បារាំង-អូស្ត្រាលី ទំនាក់ទំនងដែលឆ្ងាយទាំងចិត្ត ឆ្ងាយទាំងកាយ
ចុះផ្សាយនៅថ្ងៃ៖
ស្តាប់ - ០៤:០៦
ប្រធានាធិបតីបារាំង កំពុងស្ថិតនៅតំបន់ប៉ាស៊ីហ្វិក ពេញមួយសប្តាហ៍នេះ។ បន្ទាប់ពីបានចូលរួមក្នុងជំនួបកំពូលហ្សេ ២០ កាលពីចុងសប្តាហ៍ នៅថ្ងៃអង្គារនិងពុធនេះ លោកហ្វ្រង់ស័រ ហូឡង់ ត្រូវបំពេញទស្សនកិច្ចផ្លូវរដ្ឋម្តង នៅដែនដីនាយសមុទ្ទបារាំងនូវែលកាលីដូនី (La Nouvelle Calédonie) និងនៅអូស្ត្រាលី។ នេះជាទស្សនកិច្ចរដ្ឋដំបូង និងមិនធ្លាប់មានឡើយសម្រាប់ប្រធានាធិបតីបារាំង នៅអូស្ត្រាលី។
អូស្ត្រាលី នៅឆ្ងាយណាស់សម្រាប់បារាំង ដល់ទៅ១៥០០០គីឡូម៉ែត្រ ! ចំពោះអូស្ត្រាលីវិញ ដ៏ដូចគ្នា បារាំងនៅឆ្ងាយខ្លាំងណាស់ ! ឆ្ងាយហៅមិនឮ មើលមិនឃើញ សឹងនិយាយបានថា អូស្ត្រាលីមិនស្គាល់ប្រទេស ឬនយោបាយបារាំង មិនរាប់ថាជាប្រទេសធំ ជាមហាអំណាចមួយនៅលើលោកដូច ចិន សហរដ្ឋអាមេរិក ឬរុស្ស៊ី ដែលអូស្ត្រាលីស្គាល់រត់មាត់នោះទេ។ សម្រាប់ពលរដ្ឋអូស្ត្រាលីជាទូទៅគេស្គាល់បារាំង តាមតែរយៈ ការប្រកួតកីឡាប្រណាំងកង់ Tour de France ស្រាក្រហម ហ្វ្រូម៉ា ឬម្ហូបឆ្ងាញ់ ...
ហេតុអ្វីបារាំងនិងអូស្រ្តាលីមានគម្លាតនឹងគ្នាខ្លាំងម្ល៉េះ ? ក្នុងសម័យសង្គ្រាមលោកអូស្ត្រាលីធ្លាប់ជាសម្ព័ន្ធមិត្តជួយសង្គ្រោះបារាំងដែរទេតើ ?!
ចំណងភ្ជាប់បារាំងនិងប្រទេសដ៏ក្មេងខ្ចីអូស្ត្រាលី មានចារជាប់តាំងពីសម័យសង្គ្រាមលោកលើកទីមួយ។ កាលណោះអូស្ត្រាលីបានបញ្ជូនទាហានមកជួយបារាំងប្រមាណ៣០ម៉ឺននាក់ ក្នុងនោះ៤៦០០០នាក់បានស្លាប់ចោលឆ្អឹងលើទឹកដីប៉ែកខាងជើងប្រទេសបារាំង។ អនុស្សាវរីយ៍ និងការឧទ្ទិសវិញ្ញាណក្ខន្ធដល់យុទ្ធជនពលីអូស្ត្រាលី មានដិតដាមជាប់រហូតមកទល់នឹងបច្ចុប្បន្ននេះ។ ទេសចរប្រវត្តិសាស្ត្រអូស្ត្រាលីច្រើនបានធ្វើដំណើរកំសាន្តសំដៅតែភាគជើងបារាំង ដែលធ្លាប់ជាសមភូមិក្តៅនៃសង្គ្រាមលោក។
គិតត្រឹមដល់ចំណុចនេះ អូស្ត្រាលីនិងបារាំង មានចំណងឈាមនឹងគ្នា។ សាស្ត្រាចារ្យវិទ្យាសាស្ត្រនយោបាយម្នាក់នៅទីក្រុងប៉ារីស បានពន្យល់ថា សង្គ្រាមលោកលើកទីមួយជាចំណែកមួយនៃការស្ថាបនាអត្តសញ្ញាណជាតិអូស្ត្រាលី ឱ្យក្លាយជាជាតិសាសន៍មួយពិតៗ។
ប៉ុន្តែជាមួយនឹងចំណងប្រវត្តិសាស្ដ្រ ប្រទេសទាំងពីរបានឆ្លងកាត់ភាពរកាំរកូស នារយៈពីរបីទសវត្សរ៍ចុងក្រោយនេះ រហូតមើលមុខគ្នាស្ទើរមិនចំ ភាពតានតឹងផ្នែកការទូតបានឡើងដល់កំពូល។ ម្យ៉ាងដោយជម្លោះប្រដាប់អាវុធចែកកោះនូវែលកាលីដូនី នាទសវត្សរ៍ឆ្នាំ១៩៨០ និងម្តងទៀត នៅឆ្នាំ១៩៩៥។ បារាំងក្រោមអាណត្តិ លោក Jacques Chirac ជាប្រធានាធិបតី បានធ្វើការបាញ់សាកល្បងនុយក្លេអ៊ែរ នៅមហាសមុទ្ទប៉ាស៊ីហ្វិក ត្រង់ម្តុំកោះMururoa ក្រោមក្រសែភ្នែកក្តៅក្រហាយនិងប្រឆាំងរបស់អូស្ត្រាលី។ ទំនាក់ទំនងប្រទេសទាំងពីរក៏ត្រជាក់ល្ហឹមតាំងពេលនោះមក។
២០ឆ្នាំកន្លង អូស្ត្រាលីទំនងជាអាចរំសាយកំហឹងបានខ្លះហើយ ! នៅថ្ងៃនេះ លោក ហ្វ្រង់ស័រ ហូឡង់ បានផ្តល់កិត្តិយសដល់ប្រទេសដែនទ្វីបដ៏ធំមួយ ដោយអញ្ជើញទៅអូស្ត្រាលី ក្នុងក្របខ័ណ្ឌទស្សនកិច្ចផ្លូវរដ្ឋ ដែលប្រធានាធិបតីបារាំងមិនធ្លាប់ធ្វើពីមុនមកទេ។
ក្នុងរយៈពេលពីរថ្ងៃដែលស្នាក់នៅក្នុងប្រទេសអូស្ត្រាលី លោកហ្វ្រង់ស័រ ហូឡង់ បានជួបសន្ទនាជាមួយនឹងនាយករដ្ឋមន្ត្រី និងបានឧទ្ទិសទស្សនកិច្ចនេះយ៉ាងធំធេងដល់ខួប១០០ឆ្នាំនៃការផ្ទុះសង្គ្រាមលោកលើកទីមួយ ព្រមទាំងដឹកនាំគណៈប្រតិភូ ជាអ្នកជំនួញ ជាម្ចាស់ក្រុមហ៊ុនសហគា្រសធំៗរបស់បារាំងជាច្រើនរូបទៅជាមួយផង។
ពីពោះនៅក្នុងវិស័យសេដ្ឋកិច្ច ទំនាក់ទំនងពាណិជ្ជកម្មបារាំង-អូស្ត្រាលី មានតិចតួចស្តួងស្តើងខ្លាំងណាស់។ មានបណ្តាជនបារាំងមិនតិចជាង៦ម៉ឺននាក់បានជ្រើសរើសតាំងលំនៅដ្ឋានក្នុងប្រទេសអូស្ត្រាលី។ វត្តមានរបស់ពួកគេ មិនគួរត្រូវមើលរំលងឡើយ ប៉ុន្តែដោយហេតុរយៈចម្ងាយឆ្ងាយ ការផ្តោះប្តូរពាណិជ្ជកម្មបារាំងអូស្ត្រាលីមានទំហំមិនដល់៤ពាន់លានអឺរ៉ូផងក្នុងមួយឆ្នាំ។ បារាំងនាំចេញទៅអូស្ត្រាលីច្រើនជាងនាំចូល ដូច្នេះវាច្បាស់ណាស់ ដែលថាប៉ារីសមានចេតនាពិតចង់ខិតចូលឱ្យកាន់តែជិតប្រទេសដ៏ធំជាងគេក្នុងតំបន់អូសេអានី តាមរយៈចរន្តការទូតសេដ្ឋកិច្ចនោះ។
អូស្រ្តាលីមិនស្គាល់វិបត្តិទេ ! សេដ្ឋកិច្ច មានកំណើន មានជាប់រហូតឥតដាច់ តាំងពី២៥ឆ្នាំមក។ ជាមួយអត្រាកំណើនសេដ្ឋកិច្ចប្រមាណ ៦% ក្នុងមួយឆ្នាំៗ តើធ្វើដូចម្តេចមិនឱ្យអឺរ៉ុបដ៏ចំណាស់ ដើរអូសជើង មួយនេះស្រមៃចង់រស់ក្បែរទៅកើត ?! សព្វថ្ងៃនេះ មានក្រុមហ៊ុនសហគា្រសបារាំងប្រមាណជាង៣០០បានទៅឈរជើងរកស៊ីនៅអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ