជា ការផ្គត់ផ្គង់សេវាកម្មទេសចរណ៍បានល្អប្រសើរ ការបើកចំហជើងមេឃ និងភាពអំណោយផលនៃការវិនិយោគជាលក្ខណៈអន្ដរជាតិជាដើម។
យ៉ាងណាក៏ដោយ ទន្ទឹមនឹងជោគជ័យថ្មីនេះ លោកហូ វណ្ឌី ក៏បានអំពាវនាវឲ្យស្ថាប័នពាក់ព័ន្ធទាំងអស់ យកចិត្តទុកដាក់លើបញ្ហាមួយចំនួន ដែលកើតឡើងនៅពេលមានកំនើនភ្ញៀវទេសចរផងដែរ។ បញ្ហាអស់ទាំងនោះមានជាអាថិ៍៖ បញ្ហាអនាម័យ បញ្ហាសន្តិសុខសុវត្ថិភាព អំពើពុករលួយ និងបញ្ហាបដិសណ្ឋារកិច្ចជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ