វិមានព្រះបរមបដិមាសម្តេចឪនរោត្តមសីហនុ បានបើកសម្ពោធហើយ
ដូចដែលបានគ្រោងទុក វិមានព្រះបរមបដិមា សម្តេចឪនរោត្តមសីហនុ ព្រះមហាវីរក្សត្រត្រូវបានបើកសម្ពោធហើយនៅព្រឹកថ្ងៃសុក្រទី១១ តុលានេះ។ ពិធីនេះ ត្រូវបានសម្ពោធក្រោមព្រះវត្តមានព្រះមហាក្សត្រសម្តេចព្រះបរមនាថនរោត្តម សីហមុនី សម្តេចម៉ែ លោកនាយករដ្ឋមន្ត្រីហ៊ុន សែន និងសែរាជវង្សានុវង្ស តំណាងរាស្ត្រ រួមទាំងមន្ត្រីរដ្ឋការទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
នៅម៉ោង៨ និង ៣០ព្រឹកក្រោយការយាងមកដល់របស់ព្រះមហាក្សត្រសម្តេចនរោត្តម សីហមុនី និងសម្តេចម៉ែ ព្រះរាជពិធីសម្ពោធវិមានព្រះបរមរូបព្រះករុណា ព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ ត្រូវបានបើកសម្ពោធ។ ពិធីសម្ពោធដែលមានរបៀបវារៈតម្រូវឱ្យលោក សុខ អាន រដ្ឋមន្ត្រីទីស្តីការគណៈរដ្ឋមន្ត្រី និងជាប្រធានអនុគណៈកម្មការទទួលបន្ទុករៀបចំកសាងបុស្បុក ឡើងរាយការណ៍ដល់ព្រះមហាក្សត្រពីសកម្មភាពទាំងឡាយនៃការកសាងស្តូបបុស្បុកនេះ។
ហើយពិធីសម្ពោធនេះ បន្តដល់របៀបវារៈនៃឡើងថ្លែងរបស់ លោក នាយករដ្ឋមន្ត្រីហ៊ុន សែន។ លោកនាយរដ្ឋមន្ត្រីបានថ្លែងថា ការកសាងព្រះបរមបដិមារបស់ព្រះមហាវីរក្សត្រនេះ គឺជាការគោរពដឹងគុណគ្មានទីបញ្ចប់ ទៅដល់ព្រះបរមរតនៈកោដ្ឋ ដែលបានលះបង់ និងពលីក្នុងការកសាងប្រទេសជាតិមាតុភូមិពេញមួយព្រះជន្មាយុរបស់ព្រះអង្គ។ លោកនាយករដ្ឋមន្ត្រីបន្ថែមថា ការបើកសម្ពោធវិមានព្រះបរមរូបនេះក៏ជាដំណើរឈានទៅការរំលឹកខួបមួយឆ្នាំនៃការសោយទិវង្គត់ ដែលនឹងប្រារព្ឋនៅថ្ងៃទី១៥តុលាខាងមុខនេះ។
ថ្ងៃ១៥តុលា ដែលលោកនាយករដ្ឋមន្ត្រី បានអំពាវនាវដល់អ្នកដឹកនាំរដ្ឋាភិបាលជំនាន់ក្រោយ ឱ្យបន្តរក្សាទុកថ្ងៃ១៥តុលាជារៀងរាល់ឆ្នាំ គឺជាថ្ងៃទិវាបុណ្យជាតិ ដើម្បីឱ្យប្រជាពលរដ្ឋខ្មែរអាចគោរពព្រះវិញ្ញាណក្ខន្ធ ព្រះវរបិតាជាតិសម្តេចឪ នរោត្តម សីហនុ។ ក្នុងនោះដែរ លោកនាយករដ្ឋមន្ត្រីចាស់ អាណត្តិថ្មី ក៏បានប្តេជ្ញាការពាររាជានិយម ការពារព្រះរាជបល័ង្ក និងការពារព្រះមហាក្សត្រ។
គួររំលឹកថា វិមានបុស្បុក ព្រះបរមបដិមាសម្តេចឪនរោត្តម សីហនុ មានកំពស់២៧ម៉ែត្រ ពីបាតដល់កំពូល។ ហើយព្រះបរមបដិមាត្រូវបានកសាងពីស្ពាន់ ដែលមានកម្ពស់ ៤ម៉ែត្រ កន្លះ និងមានព្រះទែន ២ម៉ែត្រ ៧០សង់ទីម៉ែត្រ។ បុស្បុកទាំងមូលត្រូវបានកសាងនៅលើផ្ទៃចតុកោណ ទទឹង២៧ម៉ែត្រ បណ្តោយ៥៤ម៉ែត្រ និងកំពស់ផ្ទៃចតុកោណ ៩០សង់ទីម៉ែត្រ ដែលអមដោយបង្គោលភ្លើង៥៩ដើម។ ថវិកាដែលត្រូវកសាងតាំងពីខែកុម្ភៈ គឺត្រូវចំណាយអស់ប្រមាណជាង ១លាន២សែនដុល្លារសហរដ្ឋអាមេរិក នេះបើតាមលោក សុខ អាន ប្រធានទទូលបន្ទុកសាងសង់។
បន្ទាប់ពីការឡើងថ្លែងរបស់លោកនាយករដ្ឋមន្ត្រី ព្រះសង្ឃទាំងពីរគណៈ ព្រះមហាក្សត្រ និងសម្តេចម៉ែ និងរួមទាំងលោកនាយករដ្ឋមន្ត្រី បាននិមន្ត យាង និងដើរទៅកាន់វិមានព្រះបរមបដិមា ដើម្បីបើកព្រះសុវណ្ណភស្ត ដែលគ្រងនៅពីខាងមុខព្រះភក្ត្រព្រះបរមរតនកោដ្ឋ។នៅម៉ោង ៩ និង៣០នាទី ព្រះរាជពិធីសម្ពោធវិមានព្រះបរមរូប ព្រះបរមរតនកោដ្ឋបានបិទបញ្ចប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ